اقتاۋدا حالىق ءارتىسى ايمان مۇساقوجايەۆانىڭ كەشى ءوتتى

ماڭعىستاۋعا ونەر ساپارىمەن قازاقستاننىڭ حالىق ءارتىسى، ەڭبەك ەرى، قازاق ۇلتتىق ونەر ۋنيۆەرسيتەتىنىڭ رەكتورى، سكريپكاشى ايمان مۇساقوجايەۆا كەلدى. ونەر يەسى 25 ادامنان قۇرالعان ۇجىممەن قالىڭ كورەرمەنگە كلاسسيكالىق كەش ۇسىنىپ، قوشەمەتكە بولەندى. 

-«رۋحاني جاڭعىرۋ» باعدارلاماسى اياسىندا ەلىمىزدىڭ بارلىق ءوڭىرىن كونسەرپەن ارالاماقپىز. اقتوبە، اتىراۋ، مىنە اقتاۋ قالاسى، جالپى باتىس وڭىرلەرىن ارالاپ كەلدىك. قازاق ۇلتتىق ونەر ۋنيۆەرسيتەتىنىڭ ۇستازدارى،  ستۋدەنتتەرى مەن تۇلەكتەرىنەن قۇرالعان «سوليستەر اكادەمياسى» مەملەكەتتىك كامەرالىق وركەسترىمەن، «تارلان» ەتنو-انسامبلىمەن بىرگە كونسەرت بەرىپ كەلەمىز. ولار كەشتە وزدەرى جازعان اۋەندەرىن دە ورىندايدى. سونداي-اق بۇگىن ۇسىناتىن شىعارمالارىمىزدىڭ قاتارىندا ءۆيۆالديدىڭ «جىل مەزگىلدەرى»، استور پيسوللانىڭ «بۋەنوس-ايرەستەگى جىل مەزگىلدەرى»، دينا نۇرپەيىسوۆانىڭ، قۇرمانعازىنىڭ كۇيلەرى بار»، — دەيدى ونەر يەسى.

يتاليا، جاپونيا، پولشا، فينليانديا سىندى ەلدەردە ونەر كورسەتىپ، جوعارى باعاعا يە بولىپ جۇرگەن سكريپكاشى «XX عاسىردىڭ 2000 كورنەكتi مۋزىكانتى» اتتى دۇنيەجۇزiلiك قۇرمەتتi تiزiمگە ەنگەن.

سونداي-اق كلاسسيكالىق كەشتە كورەرمەندەر «سوليستەر اكادەمياسى» مەملەكەتتىك وركەسترىنىڭ ونەرىن دە تاماشالادى. رەسپۋبليكانىڭ ۇزدىك كوللەكتيۆى، كامەرالىق جانە سيمفونيالىق مۋزىكا ورىنداۋ سالاسىنداعى ەلىمىزدىڭ بەلگىلى مۋزىكالىق برەندىنە اينالعان ۇجىم تانىمال تۋىندىلار مەن قوسا قازاق كۇيلەرىن دە كوپكە ۇسىندى.

حالىقارالىق كونكۋرستاردىڭ لاۋرەاتتارىنان، قازاق ۇلتتىق ونەر ۋنيۆەرسيتەتىنىڭ ۇستازدارى مەن ستۋدەنتتەرىنەن قۇرالعان ۇجىم 20 جىل بويى ءتۇرلى حالىقارالىق فەستيۆالدەرگە قاتىسىپ، الەمنىڭ بىرنەشە ەلىن گاسترولدىك تۋرمەن ارالاعان. ولاردىڭ قاتارىندا يتاليا، يسپانيا، گەرمانيا، تۇركيا، يوردانيا، رەسەي، جاپونيا، وڭتۇستىك كورەيا، اقش ت.ب. ەلدەر بار. ۇجىمنىڭ ديريجەرى – «دارىن» مەملەكەتتىك جاستار سىيلىعىنىڭ يەگەرى اسقار دۇيسەمبايەۆ، كوركەمدىك جەتەكشىسى – ق ر حالىق ءارتىسى ايمان مۇساقوجايەۆا. وركەستر جاقىندا قازاقستان مادەنيەتىن تانىستىرماق ماقساتپەن يتالياعا ساپار شەكپەك.

حالىق ءارتىسىنىڭ تۇبەكتەگى ەكىنشى كونسەرتتىك ساپارى «رۋحاني جاڭعىرۋ» مەملەكەتتىك باعدارلاماسى اياسىندا ۇيىمداستىرىلعان تۋرنە استانا قالاسى مەن قازاق ۇلتتىق ونەر ۋنيۆەرسيتەتىنىڭ 20 جىلدىعىنا ورايلاستىرىلعان. الدا ەلىمىزدىڭ وڭتۇستىك، سولتۇستىك وڭىرلەرىن ارالاماق.