اقتاۋدا ەرجان حازىرەت (ەرمۇحاممەد) تولەگەن ۇلى ابىزدىڭ مۇرالارى تاعىلىمىنا ارنالعان «ءىلىم بۇلاعى – كەمەلدىك ءنارى» اتتى رەسپۋبليكالىق عىلىمي-پراكتيكالىق كونفەرەنسياسى ءوتتى. كونفەرەنسيا بارىسىندا ەرجان حازىرەت قولدانعان رۋحاني عىلىم، عيبراتقا تولى ءومىر جولى جانە تاعىلىمى توڭىرەگىندە بەلگىلى ءدىنتانۋشىلار مەن عالىمدار تاراپىنان باياندامالار جاسالىپ، «ءىلىمنىڭ بۇلاعى-تاقۋالىق قاينارى» اتتى حازىرەت كىتابىنىڭ تۇساۋكەسەرى ءوتتى. بۇل تۋرالى ماڭعىستاۋ وبلىسى اكىمىنىڭ باسپا ءسوز قىزمەتى مالىمدەدى.
كونفەرەنسياعا ماڭعىستاۋ وبلىسىنىڭ اكىمى ەرالى توعجانوۆ، قازاقستان رەسپۋبليكاسى قوعامدىق دامۋ مينيسترلىگى قوعامدىق كەلىسىم كوميتەتى ءتوراعاسىنىڭ ورىنباسارى مىرزايەۆ بالعابەك ءابدىقايم ۇلى، قازاقستان مۇسىلماندارى ءدىني باسقارماسى ءتوراعاسىنىڭ ورىنباسارى، ناييب مۋفتي باۋىرجان ەسماحان، نۇر-مۇباراك ۋنيۆەرسيتەتىنىڭ پرورەكتورى قۇرمانبايەۆ قايرات، ءدىنتانۋشى، عالىم يساحان مۇحان، قىزىلوردا قالاسى «قالمۇحاممەد يشان» مەشىتىنىڭ باس يمامى، تاساۋۋفتانۋشى رىسباي دايراباي سەرىكباي ۇلى، فيلولوگيا عىلىمدارىنىڭ كانديداتى، ادەبيەتتانۋشى قابيبوللا سىديىق ۇلىنىڭ جارى، ەرجان حازىرەتتىڭ قولجازبا مۇرالارىن ساقتاپ، بۇگىنگى ۇرپاققا جەتكىزۋشى ومار قىزى گۇلشات اپاي جانە ەرجان حازىرەتتىڭ قىزى ەرجان قىزى نەسىپحان قاتىستى. «ءدىن سالاسىنداعى مەملەكەتتىك ساياساتتى ىسكە اسىرۋدىڭ ماسەلەلەرى»؛ «ىزگىلەردىڭ ءىزباسارى ەرجان (ەرمۇحاممەد) حازىرەت جانە ەلىمىزدەگى ءدىني اعارتۋ ماسەلەلەرى»؛ «ەرجان حازىرەت جانە ونىڭ ءدىني مۇرالارى» تاقىرىپتارىندا باياندامالار جاسالدى. جيىندا ءسوز العان ەرالى توعجانوۆ: "ەلباسىمىز نۇرسۇلتان ءابىش ۇلى نازاربايەۆ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا «ۇلتتىق سانامىزدىڭ قالىپتاسۋ نەگىزىندە ۇلتتىق تاجىريبەلەرمەن قاتار، ءدىني قۇندىلىقتارىمىزدىڭ دا جاتقاندىعىن ەسكەرسەك، قازاق حالقىنىڭ ءداستۇرلى ءدىنى ۇلتتىق كودىمىزدىڭ تاريحي نەگىزدەرىنىڭ ءبىرى بولىپ تابىلادى.» – دەپ اتاپ كورسەتكەن بولاتىن. بۇگىنگى باسقوسۋ اياسىندا بىزدەر اسەرلى ءساتتىڭ، تاريحي وقيعانىڭ كۋاسى بولعالى وتىرمىز. ءومىرىنىڭ سوڭىنا دەيىن استىرتىن جانە جاريا تۇردە قۋدالاۋ مەن قاداعالاۋ اياسىندا بولعان ەرجان حازىرەتتىڭ «يمانشارت»، «ءدىني وسيەت»، «شاريعات» جانە «نامازداعى دۇعالار» قولجازبالارىن كونە شاعاتاي تىلىندە جازىپ قالدىرۋىنىڭ ءوزى ۇلكەن كورەگەندىكتىڭ، پاراساتتىلىقتىڭ، اقىلدىلىقتىڭ، جۇرەك يماندىلىعىنىڭ، رۋحانياتتى سەزە ءبىلۋىنىڭ جانە ەلدىڭ جارقىن بولاشاعىنا سەنۋىنىڭ ايقىن كورىنىسى. جۋىردا قولجازبالاردى تاجىريبەلى ءتارجىماشىلار قازاق تىلىنە اۋدارىپ، ءتيىستى ورىندارعا تۇپنۇسقامەن دالدىگىن
ارنايى تەكسەرتكەن سوڭ، جازبالار كونە شاعاتاي تىلىندەگى نۇسقاسى، قازاق تىلىندەگى اۋدارماسى جانە ترانسكريپسياسى قاتار بەرىلگەن كورنەكتى «وسيەتناما»، «ءىلىمنىڭ بۇلاعى – تاقۋالىق قاينارى» اتتى كىتاپ بولىپ باسىلىپ شىقتى. قولجازبانى كوزىنىڭ قاراشىعىنداي ساقتاپ، بىزگە جەتكىزگەن عالىمدارعا العىس ايتامىن»، - دەدى.
