وسى جىلدىڭ جاز ايىندا بولعان ءۇش ازاماتتىڭ ءولىمى ەلدى ەسەڭگىرەتكەن قايعىلى وقيعا بولدى. الماتى وبلىسى، شەلەك اۋىلىنىڭ اۋرۋحانا اۋلاسىنداعى كارىز قۇدىعىن تازالاۋ كەزىندە اپتالداي ازاماتتار اجال قۇشتى. وعان سەبەپ قاراپايىم قاۋىپسىزدىكتىڭ ساقتالماۋى. اۋرۋحانا قىزمەتكەرلەرىنىڭ سالعىرتتىعى، نەمقۇرايلىلىعى. ەگەر 6 مىڭ تەڭگەنى قيىپ، تولىپ قالعان قۇبىردى ارنايى كولىكپەن سورعىزعاندا مۇنداي جاعداي بولماس ەدى.

ال، ولار سول جەردە ءارتۇرلى جۇمىستىڭ بەساسپابى ءومىرباي مەن ەرمەك اعالارىمىزدى جۇمسايدى. قارعىس اتقىر "قارا شۇڭقىردى" اشىپ، تازالاعاندا ابدەن توزىعى جەتكەن قۇبىر جارىلادى، قۇدىق بۇكىل كارىزدەگى لاس سۋعا تولادى. جينالىپ قالعان مەتان گازىنا ەكى سانتەحنيك ۋلانادى. اۋرۋحانا الدىندا تۇرعان حيرۋرگ جاندوس وتەمىسوۆ "دارىگەرلەر قۇتقارىڭدار" دەگەن داۋىستان شۇڭقىرعا جانۇشىرا كومەككە ۇمتىلىپ، ءتۇسىپ كەتكەنىن عانا بىلەدى. ول كەزدە حيرۋرگ- تراۆماتولوگ دانيار مەرگەنبايەۆ جۇمىستا ىشتە وتىرعان. ۇيالى تەلەفوننىڭ ار جاعىنان "جاندوسقا كومەك كەرەك" دەگەن داۋىستان دالاعا اتىپ شىعادى دا، ەش ويلانباستان:" مەن دوسىمدى قۇتقارۋىم كەرەك" دەپ جۇمىس كيىمىن ۇستاتا سالا، قويىپ كەتكەن. جاندوستى جوعارى كوتەرىپ، لاس سۋدان باسىن شىعارعان دانيار ءوزى گازعا ۋلانىپ، ەسىن جوعالتىپ، تومەنگە شوگىپ كەتەدى. ال ونىڭ تەرەڭدىگى ءۇش مەتردەن كەم ەمەس. قۇتقارۋشى توپ كەلگەنشە ءبىراز ۋاقىت ءوتىپ كەتكەن. ءبارى دە كەش... قايران، اسىل ازاماتتار-اي، رەانيماسيا توسەگىندە تىلگە كەلمەستەن جان تاپسىردى.

ءۇش بىردەي وتباسى اۋىر قايعى جامىلدى. اكە سۇيىكتى ۇلىنان، بالالارى اكەسىنەن، جۇبايلارى قوساقتارىنان، اعا-ىنىلەرى باۋىر ەتى باۋىرىنان، تۋعان-تۋىس جاقىندارىنان اياق استىنان ايىرىلدى.

دانيار نۇرسالبەك ۇلى – بەيبىت زاماننىڭ باتىرى. ول ادال دوس بولا ءبىلدى، ولىمگە باسىن تىگىپ، جاندوستى قۇتقاردى. اللاعا شۇكىر، جاندوس امان قالدى. ءبىراق ۇزاق ەمدەلۋى قاجەت. بويىنداعى ۋلى زاتتاردى شىعارىپ تاستاۋ بىرنەشە جىلدىڭ ەنشىسىندە. دانيار مەن جاندوستى تاعدىر جۇمىستا تابىستىردى، جۇمىستا بىر-بىرىنەن ماڭگىلىككە اجىراتتى. ازىلدەرى جاراسقان، سىرلاس تا سىيلاس دوس، قيماس باۋىرعا اينالعان ەدى. 

