اسان مەن شىنار تويموۆتاردىڭ وتباسىن قۇرعاندارىنا بيىل ون ءۇش جىل. قازىرگى ۋاقىتتا ولار اقتوبە قالاسىنداعى 6655 اسكەري بولىمىندە كەلىسىم-شارت بويىنشا قىزمەت اتقارىپ كەلەدى. ال، ساناۋلى اي بۇرىن ەرلى-زايىپتىلار «اسكەري باسپانا» باعدارلاماسىمەن وسى قالادان ءۇش بولمەلى پاتەر الىپ، باقىتقا كەنەلگەن بولاتىن.

اسكەري قىزمەتشى بولۋ- اسان تويموۆتىڭ بالا كۇنگى ارماندارىنىڭ ءبىرى بولىپتى. ءبىز ودان الدىمەن باسپانالى بولۋ مۇمكىندىگىن سىيلاعان اسكەري سالاعا قالاي كەلگەندىگى تۋرالى ايتىپ بەرۋىن وتىندىك.

- ءوزىم وسى اقتوبە قالاسىنداعى قوبدا اۋدانى، ءا.مولداعۇلوۆا اتىنداعى سوۆحوزدا (قازىرگى ءاليا اۋىلى) دۇنيەگە كەلدىم. وسى اۋىلداعى ورتا مەكتەپتى اياقتاعاننان كەيىن، 2001 جىلى اسكەر قاتارىنا شاقىرتۋ الدىم. وتان الدىنداعى بورىشىمدى شىعىس قازاقستان وبلىسى، اياگوز قالاسىنداعى 97616 اسكەري بولىمىندە ەكى جىل وتەدىم. ەلگە ورالعاسىن، كولىك جۇرگىزۋشىسى، كۇزەتشى سەكىلدى ءارتۇرلى جۇمىستاردى جاساپ ءجۇرىپ، ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنە ينجەنەر-تەحنيكالىق فاكۋلتەتى بويىنشا «جول جانە تاسىمالداردى تەحنيكالىق پايدالانۋ» ماماندىعىنا وقۋعا ءتۇسىپ، ونى 2010 جىلى اياقتاعان سوڭ، سول  وقۋ ورنىندا بەينەباقىلاۋ كامەرالارىنا ينجەنەر بولىپ جۇمىسقا تۇردىم. ءبىر كۇندەرى حابارلامالاردان اسكەري بولىمگە كەلىسىم-شارتپەن قىزمەتكە شاقىرىپ جاتقان جاڭالىقتى ەستىپ، بالا كۇنگى ارمانىمنىڭ ءبىر ۇشى كورىنگەندەي بولدى. ەش ويلانباستان، بىردەن كەلىپ، قۇجاتتارىمدى وتكىزدىم. مەنى مۇعالجار اۋدانى جەم قالاسىنداعى ءۇشىنشى اتقىشتار روتاسىندا قورعانىس بەكەتىنىڭ باستىعى لاۋازىمىنا تاعايىندادى.

بۇل 2011 جىلدىڭ قاراشا ايى بولاتىن. وسىدان كەيىن اساننىڭ قىزمەتتە جولى بولىپ، 2013 جىلى قىزمەتتىك وسۋىنە بايلانىستى جاڭاوزەن قالاسىنداعى 5548 اسكەري بولىمىنە قۇپيا ءبولىمىنىڭ باستىعى لاۋازىمىنا ۇسىنىس ءتۇسىپ، ءتورت جىلىن وسى لاۋازىمعا ارنايدى. تەك، 2017 جىلدىڭ مامىر ايىنان بەرى تۋعان جەرى اقتوبە قالاسىنداعى 6655 اسكەري بولىمىندە قۇپيا بولىمشەسىنىڭ باستىعى لاۋازىمىن اۋىسۋ تۋرالى ۇسىنىس تۇسكەلى، وسى لاۋازىمدى ابىرويمەن اتقارىپ كەلەدى.

