الماتىنىڭ المالى اۋداندىق سوتىندا "جيھادشىلار" ءىسى بويىنشا سوتتالىپ جاتقان المات جۇماعۇلوۆ پەن ورالبەك ءومىروۆ وزدەرىن "جازىقسىز سوتتاۋعا" قارسىلىق تانىتىپ، كوكتامىرلارىن تىلگەن. بۇل جونىندە سوت زالىنان ادۆوكاتى گۇلنارا جۋاسپايەۆا حابارلادى دەپ جازادى centralasian.org.

- المالى اۋداندىق سوتىندا سۋديا ءارىپوۆ ادۆوكاتتىڭ ءوتىنىشىن قاناعاتتاندىرۋدان باس تارتۋ شەشىمىن وقىپ جاتقاندا ارتىمىزدان شۋ شىقتى. ءومىروۆ پەن جۇماعۇلوۆ قولدارىن ءتىلىپ تاستاپتى، - دەدى جۋاسپايەۆا.

بەلسەندىلەردىڭ سوتتان الەۋمەتتىك جەلىدەن تاراتقان تىكەلەي ەفيرىندە المات جۇماعۇلوۆ پەن ورالبەك ءومىروۆ "تەرگەۋ مەن سوت پروسەسى بارىسىندا قۇقىقتارى بۇزىلعانىن" مالىمدەپ، الدەبىر تەمىرمەن قولدارىنىڭ بىلەكتەن شىنتاققا دەيىنگى تۇسىن ءار جەردەن تىلگەنى كورىنەدى. ءومىروۆتىڭ ەكى قولى، جۇماعۇلوۆتىڭ سول قولى قانعا بويالعان.

ولار وزدەرىن توقتاتپاق بولعان سوت قاراۋىلدارىنان جاقىنداماۋدى، جاقىن كەلسە، قولدارىن تاعى دا كەسەتىنىن ەسكەرتتى. بۇدان سوڭ ولار وزدەرىنىڭ قىلمىستىق ارەكەتتەرى "دالەلدەنبەگەنىن"، "جازىقسىز سوتتاپ، وزىنە قول سالۋعا ماجبۇرلەپ وتىرعانىن" ايتتى. ولار سوتتا پروكۋرور مەن جەدەل جاردەم قىزمەتىن كەلتىرۋدى تالاپ ەتتى.

سوتتالۋشىلار جيھادشىلار تۋرالى روليكتى وزدەرىنە قارسى كۋالىك بەرگەن اسحات ءشاربات ءتۇسىرىپ، تاراتقانىن، ول ۆيدەوعا وزدەرىنىڭ قاتىسى جوعى ساراپتامادا دالەلدەنگەنىن ايتتى.

ولار وسىعان بايلانىستى اسحات ءشارباتتى جاۋاپقا تارتۋدى تالاپ ەتەدى.

الماتىلىق ءۇش تۇرعىن - 51 جاستاعى كەنجەبەك ابىشيەۆ، 47 جاستاعى ورالبەك ءومىروۆ جانە 43 جاستاعى المات جۇماعۇلوۆتى 2017 جىلى قاراشادا پوليسيا "تەرروريزم اكتىسىن جاساۋعا جاريا تۇردە شاقىرۋدى تەكسەرۋ" دەپ اتاعان ءىس اياسىندا ۇستاعان. بىلتىر قاراشانىڭ 28ء-ى كۇنى ۇشەۋى قاماۋعا الىنىپ، كەيىن ولاردى قاماۋدا ۇستاۋ مەرزىمى بىرنەشە رەت ۇزارتىلعان. المات جۇماعۇلوۆ قازاقستان پرەزيدەنتى نۇرسۇلتان نازاربايەۆتى سىناپ جۇرگەن بۇرىنعى بانكير مۇحتار ءابليازوۆ باسقاراتىن جانە بيىل ناۋرىزدا استانانىڭ ەسىل اۋداندىق سوتى "ەكسترەميستىك ۇيىم" دەپ تانىپ، قىزمەتىنە تىيىم سالعان "قازاقستاننىڭ دەموكراتيالىق تاڭداۋى" (قدت) وپپوزيسيالىق قوزعالىسى ۇنايتىنىن اشىق ايتادى. ال كەنجەبەك ابىشيەۆ "قدت-دا شارۋام جوق، وعان ەش قاتىسىم جوق" دەپ مالىمدەيدى.

قازاقستاندىق قۇقىق قورعاۋ ۇيىمدارى بۇعان دەيىن ابىشيەۆ پەن جۇماعۇلوۆتى "ساياسي تۇتقىن" دەپ تانىعان. بيلىك بۇل قوعامدىق-ساياسي ستاتۋسقا قاتىستى كوممەنتاريي بەرمەيدى.