جۇڭگو ميللياردەرى، الەمدەگى ەڭ ءىرى Alibaba ينتەرنەت-كومپانياسىنىڭ نەگىزىن قالاعان دجەك ما قىتايداعى كوممۋنيستىك پارتياسىنا مۇشە بولىپ كىرگەن ەكەن. بۇل تۋرالى “جەنمين جيباو» باسىلىمى حابارلادى. الايدا اقشاسى تاسىپ تۇرعان كاسىپكەرگە پارتيانىڭ قۇرامىنا كىرۋ قانشالىقتى قاجەت بولدى؟ .

باسىلىم مالىمەتىنە سايكەس، پارتياعا مۇشە ازاماتتاردىڭ تىزىمىنە 100 ادام ەنگەن، ولاردىڭ ءبارى رەفورما ساياساتىنا ءوز ۇلەستەرىن قوسقاندار. ال دجەك ما قىتايداعى كوممۋنيستىك پارتيانىڭ مۇشەسى رەتىندە تانىلدى. پارتياعا ءدال قاي ۋاقىتتا كىرگەنى ايتىلماعان.

بۇگىندە مانىڭ بايلىعى 36،6 ميلليارد دوللارعا باعالانعان. قىتايداعى ەڭ باي ادامداردىڭ تىزىمىندە ءۇشىنشى ورىندا تۇر.

«ونىڭ باستاماسىمەن قۇرىلعان Alibaba ينتەرنەت-كومپانياسى الەم بويىنشا ءىرى وندىقتىڭ قاتارىنا ەندى. سول كومپانيانىڭ ارقاسىندا جۇڭگو بۇگىندە ەلەكتروندى ساۋدا يندۋسترياسى جوعارى دامىعان بىردەن ءبىر مەملەكەت»، - دەپ جازدى «جەنمين جيباو».

سونىمەن قاتار، بۇل تىزىمدە Baidu كومپانياسىنىڭ باس ديرەكتورى روبين لي مەن Tencent تەلەكوممۋنيكاسيا كومپانياسىنىڭ ءتوراعاسى ما حۋاتەنگ بار.

ال ەندى سۇراق مىنادا. دجەك مانىڭ كومپارتيا قۇرامىنا مۇشە بولعانىن جۇڭگو كوممۋنيستىك پارتياسى نەگە ءدال ءقازىر حابارلاۋدى ءجون كوردى، Alibaba باسشىسى پارتيا قۇرامىندا نە ىستەپ ءجۇر، قانداي قاجەتتىلىك تۋدى؟

شي ءجينپيننىڭ بيلىگى تۇسىندا بيزنەس پەن ساياسات اراسىنداعى شەكارانىڭ بىرىگەتىن ءتۇرى جوق. ساراپشى ءارى بيزنەسمەن مارك ناتكيننىڭ ايتۋىنشا، جۇڭگو بيلىگى ومىردە دە، ەكونوميكادا دا پارتيانىڭ ماڭىزى جوعارى بولعانىن قالايدى.

«جۇڭگو بيلىگى ەلدەگى ءىرى ينتەرنەت-كومپانيالاردى ساياسي باستامالارى ءۇشىن ءتيىمدى قۇرال رەتىندە پايدالانىپ ءجۇر. پارتياعا مۇشە بولىپ كىرگەن ادام وعان بارىن ارنايدى. ونىڭ ۇستىنە پارتيا مۇشەلىگى سىزدەن جوعارى ساياسي بەلسەندىلىكتى تالاپ ەتپەيدى»، - دەدى مارك ناتكين.

قىركۇيەكتى دجەك ما ءوزىنىڭ لاۋازىمىنان باس تارتىپ، زەينەتكە شىعاتىنىن مالىمدەگەن. ونىڭ ورىنتاعى كومپانيانىڭ اتقارۋشى ديرەكتورى دەنيەل چجانعا بۇيىرادى.

دجەك ما بۇعان دەيىن دە بيزنەسىن وزگەنىڭ قولىنا تابىستاپ، قايىرىمدىلىقپەن اينالىسقىسى كەلەتىنىن تالاي مارتە ايتقان. ءتىپتى ۇستازدىق ەتۋ تۋرالى جوسپارىنىڭ دا بار ەكەنىن ايتقان ەدى.

دجەك مانىڭ اتىمەن اشىلعان قور قىتايدىڭ كەي اۋداندارىندا ءبىلىم بەرۋ باعدارلامالارىمەن اينالىسادى.

