بقو-دا ح.بوكەيەۆا اتىنداعى باتىس قازاقستان وبلىستىق دراما تەاترىندا "ازاماتتىق باستامالاردى قولداۋ ورتالىعى" مەن ق ر قوعامدىق دامۋ مينيسترلىگىڭ قولداۋىمەن "ادىرنا" ۇلتتىق-ەتنوگرافيالىق بىرلەستىگى جۇزەگە اسىرعان قازاقستان جاستارىن الەۋمەتتەندىرۋگە باعىتتالعان JasQZ جوباسىن قورىتىندىلاۋ بويىنشا سالتاناتتى شارا ءوتتى.

JasQZ جوباسى اياسىندا ۇيىمداستىرىلعان "مەنىڭ تاڭداۋىم" بايقاۋى 6 باعىتتان ("ۇلتتىق قۇندىلىق"، "اسكەري-پاتريوتتىق"، "زياتكەرلىك"، "شىعارماشىلىق"، "الەۋمەتتىك بەلسەندىلىك"، "سپورتتىق") تۇردى. وندا باتىس قازاقستان وبلىسىنىڭ 9-11 سىنىپ وقۋشىلارى مەن جوعارى وقۋ ورنى ستۋدەنتتەرى 6 باعىتتىڭ ءبىرىن تاڭداپ، ءوزارا باسەكەگە ءتۇستى.

قورىتىندى شاراعا "ازاماتتىق باستامالاردى قولداۋ ورتالىعى" باسقارما ءتوراعاسىنىڭ ورىنباسارى ورالوۆا گۇلنار ءالىمجان قىزى ارنايى كەلىپ قاتىسىپ، قۇتتىقتاۋ ءسوز سويلەدى. بايقاۋ جەڭىمپازدارىن ەلىمىزگە بەلگىلى ءامىرجان قوسانوۆ، راسۋل جۇمالى سىندى قوعام قايراتكەرلەرى تابىستادى. وسى ورايدا ساياساتكەر ءامىرجان قوسانوۆتان شارا جايلى پىكىرىن بىلدىك.

- JAS.QZ جوباسى نەسىمەن ەرەكشە؟
- بۇل جوبادا زامان تالاپتارىنا ساي كوپتەگەن كريتەرييلەردى كورىپ وتىرمىن: جاڭاشىلدىق، كرەاتيۆتىلىك، تابيعيلىق. ماعان، اسىرەسە، جوبانىڭ اۋىل-ايماقتىق سيپاتى ەرەكشە ۇنادى: جوبا وكىلدەرى وبلىستىڭ بارلىق اۋداندارىنا ءوز اياعىمەن بارىپ، تالماي-شارشاماي ارالاپ، جاستار اراسىندا ىرىكتەۋ جۇمىستارىن جۇرگىزگەن! «ەل ءىشى – تالانت كەنىشى» ەكەنىن ەسكەرسەك، مۇنداي باستاما اسا قۇندى ءارى مەملەكەتتىك ساياساتتى جاستارعا جاقىنداتا تۇسەدى!

- جاستاردى الەۋمەتتەندىرۋ بويىنشا قانداي شارالار ۇيىمداستىرۋعا شاقىرار ەدىڭىز؟
التى باعىت بويىنشا سىناقتار وتكىزۋدىڭ ءوزى نە تۇرادى! "الەۋمەتتەندىرۋ" دەگەن مەن ءۇشىن، ەڭ الدىمەن، قازىرگى، قيىن-قىستاۋ، ءبىلىم الۋ مەن جۇمىس تابۋ سەكىلدى شارۋانىڭ مەيلىنشە كۇردەلەنىپ كەتكەن زامانعا بەيىمدەلۋ، «زامانىڭ تۇلكى بولسا، تازى بوپ شال» ءپرينسيپىنىڭ ناقتى تۇردە جۇزەگە اسىرىلۋى. سوندىقتان دا ناقتى ماماندىققا، نارىقتىق ەكونوميكانىڭ ومىردە كەزدەسەتىن تالاپتارىنا قاتىستى سىناقتار مەن بايقاۋلاردى كوبەيتۋ كەرەك دەپ ويلايمىن. اسىرەسە، عىلىم مەن ءبىلىم، جاڭا تەحنولوگيالار مەن زاماناۋي ماماندىقتار مەن كاسىپتەرگە ارنالعان تۇستارىن كوبىرەك ناسيحاتتاپ، جاستارعا جاقىنداتا ءتۇسۋ قاجەت دەپ سانايمىن.