دانيار شەلەك اۋىلىنىڭ اۋرۋحاناسىندا جەتى جىلدان استام ۋاقىت قىزمەت اتقارىپ كەلدى. اناسى ءسۇت كەنجەسى، ەركەتايىن جولىمدى قۋىپ دارىگەر بولسىن دەپ كوللەدجگە ودان ءارى ۋنيۆەرسيتەتكە تۇسىرەدى. ساباقتى دا جاقسى وقىپ، اقىلى بولىمنەن ءوز كۇشىمەن گرانتقا اۋىسىپ، اتا-اناسىنىڭ تىلەگىن ورىنداپ بولاشاققا سەنىممەن قادام باسقان. گيپپوكرات انتىنا بەرىك، ءوز ماماندىعىن جانى سۇيەتىن مىقتى ءارى بىلىكتى مامان بولدى. اۋرۋحانادان تراۆماتولوگيا ءبولىمىن اشىپ، سوڭعى ۇلگىدەگى اپپاراتتارمەن جابدىقتاپ، حالقىنا قالتىقسىز قىزمەت ەتۋدى الدىنا ماقسات تۇتتى.

شەلەك اۋىلى قارا جولدىڭ ۇستىندە بولعاندىقتان ءجيى جول اپاتتارى بولىپ تۇرادى. ءتۇرلى جاراقاتتارمەن، سىنىقتارمەن تۇسكەن ادامدارعا العاشقى كومەك جاسالسا دا، دەر كەزىندە ەم الىپ شىعۋىنا مۇمكىندىك جوق، ەمدەيتىن دارى-دارمەك، اپپاراتتاردىڭ جوعى قولدى بايلايتىن. امالسىزدان جاعدايى اۋىر اۋرۋلاردى شەلەكتەن 80 شاقىرىم قاشىقتىقتاعى ەسىك اۋداندىق اۋرۋحاناسىنا جىبەرەتىن. وسى ولقىلىقتاردى دانيار جويعىسى كەلدى. تالاي رەت باس ديرەكتوردىڭ الدىنا كۇرمەۋى قيىن ماسەلەنىنىڭ باسىن شەشىپ بەرۋدى وتىنگەن دە ەدى... امان بولعاندا دەنساۋلىق سالاسىندا تالاي يگى ىستەردىڭ ۇيىتقىسى بولىپ، ەلىنىڭ ارداقتى ازاماتىنا اينالار ەدى-اۋ. اتتەڭ، ءومىرى شورت ءۇزىلدى...

وسى قايعىلى وقيعاعا بايلانىستى اۋرۋحانا قىزمەتكەرلەرى مەن اۋىل اقساقالدارى، تۇرعىندارى دانيار نۇرسالبەكۇلىنا رەسپۋبليكامىزدا توتەنشە جاعدايلاردا ادام ءومىرىن قۇتقارۋعا بايلانىستى جانقيارلىق ەرلىك كورسەتكەندەرگە "ەرلىگى ءۇشىن" مەدالىمەن ماراپاتتاۋدى، سونىمەن قاتار، "اۋداننىڭ قۇرمەتتى ازاماتى" اتاعىن بەرۋدى، سونىمەن قاتار، شەلەك اۋىلىنان كوشە اتى بەرىلسە ەكەن دەپ جوعارعى جاققا ءوتىنىش جازدى."دانيار – وتە اقكوڭىل، كوپشىل، مەيىرىمدى، جىلدام شەشىم شىعاراتىن جاقسى دارىگەر، ءبىلىمدى مامان بولدى. كوزسىز ەرلىكتىڭ يەسى اتاۋسىز قالماۋ كەرەك. ونىڭ ءىسى كوپكە ونەگە، ءوز جانىن اياماي قۇربان بولعان ازاماتتىڭ اتى ۇرپاق جۇرەگىندە ماڭگىگە قالۋى كەرەك،"- دەيدى اۋرۋحانا قىزمەتكەرلەرى. باتىر ازاماتتىڭ ارتىندا اڭىراپ اكەسى، باۋىرلارى، كوزدەرى جاۋتەڭدەگەن ەكى قىزى مەن سۇيىكتى جارى جەسىر قالدى.   

سالتانات باكەيەۆا