دجەك ما دەگەن كىم؟

♦35 جاستا بايىماساڭ، ۋاقىتتىڭ بەكەر وتكەنى. دجەك مادان 30 پايدالى كەڭەس

مەزگىلىنەن بۇرىن ءارى ءوز ەركىمەن زەينەتكە شىققان باسشى... قۇلاعىڭىزعا تۇرپىدەي ەستىلىپ تۇر ما؟ قىتايدا كومپانيا پرەزيدەنتى 54 جاسىنا زەينەتكە شىعىپ، قالعان ءومىرىن جان تىنىشتىعىنا ارناماق. ول ميللياردتان استام تۇرعىنى بار قىتايدىڭ ەڭ باي ادامى.

10 قىركۇيەك Alibaba كومپانياسىنىڭ پرەزيدەنتى  دجەك ما 54 جاسقا تولدى. سونىمەن قاتار ول كۇنى قىتايدا «مۇعالىمدەر كۇنىن» تويلايدى ەكەن. Alibaba كومپانياسىنا دەيىن دجەك ما اعىلشىن تىلىنەن ساباق بەرگەن. زەينەتكە شىققاننان كەيىن دە ەندىگى ومىرىندە ۇستازدىق ەتۋگە بەل بۋىپتى. ءارى قايىرىمدىلىقپەن اينالىسۋدى نيەت ەتىپ وتىر. ءدال قىركۇيەكتىڭ 10-ى، ۇستازدار مەرەكەسىندە زەينەتكە شىعىپ، ۇستازدىق جولدى تاڭداۋى دا بەكەر ەمەس بولار. دجەك ما بۇل كۇندى ادەيى تاڭدادى ما الدە سايكەستىك پە، بەلگىسىز، الايدا ۇلى ادامنىڭ ومىرىندە ءساتتى سايكەستىكتەردىڭ ءجيى ورىن الۋىن ءوز باسىم «عاجاپ» دەر ەم.

دەي تۇرعانمەن ميللياردەر ءبىر عاسىردىڭ جارتى عۇمىرىندا بار بايلىعىن، جيعان-تەرگەنىن وزگە بىرەۋگە «وپ-وڭاي» قالدىرىپ كەتكەنىنە ءسىز دە تاڭىرقاپ قالعان بولارسىز. ءوزى بۇل ارەكەتىن تۇسىندىرۋگە تىرىسىپتى. ايتۋىنشا، قايىرىمدىلىق ءىس پەن ۇستازدىق ەتۋدەن وزگە دە سەبەپتەرى بار.

The New York Times باسىلىمىنىڭ دەرەگىنە سۇيەنسەك، ما قىتايداعى ىسكەرلىك ورتاعا كوڭىلى تولمايدى. مەملەكەتتىك كاسىپورىندار جەكە كومپانيالاردىڭ جۇمىسىنا بوگەت كەلتىرەدى. ال ءوزىنىڭ زەينەتكە شىعۋىن دجەك ما «جاڭا ءداۋىردىڭ باستاماسى» دەپ سانايدى.

Forbes دجەك مانىڭ بايلىعىن  $36،6 ملرد-قا ەسەپتەپ بەردى. 1999 جىلى اشىلعان كومپانياسى بۇگىندە الەمنىڭ ەڭ ءىرى ريتەيلەرلەرىنىڭ بىرىنە اينالىپ وتىر.

Bloomberg TV ارناسىنا بەرگەن سۇحباتىندا ميللياردەر قايىرىمدىلىقپەن اينالىسقىسى كەلەتىنىن ايتىپتى. كومپانيادان كەتكەن سوڭ ءبىلىم بەرۋ جوبالارىن قارجىلاندىراتىن قور اشقىسى كەلەدى. بيلل گەيتستىڭ ىزىمەن ءجۇرۋدى قالايدى.

ايتا كەتەيىك، Microsoft Word باعدارلاماسىنىڭ نەگىزىن قالاۋشى بيلل گەيتس 2015 جىلى افريكاعا بارعان ساپارىنان كەيىن قايىرىمدىلىق قورىمەن اينالىسقىسى كەلەتىنىن ايتقان. ونىڭ ويىنشا، دامىماي قالعان مەملەكەتتەرگە جوعارى تەحنولوگيا ەمەس، تاماق پەن دارى-دارمەك كەرەك.