بۇگىن ەلورداداعى ەۋرازيا ۇلتتىق ۋنيۆەرسيتەتىندە بەلگىلى ءدىنتانۋشى، قوعام جانە رۋحانيات قايراتكەرى ەرجان حازىرەت تولەگەن ۇلىنىڭ مۇرالارىن زەردەلەۋگە ارنالعان رەسپۋبليكالىق عىلىمي-پراكتيكالىق كونفەرەنسياسى ءوتتى. «ءدىن تۇعىرى جانە ءىلىم قاينارى» دەپ اتالاتىن جيىنعا وبلىس اكىمى ەرالى توعجانوۆ باستاعان ماڭعىستاۋلىق زيالى قاۋىم وكىلدەرى، ق ر پارلامەنتى ءماجىلىسىنىڭ دەپۋتاتتارى، ل.ن. گۋميليەۆ اتىنداعى ەۋرازيا ۋنيۆەرسيتەتىنىڭ رەكتورى ەرلان سىدىقوۆ، ەلىمىزدىڭ ءار ايماعىنان ءدىنتانۋشى تەولوگ ماماندار، استانادان تاريحشى عالىمدار قاتىستى.
شارا بارىسىندا سياسى كەپپەنگەن «ءىلىمنىڭ بۇلاعى-تاقۋالىق قاينارى» اتتى ەرجان تولەگەن ۇلىنىڭ كىتابى تانىستىرىلدى. سونىمەن قاتار ءماجىلىس دەپۋتاتى تاراس حيتۋوۆ، ەۋرازيا ۇلتتىق ۋنيۆەرسيتەتىنىڭ پرورەكتورى ديحان قامزابەك ۇلى، فيلوسوفيا جانە تەولوگيا عىلىمدارىنىڭ دوكتورى، پروفەسسور دوساي كەنجەتاي ق ر مادەنيەت جانە سپورت مينيسترلىگى ءدىن ماسەلەلەرى جونىندەگى عىلىمي-زەرتتەۋ جانە تالداۋ ورتالىعىنىڭ ديرەكتورى اينۇر ءابدىراسىل قىزى بايانداما جاسادى.
القالى وتىرىستا ءسوز العان وبلىس اكىمى ەرالى توعجانوۆ: «ءبىز ارتىندا وشپەس مۇرا قالدىرعان ەرجان تولەگەن ۇلىنىڭ ەڭبەكتەرىن جاريالاپ، عىلىمي دەرەكتەرگە سۇيەنە وتىرىپ جۇمىستى قولعا الدىق. بۇل جوبانىڭ ارتىندا قانشاما عالىمدارىمىزدىڭ ەڭبەگى جاتىر. ءومىرىنىڭ سوڭىنا دەيىن استىرتىن جانە جاريا تۇردە قۋدالاۋ مەن قاداعالاۋ اياسىندا بولعان ەرجان حازىرەتتىڭ ءومىرى، ۇلكەن كورەگەندىلىگى، پاراساتتىلىعى مەن اقىلدىلىعى ءارى جۇرەك يماندىلىعى جاس ۇرپاققا ۇلگى. باسقوسۋعا كەلگەن قوناقتار ماعىنالى جيىننىڭ ماڭىزىنا توقتالىپ، از ۋاقىتتا كوپ دۇنيە الىپ، رۋحاني جاندۇنيەنى تولتىرىپ شىققاندارىن جاسىرمادى. سونىمەن قاتار، عىلىمي شارا تەك وبلىس كولەمىندە قالىپ قويماي، تۇبەكتەن سارىارقا جەرىنە كەلىپ وتكىزۋ ۇيىمداستىرۋشىلاردىڭ ۇلكەن ءىسى»، - دەپ باعا بەردى