- نەگىزى مەكتەپتە وقىپ جۇرگەن كەزدەن باستاپ، اسكەري ادام بولىپ، تارتىپكە باعىنىپ، اسكەري فورمامەن ءجۇرۋدى ارماندايتىنمىن.ءبىراق، شاعىن اۋىلدا تۋىلعاسىن بولار، اينالامدا باعىت كورسەتەتىن ادام بولماعاننان كەيىن، اسكەري وقۋ ورىندارى تۋرالى اقپارات جەتكىلىكسىز بولدى. ءتىپتى، بىلگەن كۇندە دە الىسقا بارىپ وقۋعا ول كەزدە شاشامىز جەتپەس ەدى،-دەگەن اسان ءسوزىن ءارى قاراي جالعادى:

- وتباسى ادام بولعاننان كەيىن، قاي قالاعا بارساق تا، ۇكىمەت ءبىزدى جاتاقحانامەن قامتىپ وتىردى. ءبىراق، بالالار وسكەن سايىن ءبىر بولمەلى پاتەردە تۇرۋ بىزگە قيىنشىلىقتار تۋعىزىپ ءجۇردى. ەندى مىنە، وسى سالاعا كەلگەنىمە ەش وكىنبەيمىن. سەبەبى، بىرەۋلەر 30-40 جىلداپ ءجۇرىپ الاتىن باسپاناعا ءبىز قۇجات تاپسىرعان بەرەر ايدا قول جەتكىزدىك. ناقتىراق ايتقاندا، شىلدە ايىندا باسپانا الۋعا ۇسىنىس بەرگەن بولساق، تامىز ايىندا ماقۇلدانىپ، قىركۇيەك ايىندا پاتەرگە كىردىك. ءقازىر ويلايمىن، «ەگەر باسقا قىزمەتتە جۇرسەم، باسپانا الۋ ءبىز ءۇشىن ءالى دە ارمان بولار مە ەدى؟» دەپ. ونىڭ ۇستىنە اسكەريلەرگە باسپانانىڭ 20 پايىزىن عانا تولەتىپ، قالعانىن ۇكىمەتتىڭ ءوزى وتەۋى- ءبىز سياقتى اسكەري قىزمەتشىلەرگە مەملەكەت تاراپىنان كورسەتىلىپ وتىرعان ۇلكەن قولداۋ، كومەك دەپ بىلەمىن. وسى ورايدا، اسكەري قىزمەتشىلەر ءۇشىن وسىنداي باعدارلاما ويلاپ تاۋىپ، سول ارقىلى باسپانالى بولۋ باقىتىن بۇيىرتقان جوعارى باس قولباسشىمىز نۇرسۇلتان نازاربايەۆقا،ۇلتتىق ۇلاننىڭ باس قولباسشىسىنا ۇلكەن راحمەت ايتامىز. ءۇيىمىز بالالاردىڭ مەكتەبىنە دە، جۇمىسىمىزعا دا جاقىن. جىلى، تۇرۋعا قولايلى،- دەيدى اسان تويموۆ.

دەكرەتتىك دەمالىسقا دەيىن اساننىڭ جۇبايى شىنار تويموۆا دا كەلىسىم-شارت بويىنشا اتالعان اسكەري بولىمدە تىل قىزمەتىنىڭ ءىس جۇرگىزۋشىسى قىزمەتىندە بولىپتى.

- باستاپقىدا بۇل باعدارلامانىڭ شىنايىلىعىنا كۇمانىمىز بولعانى راس. قانشاما جىلدان بەرى ءبىر بولمەنى جالداپ كەلگەننەن كەيىن بە، جولداسىم ءۇش بولمەلى پاتەرگە قۇجاتىمىزدىڭ وتكەنى تۋرالى حابارلاعاندا، قۋانعاننان جىلاپ جىبەردىم. ويتكەنى،12 شارشى مەتر بولاتىن ءبىر بولمەدە تاماق ءىشىپ، سول جەردە ۇيىقتاپ جۇرگەن كۇندەر دە باسىمىزدان ءوتتى عوي. ءتىپتى، ءوز باسپانامىزدى العانىمىزعا دا ءالى كۇنگە دەيىن سەنە الماي كەلەمىز،-دەيدى قۋانىشتان ءجۇزى بال-بۇل جانعان شىنار.

كەلىسىم-شارتپەن قىزمەت ەتىپ كەلەتىن ەرلى-زايىپتى قازىرگى ۋاقىتتا ءۇش بىردەي ۇل-قىز ءوسىرىپ وتىرعان باقىتتى وتباسى. بالالارىنىڭ ۇلكەنى- ايجۇلدىز ورتا مەكتەپتىڭ بەسىنشى، بەيبارىس- ءۇشىنشى سىنىبىندا وقىپ جاتىر. ال، كەنجەلەرى- كاۋسارعا ون اي. مەملەكەت سىيلاعان ۇياداي، جىپ-جىلى باسپانادا ولار قاڭتاردىڭ قاھارلى ايازىن دا سەزىنبەيتىندەرىنە سەنىمدى.

گۇلفايرۋز تورەمۇراتوۆا