- وبلىستىق دەڭگەيدە وتكەن پيلوتتىق جوبانىڭ وڭ جانە تەرىس تۇستارى قانداي؟
- وڭ تۇستارىن ايتتىم، ال كوزگە ۇرىپ تۇرعان تەرىس تۇستارىن بايقامادىم. ونى جوبانىڭ باسى-قاسىندا جۇرگەن، مان-مانىسىنە تەرەڭ بويلاعان ازاماتتار بىلەتىن بولار.
ءبىر ۇسىنىس قانا ايتا الامىن. ءسوز جوق، وبلىستىق اكىمشىلىك جوباعا قولداۋ كورسەتىپتى. ونىسىنا راحمەت! اۋداندارداعى اكىمشىلىك ماماندارىنا العىسىن ايتىپ، ولاردى ماراپاتتاعان «ادىرنا» قورى دا جارادى. ءبىراق وبلىس ورتالىعىنداعى تەاتردا وتكەن قورىتىندى كەشكە وبلىس اكىمشىلىگىنەن رەسمي تۇلعالار كەلە قويمادى. بالكىم، ولاردىڭ شىنىمەن دە قولى تيمەگەن شىعار. ءبىراق، وبلىستىڭ تۇكپىر-تۇكپىرىنەن كەلگەن جاستاردىڭ الدىنا شىعىپ، ءبىر اۋىز جىلى سوزدەرىن ايتقاندا، قاتىپ كەتەر ەدى! بيلىكتىڭ بەلەدى دە ارتار ەدى.

- ەلىمىزدە الەۋمەتتەندىرۋ دەڭگەيىنە قانداي باعا بەرەر ەدىڭىز؟
- بۇل ءوزى وتە-موتە قيىن سۇراق. ءبىر نارسە انىق: ءبىزدىڭ مەملەكەت كونستيتۋسيا بويىنشا «الەۋمەتتىك مەملەكەت». سوندىقتان دا قوعامنىڭ بارلىق توپتارىنىڭ – جاس بولسىن، ورتا بۋىن بولسىن، زەينەتكەرلەر بولسىن – الەۋمەتتەنۋىنە، ياعني جاڭا زامانعا بەيمىدەلۋىنە مەملەكەت تىكەلەي جاۋاپتى. ءوز باسىم مەملەكەت وسى ميسسياسىن تولىق مانىندە اتقارىپ جاتىر دەپ ايتا المايمىن! سونىمەن قاتار، تەك قانا مەملەكەتكە قاراپ قالۋعا بولمايدى: قوعام، ءاربىر ازامات ءوز بەلسەندىلىگىن تانىتۋى شارت. سوندا عانا شىن مانىندەگى ءارى جەمىستى الەۋمەتتەنۋ جۇزەگە اسادى دەپ سانايمىن!

جالپى، جوبانىڭ ۇزدىك شىققان جۇزدىكتەرىنە ارنايى تىكتىرىلگەن كۇرەشەلەر، كۋالىكتەر، توسبەلگىلەر تاراتىلدى. سونىمەن بىرگە، ولارعا مادەنيەتتانۋشى، ەتنوگراف بەردالى وسپاننىڭ "قازاق سالتتارىنىڭ ءىنجۋ-مارجاندارى" اتتى كىتاپ سىيعا تارتىلدى. قازاقستان جاستارىن الەۋمەتتەندىرۋگە باعىتتالعان JasQZ جوباسىن قورتىندىلاۋ بويىنشا سالتاناتتى شارا بارىسىندا جۇزەگە اسىرۋعا بەلسەندى ات سالىسقان مامان، قىزمەتكەرلەر دە ماراپاتالدى.