رەسپۋبليكالىق بايقاۋ استانا اكىمدىگى مەن «اتامەكەن» ۇكپ قولداۋىمەن ءوتتى. بيزنەس-حانىمدار  ءوزىنىڭ جوباسى تۋرالى بەينيەۆيزيتكا، ەرۋديسيا جانە شىعارماشىلىق نومەر سياقتى ءۇش كەزەڭدە ب ا ق تالاستىردى. بۇل جايىندا Qamshy.kz اقپارات اگەنتتىگى ەلوردا اكىمدىگىنىڭ رەسمي سايتىنىڭ مالىمەتىنە سۇيەنە وتىرىپ مالىمدەيدى.

«بايقاۋعا قاتىسقانداردىڭ بارلىعى دا ەرەكشە ءارى سۇلۋ. قىزداردىڭ بارلىعى تەڭ دارەجەدە. ولار – ايماقتارىندا وتكەن كەزەڭنىڭ جەڭىمپازدارى. مۇندا كىلەڭ مىقتىلار جينالدى»،  - دەدى ءادىلقازىلار مۇشەسى، سينەرگيا ۋنيۆەرسيتەتىنىڭ پرەزيدەنتى باۋىرجان قاسىمبىرگەبايەۆ.

بايقاۋدا اقتوبەلىك «Mediapro» بالالار پروديۋسەر ورتالىعىنىڭ باسشىسى جانارگۇل دوسوۆا جەڭىس تۇعىرىنان كورىندى.  

«بىزدە شىعارماشىلىق اكادەميا بار. وندا ءبىز بالالارعا ۆوكال، اكتەرلىك شەبەرلىك، حورەوگرافيا سىندى باعىتتاردا ءبىلىمى مەن قابىلەتىن ۇشتايمىز. بىزدە كوپتەگەن كينوجوبالار، كينوفەستيۆالدەر بار. سونداي-اق، بالالار تەلەجوبالارعا دا قاتىسادى. ال مەن ساحناعا شىقسام دەپ ارماندايتىنمىن. سول ارماندارىمنىڭ بارلىعى ورىندالۋدا. بۇل – سوزبەن جەتكىزىلمەيتىن عاجاپ سەزىم»، - دەپ ءبولىستى اسەرىمەن جارىستىڭ جەڭىمپازى جانارگۇل دوسوۆا. 

بايقاۋدىڭ نەگىزگى ماقساتى – جاس ايەلدەر اراسىندا بەلسەندى ومىرلىك پوزيسياسىن قالىپتاستىرۋ، قازاقستان ىسكەر ايەلدەرىنىڭ ءيميدجىن كوتەرۋ، كاسىپكەرلىكتە، ماماندىعىندا، قوعامدىق ومىردە، ساياساتتا جانە شىعارماشىلىقتا تابىستى ايەلدىڭ وبرازىن قالىپتاستىرۋ.