رەسەيلىك چەمپيون حابيب نۇرماعامەدوۆ «وليمپييسكيي» ارەناسىنا جينالعان جانكۇيەرلەردىڭ سۇراقتارىنا جاۋاپ بەردى دەپ جازادى Qamshy.kz اقپارات اگەنتتىگى شەتەلدىك باق-تىڭ دەرەگىن نەگىزگە الدى. جەڭىل سالماقتاعى UFC چەمپيونى ءوزىنىڭ بالالىق شاعى تۋرالى ايتتى.
«مەن جاسىل كىلەمدە كۇرەسۋگە كىشەنتاي كەزىمنەن ماشىقتانعانمىن. مەنىڭ اكەم ۇيدە سپورتزال سالعان. مەن بوس ۋاقىتىمنىڭ بارلىعىن سول جەردە وتكىزەتىنمىن. مەن ءوزىمنىڭ بولاشاعىمدى سپورتپەن عانا ەلەستەتەتىنمىن. سەبەبى مەن اكەمنىڭ تاربيەسىن كورىپ ءوستىم. سەن ەشقاشان شىلىم شەگىپ تۇرىپ، ىشىمدىك ءىشىپ تۇرىپ نەمەسە ۇيدە بوس جاتىپ الىپ بالاڭا سپورتزالعا بار، چەمپيون بول دەپ ايتۋعا حاقىڭ جوق. ءوزىڭ ءوز ۇلىڭا ۇلگى بەرۋىڭ كەرەك. مەنىڭ باسقا بالالارعا قاراعاندا جولىم بولدى. مەن كەز كەلگەن جاعدايدا، كەز كەلگەن باستامادا اكەمنەن ۇلگى الاتىنمىن»، دەپ ءسوز باستالدى حابيب. سونىمەن بىرگە ول قازىرگى جاستاردىڭ نەگىزگى پروبلەماسى تۋرالى دا ايتىپ ءوتتى.
«قازىرگى كەزدە جاستاردىڭ ەڭ ۇلكەن قاتەلىگىنە سەبەپ بولاتىن دۇنيە – بوس ۋاقىت. بالالاردا ەشقاشان بوس ۋاقىت دەگەن بولماۋى كەرەك. مەن ساباقتان كەيىن بوس ۋاقىتىم بولىپ قالسا، اكەم ۇنەمى ءبىر جۇمىس تاۋىپ بەرەتىن. باسقا پايدالى جۇمىستاردى جاساۋدى مىندەتتەپ، ءتىپتى ماجبۇرلەيتىن. ماجبۇرلەگەنى دۇرىس بولدى. سەبەبى 17 جاسقا كەلگەن جەتكىنشەك چەمپيون بولۋدى ارماندايدى، سپورتزالدا جاتتىعادى. الايدا كەي كەزدە باسقا دا بالالار سەكىلدى قىدىرىپ، بۇزىقتىق جاساعىسى كەلىپ تۇراتىن ساتتەر دە بولادى عوي. سول كەزدە اكەم مەنى باقىلاۋدا ۇستادى. ونسىز مەن مۇنداي جەتىستىككە جەتە الماس تا ەدىم. ەگەر ءبىر ماقسات قويساڭ 100 پايىز نازارىڭىندى سول ماقساتقا اۋدارۋىڭ قاجەت»، دەيدى حابيب نۇرماعامەدوۆ.
نۇرماعامەدوۆ ءوزىنىڭ كاسىبي مانسابىندا ەشقاشان جەڭىلىپ كورمەگەن. الايدا چەمپيون وزىندە قورقىنىش سەزىمى بولاتىنىن جاسىرمادى.
«قۇداي ءبىزدى قورقىنىش سەزىمىمەن بىرگە جاراتتى. سول سەبەپتى قورقىنىش مەن دە بار. ونى جاسىرمايمىن. ءبىراق، سول قورقىنىشتى جەڭە بىلگەن ادام عانا مىقتى بولادى. ەگەر قورقىنىش سەزىمى قارسى كەلسە سەن ونىڭ دەگەنىنە كونەسىڭ نەمەسە ونى جەڭەسىڭ. تاڭداۋ ءوز ەركىڭدە. سپورتتا دا جەتىستىككە جەتۋدىڭ سىرى دا وسى بولىپ سانالادى. اركىمدە ءارتۇرلى قورقىنىش بولادى. بىرەۋلەر اقشاسىن جوعالتۋدان، دەنساۋلىعىنان ايىرىلۋدان قورقادى. مەن سپورت ءۇشىن ءوز دەنساۋلىعىمدى قۇربان ەتكىم كەلمەگەن. الايدا قۇربان ەتتىم. سەبەبى نەشە ءتۇرلى جاراقاتتار، وپەراسيالار بولدى. 2015 جىلى ءۇشىنشى وپەراسيا كەزىندە مەن اكەمە « مۇمكىن بۇل قۇدايدىڭ بىزگە توقتات دەگەن بەلگىسى بولار؟»، - دەدىم. ال اكەم بولسا «سىناق ادامعا باس تارتپاۋ ءۇشىن، بەرىلمەي، العا جىلجۋ ءۇشىن بەرىلەدى. تۇر دا جۇمىسقا كىرىس» دەپ جاۋاپ بەردى.
ەسكە سالساق، UFC چەمپيونى حابيب نۇرماعامەدوۆ ءوزىنىڭ «Khabibtime» اۆتوبيوگرافيالىق كىتابىنىڭ تانىستىرىلىمىن وتكىزدى. اۆتوبيوگرافيالىق كىتاپ 10 جەلتوقساننان باستاپ وقىرمان نازارىنا ۇسىنىلادى.
