اقتاۋ قالاسىنداعى ليفت شارۋاشىلىعىنىڭ جاعدايى تۋرالى ماڭعىستاۋ وبلىسى اكىمىنىڭ اپپارات جيىنىندا قالا اكىمى عالىمجان نيازوۆ باياندادى.

ونىڭ ايتۋىنشا، اقتاۋ قالاسىنىڭ ەسكى ءتۇرعىن-ۇي قورىندا، ياعني 2002 جىلعا دەيىن سالىنعان 174 ۇيدە 337 ليفت بار. ستاندارتقا سايكەس جولاۋشى تاسيتىن ليفتىلەردىڭ جۇمىس جاساۋ مەرزىمى 25 جىل بولىپ بەلگىلەنىپ، سودان كەيىن ولار جاڭعىرىلۋى نەمەسە پايدالانۋدان شىعارىلۋى ءتيىس. قالاداعى العاشقى توعىز قاباتتى تۇرعىن ۇيلەر 1968 جىلدان باستاپ سالىنعانىن ەسكەرسەك، سول ۇيلەردەگى ليفتىلەرگە بۇگىنگى تاڭدا 50 جىل بولعان.

«ەسكى تۇرعىن ءۇي قورىنداعى 174 ۇيدە ءبىر ليفتىدەن جۇمىس ىستەپ تۇرۋ ءۇشىن اقتاۋ قالاسىنىڭ اكىمدىگى 2014-2018 جىلدارعا 108 ءليفتىنى اۋىستىرۋعا جوسپار جاساعان بولاتىن. وسىعان بايلانىستى جۇمىستار جۇرگىزىلىپ، مەملەكەتتىك بيۋدجەتتەن قارجى ءبولىنىپ، 2014 جىلى – 23 ليفت، 2015 جىلى – 24 ليفت، 2016 جىلى – 48 ليفت، 2017 جىلى – 33 ليفت اۋىستىرىلدى. وسى كەزەڭدە جۇمىس ىستەۋ مەرزىمى بىتكەن، اۋىستىرۋ كەستەسىنە كىرمەگەن 20 ليفت قوسىمشا اۋىستىرىلىپ، بارلىعى 128 ليفت اۋىستىرىلدى. 2019-2020 جىلدارى ءبىرىنشى كەزەكتە اۋىستىرىلۋدى قاجەت ەتەتىن ليفتىلەردى بيۋدجەت ەسەبىنەن اۋىستىرۋدى جوسپارلاپ وتىرمىز. ءبىر ءليفتىنىڭ باعاسى شامامەن 7-8 ملن. تەڭگە»، - دەدى قالا اكىمى.