اقتاۋلىقتار جالپىحالىقتىق ديكتانتقا قاتىستى

بۇگىن رەسپۋبليكا بويىنشا 2 ملن-عا جۋىق ادام جالپىحالىقتىق ديكتانت جازىپ جاتىر. لاتىن ءالىپبيى نەگىزىندە جازىلاتىن ديكتانتقا ماڭعىستاۋ وبلىسىنان 80 مىڭ ادام قاتىسادى دەپ جوسپارلانعان.

مەملەكەتتىك ورگانداردا، مەكەمەلەر مەن وقۋ ورىندارىندا مىڭداعان ادام رەسپۋبليكالىق شاراعا قاتىستى. اقتاۋداعى اباي اتىنداعى مادەني-دەمالىس كەشەنىندە دە 150-دەي مەملەكەتتىك قىزمەتكەر ديكتانت جازدى.

— بۇگىنگى ديكتانتقا قالالىق اكىمدىكتىڭ ۇيىمداستىرۋىمەن 13 مىڭنىڭ ۇستىندە ادام قاتىستى. ولاردىڭ قاتارىندا مەملەكەتتىك قىزمەتكەرلەر، ۇستازدار، 15 جاستان جوعارى مەكتەپ وقۋشىلارى، اتا-انالار بار. سونىمەن قاتار، «قالا جولدارى»، «كاسپيي، جىلۋ، سۋ ارناسى»، «اۋەس» سىندى مەكەمە قىزمەتكەرلەرى دە ءوز عيماراتتارىندا ديكتانت جازدى، — دەيدى اقتاۋ قالالىق مادەنيەت جانە تىلدەردى دامىتۋ ءبولىمىنىڭ باسشىسى الداشيەۆا گۇلجازيرا.

بارلىق وڭىردە ديكتان ءبىر مەزگىلدە، ساعات 11:00-دە باستالدى. ءماتىن الدىمەن ءۇش رەت تىڭدالدى. ال جازۋ بارىسىندا ءار سويلەم ءۇش رەتتەن وقىلدى. ديكتانتتى جازىپ بولعان سوڭ قاتەسىن تەكسەرۋ ءۇشىن تاعى ءبىر رەت وقىلدى.

مۇندا قالالىق اكىمدىكتىڭ مەملەكەتتىك جانە اكىمشىلىك قىزمەتكەرلەرى قاتىسىپ وتىر. ولار «رۋحاني جاڭعىرۋ» تاقىرىبىنداعى 80-90 سوزدەن تۇراتىن ديكتانتتى جارتى ساعات كولەمىندە جازىپ شىقتى. قاتىسۋشىلار ارنايى پاراقشادا ديكتانتتان بولەك قاتىسۋشىلاردىڭ ءاتى-جونى، جاس مولشەرى كورسەتىلەدى.

— قازاقستان رەسپۋبليكاسىنىڭ لاتىن الىپبيىنە كوشۋىن قولدايمىن جانە ونى قابىلداۋ بىزگە قيىندىق تۋدىرىپ جاتقان جوق. مىنە، جاڭا عانا اكىمدىك ۇجىمى بولىپ لاتىننەگىزدى الىپبيمەن ديكتانت جازدىق. ءماتىن ۇزاق ەمەس ءارى تۇسىنىكتى. جاڭا ءالىپبيدى تەز مەڭگەرىپ كەتەمىز دەپ ويلايمىن، — دەيدى قاتىسۋشى ۇلبولسىن.

ەسكە سالايىق، ارنايى قۇرىلعان جۇمىس توپتارى كريتەرييلەرگە سۇيەنە وتىرىپ ارىپتىك، تىنىس-بەلگى قاتەلەرىن تەكسەرەدى. ديكتانت قورىتىندىلارىن 5 جۇمىس كۇنى ىشىندە شىعارىپ، جاريالايتىن بولادى.