بۇلدىرشىندەرىمىزدەن «قانداي مۋلتفيلم كورەسىڭ؟» دەپ سۇراي قالساڭ، ءبارى دەرلىك «ماشا جانە ايۋ» دەپ جاۋاپ بەرەدى. اسىرەسە قىز بالالار ماشانى كورسە، كوزدەرىن ەكراننان الماي، ءار ارەكەتىن مۇقيات باقىلاپ وتىرادى. نە قالاسا سونى ىستەتەتىن، قىرسىق، وتە ەركە، تەك بيىككە ۇمتىلعىسى كەلەتىن ماشاعا ەلىكتەيتىندەرى تاعى بار. مۇنى كەي اتا-انا جاقسىعا بالايدى. «قىزىم ايتقانىنا قايتپايتىن قايسار بولىپ وسەدى» دەپ ءمۋلتفيلمدى كۇندە قوسىپ قوياتىن اتا-انالار كوپ. ال ونىڭ استارىندا رەسەيدىڭ ارام پيعىلى بولۋى مۇمكىن بە؟ بريتاندىق Times باسىلىمى مۇمكىن ەكەنىن، دۇرىسى «ماشا جانە ايۋ» ءمۋلتفيلمىنىڭ تۇبىندە پۋتيندىك ۇگىت-ناسيحات جاتىر" دەپ جازىپتى.

بۇگىندە ءمۋلتفيلمدى الەمنىڭ تۇكپىر-تۇكپىرىنەن ميلليونداعان ادام تاماشالايدى. رەيتينگى دە جوعارى. اعىلشىن ءتىلدى YouTube جەلىسىندە مۋلتفيلمگە 4 ميلليون ادام جازىلعان ەكەن. ءار سەرياسى جالپى 40 ميلليارد كورىلىمگە يە.

Times ءوز ماتەريالىندا فيندىك Helsingin Sanomat باسلىمىنان مىسالدار كەلتىرىپتى. وندا پرييت حىبەمياگي ەسىمدى بايلانىس ينستيتۋتىنىڭ ءمۇعالىمى مۋلتفيلمدەگى ايۋدى رەسەيدىڭ بەينەسى ىسپەتتەس دەپ اتاعان ەكەن.

حىبەمياگيدىڭ ويىنشا، مۋلتفيلم ەستونيانىڭ ۇلتتىق قاۋىپسىزدىگىنە ءقاۋىپ ءتوندىرۋدى ويلاستىرىپ وتىر.

بۋكنيگەمسك ۋنيۆەرسيتەتىندەگى قاۋىپسىزدىك ماسەلەلەرى جونىندەگى مامانى ەنتوني گليس بىلاي دەدى: «ماشا ايتقانىنان قايتپايتىن قايسار، وزىنە سەنىمدى. تەك بيىككە كوتەرىلگىسى كەلەدى. وعان قاراپ، ءپۋتيندى كورگەندەي بولاسىڭ».

رەسەيلىك باسىلىمدار الەمدىك باق-عى  مۇنداي پىكىرلەرگە ميىعىنان كۇلىپ قارادى. "پىكىردىڭ ءبارى ۇرەيدەن تۋعان" دەپ ەسەپتەدى. «باتىس بۇقارالىق اقپارات قۇرالدارى رەسەيفوبيانى باستان وتكەرۋدە» دەدى. سونداي پىكىرلەردىڭ ءبىر سارىنىنا شولىپ وتسەك...

 «ماشا مەن ايۋ» مۋلتسەريالىن باتىس سىنشىلارى تاعى ءسوز ەتىپتى. كۇلكىلى»، - دەپ جازدى «رەسەي باسىلىمى»، «باتىس باسىلىمدارى ماشانى «پۋتينشە ارەكەت ەتەدى»، ال ايۋدى «بالالاردىڭ ساناسىن ۋلايدى» دەپ جازىپتى»، - دەدى «ۆەستي».

رەسەيدەگى بريتانيا ەلشىلىگى دە قاراپ قالعان جوق. «Times باسىلىمى ماڭىزدى ماسەلە كوتەرىپتى: بريتانيا «ماشا مەن ايۋ» مۋلتفيلمىنەن قالاي قۇتىلماق؟ ەو-نىڭ سانكسيالار تىزىمىنە بارلىق مۋلتيپليكاتوردى كىرگىزە مە؟ الدە، بالتىق ەلدەرىندە جاندىكتەردىڭ سۋرەتىن سالۋدى ۇيرەتەتىن ورتالىقتار اشا ما؟ بۇل ماسەلەنى شەشۋ ءۇشىن ولارعا ۇزاق ويلانىپ، دۇرىس شەشىم قابىلداۋعا تۋرا كەلەدى»، - دەپ جازدى ديپلوماتتار «تۆيتتەردە».

جۋرناليستەر مەن ساراپشىلار دا ءۇنسىز قالمادى.

