بۇل تۋرالى بۇگىن «NurOtanTalks» ەركىن وي الاڭىندا ايتىلدى. تۇڭعىش پرەزيدەنت كۇنىنە ارنالعان ءىس-شارادا قاتىسۋشىلار «قازاقستاندى وزگەرتكەن باستامالار» تاقىرىبىندا اڭگىمە ءوربىتتى.

ءوز سوزىندە «نۇر وتان» پارتياسى ءتوراعاسىنىڭ ءبىرىنشى ورىنباسارى ەلباسى شەشىمدەرىنىڭ ەل دامۋىنداعى ءرولى مەن ماڭىزىنا توقتالدى. سونداي-اق ول ەلباسىمەن بىرگە جۇمىس ىستەۋدى وزىنە بەرىلگەن ۇلكەن مۇمكىندىك دەپ ەسەپتەيتىنىن ايتىپ، مەملەكەت باسشىسىنىڭ كوپكە ۇلگى بولارلىق باستى ءۇش قاسيەتىنە توقتالىپ ءوتتى.

– بىرىنشىدەن، ەلباسىنىڭ ۇنەمى ءوزىن ءوزى جەتىلدىرىپ، ىزدەنىپ، جاڭا، تىڭ باستامالاردى مەڭگەرۋدەگى تاباندىلىعىن ايرىقشا ايتقىم كەلەدى. بۇل – ناعىز كوشباسشىعا ءتان قاسيەت. ءبارىمىز، اسىرەسە جاستار ءدال وسى قاسيەتتى بويىمىزعا ءسىڭىرىپ، وزىمىزگە ۇلگى ەتۋىمىز كەرەك. ەكىنشى ەرەكشە قاسيەت رەتىندە ەلباسىنىڭ ايرىقشا جاۋاپكەرشىلىگى مەن وزىنە ءوزى جوعارى تالاپ قوياتىنىن اتاپ وتەر ەدىم. مەملەكەت باسشىسى كەز كەلگەن كەزدەسۋ مەن ءىس-شاراعا وتە تىڭعىلىقتى ءارى جان-جاقتى دايىندالادى. وزىمە ەرەكشە اسەر ەتكەن ەلباسىنىڭ كەلەسى قاسيەتى ۇقىپتىلىعى مەن مۇقياتتىلىعى. قانداي تىعىز جاعداي بولسا دا مەملەكەت باسشىسى بەلگىلەنگەن ءىس-شارالاردى ۋاقىتىندا باستايدى. بۇل – بۇگىندە بيلىك تۇتقاسىن ۇستاعان بارشا ازاماتتارعا ۇلگى بولاتىن قاسيەت. پرەزيدەنتىمىزدىڭ وسىنداي قاسيەتتەرىنەن ءوزىم دە كوپ نارسە ۇيرەنىپ، مول تاجىريبە جينادىم، – دەدى ماۋلەن اشىمبايەۆ.

سونىمەن قاتار «نۇر وتان» پارتياسى ءتوراعاسىنىڭ ءبىرىنشى ورىنباسارى ەلىمىزدىڭ دامۋىنا ەرەكشە ىقپال ەتكەن ەلباسىنىڭ اسا ماڭىزدى ءۇش ستراتەگيالىق باستاماسىن اتاپ ءوتتى. ونىڭ ايتۋىنشا، «بولاشاق» باعدارلاماسى، ەلوردامىزدىڭ الماتىدان استاناعا اۋىستىرىلۋى جانە «رۋحاني جاڭعىرۋ» باعدارلاماسى قازاقستاندى دامۋدىڭ جاڭا دەڭگەيىنە باستاعان باستامالار.

ءىس-شاراعا «ميلوسەرديە» قايىرىمدىلىق قورىنىڭ نەگىزىن قالاۋشى، قوعام بەلسەندىسى ارۋجان ساين، حالىقارالىق تۇركى اكادەمياسىنىڭ پرەزيدەنتى دارحان ءقىدىرالى جانە «ۇلتتىق كارديوحيرۋرگيالىق عىلىمي ورتالىعى» اق-نىڭ باسقارما ءتوراعاسى يۋريي پيا قاتىسىپ، ەلباسىمەن كەزدەسۋلەردەن العان اسەرلەرىمەن جانە تاقىرىپقا قاتىستى ويلارىمەن ءبولىستى.