بۇگىن الماتىدا قازاقستاندىق ب ا ق نارىعىن دامىتۋ ماسەلەلەرىنە ارنالعان ون ءبىرىنشى MEDIA قۇرىلتاي كونفەرەنسياسى ءوز جۇمىسىن باستادى، دەپ حابارلايدى Qamshy.kz اقپارات اگەنتتىگى. جوبانىڭ جىل سايىنعى ۇيىمداستىرۋشىسى ءارى اۆتورى – قازاقستان باسپا ءسوز كلۋبى.
باس رەداكتورلار، باسىلىم باسشىلارى، ساراپشىلار، ساياساتتانۋشىلار، جۋرناليستەر مەن قوعام قايراتكەرلەرى وتاندىق ب ا ق نارىعىن دامىتۋ ماسەلەلەرى جونىندە وي-پىكىرلەرىمەن بولىسۋدە. كونفەرەنسيادا اقپارات جانە كوممۋنيكاسيالار مينيسترلىگىنىڭ وكىلى بەكزات راحىموۆ، مەديا اليانس باسقارماسىنىڭ ءتوراعاسى ارمانجان بايتاسوۆ، قۇقىقتىق مەديا ورتالىعىنىڭ ديرەكتورى ديانا وكرەموۆا جانە وزگە ساراپشىلار قازاقستان قوعامىنىڭ جالپى الەۋمەتتىك-ەكونوميكالىق ءومىرى اياسىنداعى مەديا-نارىقتا بۇگىنگى تاڭدا بولىپ جاتقان وزگەرىستەردى تالقىلاماق.
سونىمەن قاتار سيفرلىق داۋىردەگى بۇقارالىق مەديا ماسەلەسى دە ءسوز بولماق. جاپپاي سيفرلاندىرۋ باعدارلاماسىن جۇزەگە اسىرىپ جاتقان ەلدەگى باق-تىڭ ءرولى، ورنى قانداي بولماق؟ ساراپشىلار وسى سۇراققا جاۋاپ ىزدەيدى.
قازاق تىلىندەگى باق-تى دامىتۋ ماسەلەسىنە دە كوڭىل اۋدارىلادى.
وسى ورايدا ب ا ق جۇمىسىنىڭ تيىمدىلىگىنە تالداۋ جۇرگىزۋگە ارنالعان دۇنيەجۇزى مويىنداعان تەحنولوگيا – Chartbeat سەرۆيسىن قازاقستاندا ىسكە قوسۋ اياسىندا شەبەرلىك ساباعى وتەدى. نيۋ-يوركتەن كەلگەن Chartbeat كومانداسى قازاقستاندىق باق-تىڭ باسەكەگە قابىلەتتىلىگىن كوتەرۋگە ارنالعان جۇيەنىڭ مۇمكىندىكتەرىن ەگجەي-تەگجەيلى تۇردە كورسەتىپ، حالىقارالىق باسىلىمداردىڭ تابىستى كەيستەرىمەن تانىستىرادى.
بۇعان قوسا Factcheck.kz كومانداسى فاكچەكينگكە ارنالعان ارنايى شەبەرلىك ساباعىن وتكىزەدى.
MEDIA قۇرىلتاي ءدال قازىرگى ۋاقىتتا ورىس تىلىندە ءجۇرىپ جاتىر. ال تۇسكى 14:00-دەن باستاپ قازاق ءتىلدى سپيكەرلەردىڭ قاتىسۋىمەن مەملەكەتتىك تىلدە وتەدى.
