بۇل جونىندە «نۇر وتان» پارتياسى ءتوراعاسىنىڭ ءبىرىنشى ورىنباسارى ورتالىق كوممۋنيكاسيالار قىزمەتىندە ءوتكەن ارنايى بريفينگتە ايتتى.

اتالعان ءىس-شارادا ماۋلەن اشىمبايەۆ ەلباسىنىڭ «ۇلى دالانىڭ جەتى قىرى» اتتى ماقالاسىندا تاريحي سانانى جاڭعىرتۋدىڭ نەگىزگى باسىمدىقتارىن ايقىنداپ بەرگەنىن جانە ولاردى جۇزەگە اسىرۋعا «نۇر وتان» پارتياسىنىڭ دا بەلسەندى قاتىساتىنىن جەتكىزدى.

– ەلباسىنىڭ ماقالاسىنداي ايتىلعان يدەيالار مەن قۇندىلىقتاردى دارىپتەپ، جۇزەگە اسىرۋعا زيالى قاۋىم وكىلدەرىءنىڭ دە بەلسەنە قاتىسقانى ابزال. سوندىقتان «ۇلى دالا» شىعارماشىلىق بايقاۋىن جاريالاپ، قوعامىمىزدىڭ رۋحاني جاڭعىرۋىنا اسەر ەتەتىن ەڭبەكتەردى جانە تاريحىمىزداعى ۇلى تۇلعالاردىڭ ونەگەلى ءومىرىن ناسيحاتتايتىن شىعارمالاردى قولداپ، جاڭا جۇمىستاردىڭ جازىلۋىنا ءوزىمىزدىڭ ۇلەسىمىزدى قوسۋدى كوزدەپ وتىرمىز. بايقاۋدىڭ فورماتى مەن ماڭىزىن جازۋشىلار وداعىمەن پىسىقتاپ، الدىن الا تالقىلادىق. جەڭىمپازدار بەس اتالىم بويىنشا انىقتالادى. ولاردىڭ بارىنە ايتارلىقتاي قارجىلاي سىيلىق تاعايىندالعان. ناقتى ايتقاندا، ءار اتالىمنىڭ جەڭىمپازىنا – 1،5 ميلليون، 2-ورىن يەگەرلەرىنە – 750 مىڭ، ال 3-ورىن العان قاتىسۋشىلارعا 500 مىڭ تەڭگەدەن بەرىلەدى. سوندىقتان بۇل بايقاۋدى جاس قالامگەرلەرگە بەرىلگەن جاڭا مۇمكىندىك دەپ قابىلداۋعا دا بولادى، – دەدى ماۋلەن اشىمبايەۆ.

بايقاۋدىڭ باستى ماقساتى – رۋحاني جاڭعىرۋ يدەيالارى مەن قۇندىلىقتارىن دارىپتەيتىن قازىرگى زامانعى قازاقستاندىق ادەبيەتتى دامىتۋ جانە سوعان قولداۋ كورسەتۋ. سونداي-اق ءوز شىعارمالارىندا ەلىمىزدىڭ رۋحاني جاڭعىرۋى مەن دامۋىن سۋرەتتەيتىن، قازىرگى زامانعى شىندىقتى تۇسىنۋگە جانە قازاقستاندىقتاردىڭ دۇنيەتانىمىن قالىپتاستىرۋعا ىقپال ەتەتىن تالانتتى جاس ادەبيەتشىلەردى انىقتاپ، ولاردىڭ ەڭبەگىنە لايىقتى باعا بەرۋ دە كوزدەلىپ وتىر.

بايقاۋعا 18 بەن 40 جاس ارالىعىنداعى قالامگەرلەر قاتىسا الادى. قاتىسۋشىلاردىڭ جۇمىستارى 2018 جىلدىڭ 28 قاراشاسى مەن 2019 جىلدىڭ 15 قاڭتارى ارالىعىندا قابىلدانادى. ناتيجەسىندە «پروزا»، «پوەزيا»، «دراماتۋرگيا، كوركەم فيلمدەر مەن تەلەسەريال سەناريى»، «پۋبليسيستيكا» ءجانە «بالالارعا ارنالعان شىعارما» سياقتى بەس بىردەي اتالىم بويىنشا جەڭىمپازدار مەن جۇلدەگەرلەر انىقتالماق.

بريفينگكە «نۇر وتان» پارتياسى ءتوراعاسىنىڭ ءبىرىنشى ورىنباسارىمەن بىرگە بەلگىلى جازۋشى، دراماتۋرگ، قوعام قايراتكەرى تولەن ابدىك، پۋبليسيست، پارلامەنت ءماجىلىسىنىڭ دەپۋتاتى ساۋىتبەك ابدراحمانوۆ جانە قازاقستان جازۋشىلار وداعىنىڭ سەكرەتاريات مۇشەسى نەسىپبەك ايت قاتىستى.

بايقاۋدىڭ باسقا دا شارتتارى تۋرالى پارتيانىڭ رەسمي سايتىندا جاريالانعان.