رەسەيدىڭ فەدەرالدىق بارلاۋ قىزمەتى 1995 جىلى ءستاۆروپولدىڭ بۋدەننوۆسك قالاسىندا حالىقتى كەپىلدىككە ۇستاعان قىلمىستىق توپتىڭ سوڭعى مۇشەلەرىنىڭ ءبىرىن ۇستادى. 1978 جىلى تۋعان حازۆاح چەرحيكوۆ ول كەزدە بار-جوعى 17 جاستا بولعان.

كۋاگەرلەردىڭ ايتۋىنا قاراعاندا، ول 1995 جىلى ورىن العان تەراكتىگە قاتىسقان. رەسەيدىڭ بارلاۋ قىزمەتى قىلمىسكەردىڭ ۇستالعانى جونىندەگى بەينەكورىنىستى جاريا ەتتى.

راسىندا 1995 جىلدىڭ 14 ماۋسىمىندا بۋدەننوۆسك قالاسىندا الەمدە بۇرىن-سوڭدى بولماعان لاڭكەستىك ارەكەت ورىن  العانى بەلگىلى. قاقتىعىستىڭ سالدارىنان قالانىڭ 129 تۇرعىنى، ونىڭ ىشىندە 18 ميليسيا قىزمەتكەرى، 17 اسكەري ادام قازا تاپقان. سودىرلاردىڭ قاسكوي ارەكەتىنەن 415 ادام جاراقات الدى. 1500 ادامدى كەپىلدىككە العان ولار 90 كولىكتى ورتەپ جىبەردى.

جالپى 1995 جىل مەن 2013 جىلدىڭ اراسىندا باسايەۆتىڭ بانداسىنداعى 31 ادام ۇستالىپ، ءارتۇرلى مەرزىمدەگى جازاعا كەسىلدى. ال شاميل باسايەۆتىڭ ءوزى 2006 جىلدىڭ شىلدە ايىندا ينگۋشەتياداعى ارنايى وپەراسيا كەزىندە وققا ۇشىپ، قايتىس بولدى.

قالاعا باسىپ كىرگەن باسايەۆتىڭ 200 سودىرى 1600 ادامدى كەپىلدىككە الىپ، ولاردى جەرگىلىكتى اۋرۋحاناعا قاماعانى بەلگىلى. قىلمىستىق توپ «شەشەنستانداعى سوعىستى توقتاتىپ، دجوحار دۋدايەۆپەن كەلىسسسوز جۇرگىزۋ تۋرالى»  رەسەي بيلىگىنە تالاپ قويدى. ەكى كۇنگە سوزىلعان كەلىسسوزدىڭ ناتيجەسىندە العاشىندا 61، كەيىننەن قالعان ادامدار  كەپىلدىكتەن بوساتىلدى. ەندى مىنە، باندالىق توپتىڭ سوڭعى مۇشەلەرىنىڭ ءبىرى ۇستالىپ، فەدەرالدىق قىزمەت وكىلدەرىنە جاۋاپ بەرۋدە.