بۇل جونىندە ماڭعىستاۋ وبلىسى اكىمىنىڭ اپپارات جيىنىندا تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى قۇسبەكوۆ دۇيسەن مالىمدەدى.
باسقارما باسشىسى تۇرمىستىق قاتتى قالدىقتاردى جيناۋ مەن ساقتاۋدىڭ اعىمداعى جاعدايى جانە تاريفتەر تۋرالى باياندادى.
«ءقازىر وبلىستاعى بارلىق 662 689 ادامنىڭ 551 590-ى نەمەسە 83%-ى عانا تۇرمىستىق قاتتى قالدىقتاردى جيناۋعا كەلىسىمشارتقا وتىرعان. ال ەلدى مەكەندەردى كونتەينەرلەرمەن قامتۋ جۇمىسىندا كەمشىلىكتەر از ەمەس. كونتەينەرلەرگە بارلىق قاجەتتىلىك 20 417 بولسا، 10 093 داناسى ورناتىلعان. «قازاقستان عارىش ساپارى» ۇلتتىق كومپانياسىنىڭ تۇسىرىلىمىمەن 96 نۇكتەدە رۇقساتسىز توگىلگەن قالدىقتار ورىندارى انىقتالدى»، - دەدى دۇيسەن قۇسبەكوۆ.
