«نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ پارتيا مەن ەڭبەك جانە حالىقتى الەۋمەتتىك قورعاۋ مينيسترلىگىنىڭ ۇيىمداستىرۋىمەن وتكەن «قازاقستاننىڭ ۇزدىك الەۋمەتتىك جوبالارى» بايقاۋىنىڭ جەڭىمپازى جايلى ۆيدەو روليك كورسەتتى.

ونداعان روليكتىڭ ىشىنەن كوميسسيا الماتى قالاسىنىڭ تۇرعىنى راسيما تەمىربايەۆانىڭ جوباسىنا ەرەكشە نازار اۋداردى.

راسيما قادىر قىزى بىرنەشە جىلدان بەرى زەينەتكەرلەرگە ارناپ تەگىن تۇسكى اس دايىندايدى. جوبا اۆتورىنىڭ ايتۋىنشا، ماقساتى – ادامداردى تەگىن تاماقتاندىرۋ عانا ەمەس. زەينەت جاستاعى قاريالاردىڭ كوبىسى جالعىز. ال تەگىن اسقا جينالعاندار بىر-بىرىمەن ارالاسىپ، ءتانىسىپ-بىلىسىپ قالسا – راسيما حانىمنىڭ ماقساتىنىڭ ورىندالعانى.

راسيما قادىر قىزى العاشىندا جوباسىن نەبارى 20 تۇسكى استان باستاعان. ال بۇگىن ايەل الەۋمەتتىك جاعدايى تومەن 130 ادامدى تاماقتاندىرىپ وتىر.

«راسيما تەمرىبايەۆا – الەم ءۇشىن جاقسىلىق جاساعىسى كەلىپ جۇرگەن ادامدار ءۇشىن ۇلگى. جالپى ەلىمىزدە كومەككە مۇقتاج جاندارعا قول ۇشىن سوزۋعا دايار ادام كوپ. ءبىزدىڭ پارتيا مۇنداي جوبالاردى قولداۋعا قاشان دا دايىن»، - دەدى ماۋلەن اشىمبايەۆ.

ايتا كەتەيىك، الماتى قالاسىنىڭ اكىمدىگى مەن “نۇر وتان” پارتياسىنىڭ اۋماقتىق فيليالى “قازاقستاننىڭ ۇزدىك الەۋمەتتىك جوبالارى” بايقاۋىن ۇيىمداستىرۋعا بيىل دا اتسالىستى. ماقسات – “پرەزيدەنتتىڭ بەس الەۋمەتتىك باستاماسى” اتتى ۇندەۋدە ايتىلعان مىندەتتەردى ىسكە اسىرۋ، مۇمكىندىگى شەكتەۋلى جاستار قۇقىعىن قورعاۋ جانە ولاردىڭ ءومىر ءسۇرۋ دەڭگەيىن جاقسارتۋ.

بايقاۋ 20 ساۋىردە جاريالانىپ، 30 ماۋسىمدا ءوتىنىش قابىلداۋ اياقتالدى.

الدىمەن بايقاۋدىڭ اۋماقتىق ىرىكتەۋ سىنى ءوتتى، ودان ىرىكتەلگەندەر وڭىرلىك بايقاۋعا قاتىسادى. وڭىرلىك كەزەڭنىڭ جەڭىمپازدارى 31 شىلدەگە دەيىن انىقتالادى. بۇدان سوڭ ۇزدىكتەردىڭ ۇزدىگى رەسپۋبليكالىق سىندا بەلگىلى بولادى.

ايتا كەتەيىك، 1-ورىندى «زەينەتكەرلەرگە تەگىن تۇسكى اس» جوباسىمەن قاتىسقان ءراسيما تەمىربايەۆا الدى. «بۇل – بارلىق قايىرىمدى جاننىڭ جەمىسى»،  - دەدى جەڭىمپاز ءوز سوزىندە. ال ەكىنشى ورىندى «ارباداعى كەدەرگىسىز ءومىر» جوباسىمەن قاتىسقان نۇربولات قاراباسوۆ جانە «ەل نازى» ارت-تەراپيامەن دامىتۋ ورتالىعى جوباسىمەن قاتىسقان بەلگىلى ءانشى كەنجەبەك ءجانابىلوۆ الدى. ءانشىنىڭ ۇلىنىڭ ەستۋ قابىلەتى تومەن بولعاندىقتان ەم ىزدەپ الەم شارلاعان. ءتيىستى وپەراسيا ءساتتى وتكەندىكتەن بالاسى بۇگىن دە جازا دا، وقي دا الادى. مۇندايدى باسىنان وتكەرگەن كەنجەبەك ءجانابىلوۆتىڭ ءوزى دە باسقا اتا-انالارعا كومەكتەسۋدى ماقسات ەتەدى. ءسويتىپ «ەل نازى» اتتى جوباسىن جاساپ شىعارادى.

3-ورىندى «مەيكاتون «TOM: Kazakhstan» جوبالارىمەن مارجان مادييەۆا جانە ءسانيا اراپوۆا يەمدەندى. ماڭعىستاۋلىق ارۋلار «ءۇمىت ساۋلەسى» اتتى اۆتورلىق تەلەباعدارلامالار ارقىلى سوڭعى 11 جىلدا تالاي جانعا كومەك قولىن سوزىپ كەلەدى. اسىرەسە، جالعىز قالعان قاريالار مەن اتا-انانىڭ قامقورلىعىنسىز قالعان بالالارعا وسى باعدارلامانىڭ ارقاسىندا تىعىرىقتان شىعار جول تابۋعا كومەكتەسكەن.

بۇدان بولەك داۋىس بەرۋ ناتيجەسى بويىنشا ارنايى سىيلىقتار تابىستالدى.

«قازىرگى تاڭدا ىزگىلىك پەن مەيىرىمنىڭ دانەگىن سەۋىپ جۇرگەن وسىنداي جوبالاردى كەڭىنەن دارىپتەۋدىڭ بەرەرى مول. سوندىقتان پارتيامىز الداعى ۋاقىتتا دا بۇل باعىتتاعى جۇمىستارىن ودان ءارى جالعاستىراتىن بولادى. سەبەبى، قۇرمەت، ىزگىلىك، قامقورلىق سياقتى ادامي قاسيەتتەرگە نەگىزدەلگەن مۇنداي جوبالاردىڭ ماڭىزى قاشاندا جوعارى. ويتكەنى، الەمدى مەيىرىم قۇتقارادى. سوندىقتان ءارقايسىمىز قاسىمىزدا جۇرگەن جانعا مەيىرىم سىيلاپ، وسى ءبىر اسىل قاسيەتتىڭ اياسىن كەڭەيتۋگە اتسالىسايىق»، - دەگەن ەدى ماۋلەن اشىمبايەۆ.