«جۋرناليست بولىپ قىزمەت اتقارعالى رەسەيلىك دۋمانىڭ گارري پوتتەر مەن «تەلەپۋزيكي» مۋلتسەريالدارىن رەسەيلىك بالالارعا باعىتتالعان قۇپيا استىرتىن ارەكەت دەگەن پىكىرلەرگە ابدەن تويعان ەدىم. Times-تا سوعان ۇقساس پىكىرلەر كەلتىرىپتى. جاعدايىمىز قيىن-اۋ، شاماسى»، - دەدى ءبي-بي-سي-دىڭ ورىس بولىمىندە جۋرناليست بولىپ قىزمەت اتقارعان لەونيد راگوزين.

رەسەي جونىندەگى ساراپشى مارك گالەوتتي رەسەيگە قارسى مۇنداي پىكىردىڭ تۋعانىنا نارازى. «ماشا مەن ايۋ» سەندەردىڭ مەملەكەتتەرىڭدى جاۋلاپ المايدى. قورىقپاڭدار»، - دەدى ساراپشى.

الەم سىنىنا قالعان وزگە دە مۋلتفيلمدەر

-توم جانە دجەرري تۋرالى مۋلتفيلم ەستەرىڭىزدە بولار. ءبىر كەزدەرى ونى دا حالىق جەردەن الىپ جەرگە سالعان. ونداعى قارا ءناسىلدى ءۇي تازالاۋشىسىنا قاراپ، ءمۋلتفيلمنىڭ «ەتنيكالىق جانە ناسىلدىك نانىمدار» دەپ ايىپتالدى. بۇعان قوسا شىلىم شەگەتىن كەيىپكەردىڭ بارىنا نارازى بولدى حالىق.

-2017 جىلى امەريكالىق بويجەتكەن «مايا اتتى ارانىڭ قىزىقتى وقيعالارى» ءمۋلتفيلمىنىڭ ۇستىنە شاعىم ءتۇسىردى. ءبىر ەپيزودىندا اعاشقا ءىلىنىپ تۇرعان پلاكاتتان ەر ادامنىڭ مۇشەسىن كورىپ قالعاندىعىن ايتقان. ايەلدىڭ ارىز-تالابىنان سوڭ مۋلتفيلمدەگى ەپيزود الىنىپ تاستالدى.

-2010 جىلى «وڭتۇستىكتەگى ساياباق» اتتى امەريكالىق مۋلتفيلمگە قاتىستى مۇسىلماندار نارازىلىعىن ءبىلدىردى. مۋلتفيلمدەگى بوقتىق سوزدەر، دورەكى قالجىڭدار ولاردىڭ اشۋىن كەلتىردى. ءارى مۋلتفيلمدە مۇحاممەد پايعامباردى ايۋدىڭ بەينەسىمەن بەينەلەپ قويعاندارى مۇسىلمانداردىڭ اشۋىنا ءتيدى. ءسويتىپ، ءمۋلتفيلمدى جاساۋشىلاردىڭ باسى بالەگە قالدى.

-1936 جىلى «ديسنەيلەندتىڭ» سيمۆولىنا اينالعان ميككي ماۋسقا دا تىيىم سالىندى. گيتلەر ۋولت ديسنەيدى ەۆرەي دەپ ساناپ، مۋلتفيلمدە ازعىندىقتىڭ بار ەكەنىن ايتىپ، نارازىلىعىن بىلدىرگەن. ونىڭ ۇستىنە گيتلەردىڭ اشۋىنا تيگەنى تىشقانعا پرۋسسيالىق وفيسەردىڭ فورماسىن كيگىزىپ قويعانى ەدى. جالپى امەريكالىق ناسيحاتتاۋشىلىققا تولى مۋلتفيلم دەپ ەسەپتەلدى.

-امەريكالىق «سيمپسونى» سەريالى دا الەم بويىنشا سىنعا قالدى. رەسەيلىك مەملەكەتتىك دۋمانىڭ دەپۋتاتتارى ءمۋلتفيلمدى «اتا-انالار مەن بالالار اراسىنا ىرىتكى سالاتىن، اگرەسسياعا تولى» دەپ ەسەپتەدى. اقش-تا ءۇنسىز قالعان جوق. ءبىرىنشى حانىم باربارا بۋش «سيمپسونى» سەريالىن اقىلعا قونىمسىز دەپ باعالادى.

بالا كۇنىمىزدەن جوعارىدا اتالعان شەتەلدىك مۋلتفيلمدەردى كورىپ وستىك. الايدا استارىنا ءبىز دە، ۇلكەندەرىمىز دە ۇڭىلمەگەن ەدىك. ال بۇگىندە وتاندىق انيماسيا دامىپ كەلە جاتقان ۋاقىتتا بالالارىمىزدىڭ ساناسىنا قازاقىلىقتى قۇياتىن مۇمكىندىك تۋىپ وتىر. كۇنى كەشە شىققان "مۇزبالاق"، "كۇلتەگىن" سىندى انيماسيالىق فيلمدەردىڭ ماڭىزى تەرەڭ، ساپاسى جوعارى. ەڭ باستىسى، قازاقىلىقتىڭ ءيسى اڭقىپ تۇر.