مانەرلەپ سىرعاناۋدىڭ چەمپيونى گۇلجان ءجۇمادىلوۆا Startime كراۋدفاندينگ (حالىقتىڭ اقشا جيناپ بەرۋى، قازاقشالاپ ايتقاندا جىلۋ-رەد.) الاڭى ارقىلى قاجەتتى كيىمىنە اقشا جيناپ جاتىر ەكەن. ماسكەۋدە جاتتىعىپ جۇرگەن قىزىمىز 400 000 تەڭگە تۇراتىن جاڭا كانكي ساتىپ الۋعا قاۋقارسىز ەكەندىگىن جەتكىزدى. اگاراكي حالىقتىڭ كۇشىمەن جينالعان سوما مەجەدەن اسسا، گۇلجان ونەر كورسەتۋگە ارنالعان قاجەتتى كيىم-كەشەك ساتىپ الۋعا قارسى ەمەس.
قىسقاسى، شىعىندار مىناداي بولماق:
- مۇز – 75 000 تەڭگە ($200)
- كانكي – 400 000 تەڭگە ($1080)
- جاتتىقتىرۋشىنىڭ جۇمىسى– 150 000 تەڭگە ($400)
- كوستيۋم – 200 000 تەڭگە ($540)
بارشا وتانداستارىنا چەمپيون قىز ماسكەۋدە جۇرگەنىنە ءوز كولىگىن ساتقان قامقور اكەسىنىڭ الدىندا قارىزدار ەكەندىگىن ايتا وتىرا، ءوتىنىشىن بىلايشا جەتكىزدى: «ارمانىم – كانكي تەبۋ، شەت ەلدەردەگى سايىستاردا بوي كورسەتۋ، قازاقستاننىڭ ابىرويىن اسقاقتاتۋ، جاس سپورتشىلاردى شابىتتاندىرۋ. ماقساتىما جەتۋ ءۇشىن ماعان سىزدەر سياقتى جانى اشيتىن، مەيىرىمدى جانداردىڭ قول ۇشىن سوزعاندارى قاجەت».
بۇگىنگى تاڭدا 113 000 تەڭگەدەي قارجى جينالىپ ۇلگەردى. جىلدىڭ اياعى ياعني جەلتوقساننىڭ 31-نە دەيىن گۇلجان بارلىق قاراجات جينالادى دەپ ۇمىتتەنىپ وتىر. قاراپايىم وتباسىدان شىققان قازاق قىزى اقشانىڭ جوقتىعىنا قاراماستان سپورتتى تاستاعىسى كەلمەيدى. 16 جاسقا ەندى تولعان گۇلجان ءجۇمادىلوۆا كوپ اقشا تۇسسە، تيىنىنا دەيىن تەك سپورتقا قاجەتتى دۇنيەلەرگە جۇمسايتىنىن ايتتى. كامەلەتتىك جاسقا تولماعان دارىندى سپورتشىمىزدىڭ قاسىنان كۇندىز-تۇنى اناسى ءبىر ەلى قالمايدى ەكەن.
«مەن قازاقستانعا سپورتشى رەتىندە كەرەكپىن دەپ ويلايمىن. حالىقارالىق دەڭگەيلەردەگى سايىستاردا ماعان ءۇمىت ارتسا بولادى. اكە-شەشەم تىعىرىققا تىرەلدى. ماعان رەسەيلىك دەمەۋشىلەر رەسەيدىڭ اتىنان ونەر كورسەتۋگە قولقا سالىپ جاتىر. الايدا مەن ءوز وتانىمدى ساتقىم كەلمەيدى» دەدى گۇلجان.
ايگىلى سپورتشىمىز دەنيس تەننىڭ قازاسىنان كەيىن ەسەڭگىرەپ قالدىق. كانكي الەمىندە قازاقتىن اتىن دۇركىرەتىپ شىعارىپ جۇرگەن جالعىز ءوزى سياقتى كورىندى. دەنيستىڭ وكشەسىن باسىپ كەلە جاتقان گۇلجان جۇماعۇلوۆاعا ق ر مادەنيەت جانە سپورت ءمينيسترى ارىستانبەك مۇحامەدي ۇلى تاراپىنان قولداۋ كورسەتىلەدى دەگەن سەنىمدەمىز.
