ماڭعىستاۋدا 2017-2018 جىلدارى جەر ۋچاسكەسىنىڭ پايدالانۋ مەرزىمىنىڭ وتۋىنە بايلانىستى قايتارىلعان جانە يگەرىلمەگەن كولەمى 26413،87 گەكتاردى قۇرايتىن 452 جەر ۋچاسكەسى انىقتالعان. ال جالپى كولەمى 20733،2054 گا بولاتىن بارلىعى 171 جەر ۋچاسكەسى مەملەكەت مەنشىگىنە قايتارىلعان. بۇل جونىندە ماڭعىستاۋ وبلىسىنىڭ اكىمى ەرالى توعجانوۆتىڭ تاپسىرماسىنا سايكەس وبلىس اكىمىنىڭ ورىنباسارى رۋسلان ساكەيەۆتىڭ جەر قاتىناستارى ماسەلەسىنە قاتىستى وتكىزگەن جيىنىندا ايتىلدى.

وبلىس اكىمىنىڭ باسپا ءسوز قىزمەتىنىڭ مالىمەتىنشە، جەردىڭ ماقساتتىق نىسانىن اۋىستىرىپ، باسىندا بەلگىلەنگەن جوسپاردان باسقا نىسان سالىپ قويۋ دەرەگى جيىلەگەن. اسىرەسە ءتۇپقاراعان مەن مۇنايلى اۋداندارىندا وسىنداي زاڭبۇزۋشىلىق كوپ كەزدەسەدى. سونىمەن قاتار، بەينەۋ اۋدانىندا زاڭسىز بەرىلگەن جەر ۋچاسكەسى مەملەكەت مەنشىگىنە قايتارىلدى. جوعارىدا اتالعان زاڭ بۇزۋشىلىقتارعا جول بەرگەن جەر سالاسىنا جاۋاپتى اۋدان اكىمدەرىنىڭ ورىنباسارلارىن جەر، ساۋلەت جانە قالا قۇرىلىسى بولىمدەرىنىڭ باسشىلارىن تارتىپتىك جاۋاپكەرشىلىككە تارتۋ جونىندە تاپسىرما بەرىلدى. ال جاڭاوزەن قالاسىندا 18 جەر ۋچاسكەسى بويىنشا سوت پروسەسى ءجۇرىپ جاتىر.

بۇگىندە وبلىس بويىنشا جەكە تۇرعىن ءۇي قۇرىلىسىن سالۋ ءۇشىن جەر ۋچاسكەلەرىن الۋعا كەزەكتە تۇرعاندار سانى 166 312 ادامدى قۇرايدى. قازىرگى كەزدە بارلىق ەلدى مەكەندەردىڭ باس جوسپارلارى جاساقتالعان. ولاردىڭ ىشىندە اقتاۋ مەن جاڭاوزەن قالالارىندا جەكە تۇرعىن ءۇي قۇرىلىسى ءۇشىن الاڭدار قارالماعان، باسقا اۋداندار بويىنشا باس جوسپارىندا 26820 ۋچاسكە قارالعان.

جەر قاتىناستارى سالاسىنىڭ ماسەلەلەرى قاشان دا وبلىس اكىمىنىڭ قاداعالاۋىنداعى وزەكتى باعىتتاردىڭ ءبىرى. جەرگە قاتىستى، جەردىڭ پايدالانىلۋىنا، بۇزىلۋىنا، يگەرىلمەگەن جەرلەردى مەملەكەت مەنشىگىنە قايتارۋعا بايلانىستى اكىمدىكتە بىرنەشە جينالىستار وتكىزىلىپ، وقۋ-ادىستەمەلىك كىتاپشالار تاراتىلىپ، ناقتى تاپسىرمالارى بەرىلگەن.