مەملەكەت باسشىسى نۇرسۇلتان نازاربايەۆ "وتىرار سازى" مەملەكەتتىك اكادەميالىق فولكلورلىق-ەتنوگرافيالىق وركەسترىنىڭ جەتەكشىسى ءدىنزۋحرا تىلەندييەۆانى قابىلدادى، دەپ حابارلايدى Qamshy.kz اقپارات اگەنتتىگى اقوردانىڭ دەرەگىن نەگىزگە الىپ.
كەزدەسۋ بارىسىندا مەملەكەت باسشىسى "رۋحاني جاڭعىرۋ" باعدارلاماسىن جۇزەگە اسىرۋ اياسىندا مادەنيەت پەن ونەر سالاسىنا تۇراقتى تۇردە قولداۋ كورسەتۋدىڭ ماڭىزدى ەكەنىن اتاپ ءوتتى.
"ءسىزدىڭ اكەڭىزبەن ۇزاق جىل بويى جاقسى تانىس بولدىق. اكادەميالىق دەگەن اتاعى بار "وتىرار سازى" وركەسترى سول كىسىنىڭ ەسىمىمەن اتالادى. كەزىندە بۇل وركەستردە 6 ادام بار ەدى، ءقازىر 66 مۋزىكانت جۇمىس ىستەيدى"، – دەدى قازاقستان پرەزيدەنتى.
نۇرسۇلتان نازاربايەۆ رۋحاني جاڭعىرۋ باعدارلاماسىندا كورسەتىلگەن مىندەتتەردى ورىنداۋ ىسىندە فولكلورلىق-ەتنوگرافيالىق وركەستردىڭ ءرولى ەرەكشە ەكەنىن ايتتى.
"گاسترولمەن فرانسياعا باردىڭىزدار، استانادا ونەر كورسەتتىڭىزدەر. حالقىمىزدىڭ مۋزىكالىق اسپاپتارىن بۇكىل الەمگە تانىتىپ جۇرسىزدەر. ءتول ونەرىمىزدى دارىپتەۋ ماقساتىمەن ۇلتتىق دومبىرا كۇنى دە بەكىتىلدى. ونى مەرەكەلەۋگە 1 مىڭنان استام دومبىراشى قاتىستى. مۇنىڭ ءبارى "رۋحاني جاڭعىرۋ" باعدارلاماسىنىڭ باعىتتارىنا ساي كەلەدى. ءسىز ۇلى كومپوزيتور نۇرعيسا تىلەندييەۆتىڭ ءىسىن جالعاستىرىپ كەلەسىز، سول ءۇشىن العىس ايتامىن"، – دەدى ەلباسى.
ءدىنزۋحرا تىلەندييەۆا ۇلتتىق ونەر سالاسىن دامىتۋعا زور ءمان بەرىپ وتىرعانى ءۇشىن قازاقستان پرەزيدەنتىنە العىس ءبىلدىرىپ، ەلىمىزدە جۇزەگە اسىرىلىپ جاتقان دامۋ باعدارلامالارىن قولدايتىنىن ايتتى.
