بۇگىن "كتك رەداكسياسىنا بومبا قويىلدى" دەگەن اقپارات تاراعانىنان جۇرتشىلىق حاباردار. رەداكسيا ءجۋرناليسى دياس نۇراقىننىڭ ايتۋىنشا، قازىرگى ۋاقىتتا دۇربەلەڭ باسىلدى. رەسپۋبليكا الاڭى عيماراتىنىڭ سىرتىنا شىققان جۋرناليستەر جۇمىس ورنىنا قايتا ورالدى. ال الماتى قالاسى ءىىد باسپا ءسوز جەتەكشىسى سالتانات ازىربەك ازىرگە ەشقانداي اقپارات بەرگەن جوق.

"جالپى ەلىمىزدە قانداي دا ءبىر عيماراتقا بومبا قويىلدى" دەگەن حابار ءجيى تارايتىنى راس. الايدا رەداكسياعا قاستاندىق جاساۋ تۋرالى اقپارات  بۇعان دەيىن كەزدەسپەگەن. مۇنداعى ماقسات نە؟ جۋرناليستەرگە قاستاندىق جاسالۋى مۇمكىن بە؟ الدە قاساقانا جاسالعان ارەكەت پە؟ بۇل سۇراقتى «جاس قازاق» گازەتىنىڭ باس رەداكتورى، كتك تەلەارناسى قازاق ديرەكسياسىنىڭ ديرەكتورى سرايىل سمايىلعا قويىپ كوردىك. جۋرناليست شىن مانىندە بومبا قويىلعانىنا سەنبەيدى. الايدا بۇل قوڭىراۋدىڭ استارىندا تەرىس پيعىلدىڭ جاتۋى مۇمكىن ەكەنىن ايتادى.

♦كتك رەداكسياسىنا بومبا قويىلعاندىعى تۋرالى قوڭىراۋ ءتۇستى

«شىنىندا قويىلعان بولسا، قانداي دا ءبىر بولجام جاساۋعا بولادى. ال ءدال ءقازىر ناقتى ەشتەڭە ايتا المايمىن. دەگەنمەن، رەداكسيانىڭ بەدەلىن ءتۇسىرۋ ماقساتىندا جاسالعان ارەكەت بولۋى دا ابدەن مۇمكىن»، - دەدى سرايىل سمايىل.

ءيا، ءدال ءقازىر قانداي دا ءبىر بولجام ايتۋ قيىن. الايدا ەل ىشىندە بولماسا دا، الەمدە رەداكسيا عيماراتىنا جاسالعان نەمەسە جاسالماق بولعان قاستاندىقتىڭ تۇرلەرى كەزدەسىپ قالادى. ماسەلەن، جۋىردا عانا امەريكالىق CNN تەلەارناسىنا بومبا قويىلعانى بەلگىلى، ءتىپتى جەلىدە بومبانىڭ سۋرەتى دە جاريالانعان. رەداكسيا عيماراتىنا قويىلعان بومبانىڭ سۋرەتى ورتالىق بارلاۋ باسقارماسىنىڭ ەكس- ديرەكتورى دجونن برەنناننىڭ اتىنا جىبەرىلگەن. نيۋ-يورك اكىمى بيلل دە بلازيو بۇل جاعدايدى تەراكت جايلى جوسپاردىڭ حابارلانعانى دەپ ءتۇسىندىردى. ايتۋىنشا، تەررورشىلار باق-تاعى ءسوز بوستاندىعىن جويۋدى ماقسات تۇتىپ وتىر.

♦"بومبا قويىلدى" دەگەن حاباردى ەستىگەن ءجۋرناليستىڭ ارەكەتى جۇرتتى ءتانتى ەتتى

ءبىر جىل بۇرىن ماسكەۋلىك «نوۆايا گازەتا» باسىلىمىنىڭ قىزمەتكەرلەرى بومبا جايلى قوڭىراۋدىڭ كەسىرىنەن ەۆاكۋاسيالانعان.  الايدا ەشقانداي جارىلعىش زات تابىلعان جوق. ال كتك عيماراتىنا سوعىلعان قوڭىراۋدىڭ استارىندا نە جاتىر، ەگەر قىلمىسكەر ۇستالسا، ءبارى دە انىقتالا جاتار.