الماتى قالاسى ءبىلىم باسقارماسى جالپى جۇلدە قورى 12 ملن تەڭگەنى قۇرايتىن "تۇلپار ءمىنىپ، تۋ العان" ادەبي-تانىمدىق بايقاۋىن جاريالاعاننان كەيىن تامىزدىڭ سوڭعى كۇندەرى اقىن سەرىك سەيىتمان كەرەمەت ءبىر ەستافەتا باستادى. «تۇلپار ءمىنىپ، تۋ العان» ۇلتتىق جوباسىن قولداۋ ماقساتىنداعى "الپامىس باتىر" جىرىن وقۋ ەستافەتاسى» دەپ جازا وتىرا جىر-داستاننان ءۇزىندىنى وقىپ بەرۋ كەزەگىن تالانتتى اكتەر بەكجان تۇرىسقا جولدايدى. ون ساۋساعىنان ونەر تامعان اعامىز ونى بىردەن قابىلداپ، ۇلتتىق رۋحتى كوتەرۋگە ارنالعان كەز كەلگەن باستامانى قولداۋعا دايىن ەكەندىگىن بايقاتتى. بەكجان تۇرىستان ەستافەتا العان ساكەن مايعازييەۆ ءۇنسىز قالسا دا، ەستافەتا ۇزىلمەدى. قالقامان سارين، بەرىك ءۋالي، ەرلان قارين بولىپ جالعاسىپ كەتە باردى.
العاشىندا «تۇلپار ءمىنىپ، تۋ العان» بايقاۋىنا قىزىعۋشىلىق تۋدىرۋعا سەپتىك بولار دەگەن ماقساتپەن جاريالانعان ەستافەتا اپ-ساتتە الەۋمەتتىك جەلىدە كەڭىنەن تارالىپ كەتتى. بايقاۋ ءوز مارەسىنە جەتىپ، جەڭىمپاز باياعىدا-اق انىقتالعانىمەن، ەستافەتا توقتاپ قالعان جوق. كەرىسىنشە اياسى كەڭەيىپ، استانانىڭ سول جاق جاعالاۋىنان ءبىر-اق شىقتى. مينيستر، اكىم-قارانىڭ دا شەت قالماي، بەلسەندىلىك تانىتقانى، ارينە، كوڭىل قۋانتادى. الايدا ادەتتەگىدەي ارتىق قىلامىن دەپ تىرتىق قىلعاندارى ەرىكسىز كۇلدىرەدى. سەبەبى ولاردىڭ ءبارى «الپامىس» جىرىن جاتقا بىلمەيتىندەرىن جاسىرا وتىرىپ، كىشكەنتاي ءبىر ءۇزىندىنى جاتقا وقىپ بەرە الماۋلارى الەۋمەتتىك جەلىدە قىزۋ تالقىلانۋدا. سولاردىڭ كەيبىرىن نازارىڭىزعا ۇسىنايىنشى. دەيدى حالىق:
Chingiz_primzhanov: «تەك ورىس ۇلتىنىڭ وكىلى تازا، ءمىنسىز ايتىپ شىقتى»
Zhanerke.abilkasym: «وقىپ تۇرىپ ءبىز دە ايتا الامىز-اۋ»
Tykhanov: «وقىعاننىڭ ماعىناسىن تۇسىنەتىن بولسا! ۇياتتان مىنانداي ىرعاقپەن وقىماس پا ەدى؟»
Meirambekbekkozhiev: «ۇيات قوي، مىناۋ ءبىرىنشى سىنىپتىڭ بالالارى سياقتى»
Sanzhar122: «ءبىزدىڭ مينيسترلەر پاراقتان ازەر وقىپ ءجۇر، ماسقارا!»
Bigarinchingiz: «اشۋ-ىزاعا تولى پىكىرلەر كوپ جازىلعان. قىزىق، وسىلار پىكىر وقي ما ەكەن؟»
Zhuldyzstar: «بالادان وزگەسى وقىپ تۇرعانداي كوزدەرى جۇگىرىپ تۇر»
Ryshkenovna_ : «ەرلان قارين، قىرىمبەك كوشەربايەۆ، م.شۋتوۆ 5 قويار ەدىم، ال قالعاندارىنا 3+»
ەستافەتانى جالعاۋ دەگەن ءسوز جىر-داستاندى مىندەتتى تۇردە جاتقا ايتىپ شىعۋ ەمەس. كىتاپقا قاراپ نەمەسە ۇيالىعا تەلمىرىپ وتىرىپ-اق ءۇزىندى وقىپ شىعۋعا بولادى. بۇل ەستافەتا كوزبوياۋشىلىق ءۇشىن ۇيىمداستىرىلعان جوق بولاتىن. وسىنى ەسكەرىپ، ەستافەتا جالعاۋدى كەزەكتى ناۋقانعا اينالدىرماۋ قاجەت ەدى. جەر جاستانعان قايسار مىنەزدى اتا-بابا رۋحىنا تاعزىم ەتە وتىرىپ، بار پەيىلمەن، شىن كوڭىلمەن، «الپامىستى» جىرلاۋ شارت بولاتىن. تاقپاق ايتقانداي تەز وقىپ شىعۋ، كەشىرەرسىزدەر، 4ء-شى سىنىپتا وقىپ جۇرگەن تەنتەكتىڭ ءىسى.
