«نۇر وتان» تۇرعىن ءۇي كوممۋنالدىق سالاسى مەن تابيعي مونوپوليستەردىڭ جۇمىسىنا مونيتورينگ جۇرگىزۋدى باستادى
«نۇر وتان» پارتياسى قازاقستان پارلامەنتى ءماجىلىسىنىڭ كەزەكتى فراكسياسى بارىسىندا مەملەكەت باسشىسى نۇرسۇلتان نازاربايەۆتىڭ تاپسىرمالارىن ءتيىمدى ورىنداۋعا ىقپال ەتەتىن نورماتيۆتىك-قۇقىقتىق اكتىلەرگە قاجەتتى وزگەرىستەر مەن تولىقتىرۋلار ەنگىزۋدى جوسپارلاپ وتىر.
«نۇر وتان» پارتياسى قازىرگى ۋاقىتتا پرەزيدەنت جولداۋىنداعى تاپسىرمالاردى جۇزەگە اسىرۋعا بەلسەنە كىرىستى. كەڭەيتىلگەن وتىرىس پارتيانىڭ ورتالىق اپپاراتىندا ءوتتى. وندا بۇگىنگى كۇننىڭ وزەكتى ماسەلەلەرىنىڭ ءبىرى – تۇرعىن ۇي-كوممۋنالدىق شارۋاشىلىقتى رەفورمالاۋ تالقىلاندى.
ەسكە سالىپ وتەيىك، مەملەكەت باسشىسى ءوز جولداۋىندا ەكونوميكاداعى باسەكەلەستىكتى دامىتۋ جانە تۇرعىن ۇي-كوممۋنالدىق شارۋاشىلىق پەن تابيعي مونوپوليالاردىڭ سۋبەكتىلەرىن رەتتەۋ، تاريفتەردى ورناتۋ مونوپوليستەردىڭ ينۆەستيسيالىق مىندەتتەمەلەرىن ءتيىمدى باقىلاۋ ماسەلەلەرىن كوتەرگەن. بۇگىندە تۇتىنۋشىلاردان جينالعان قاراجاتتى يگەرۋ دۇرىس جۇرگىزىلىپ جاتقان جوق. ءوز كەزەگىندە پرەزيدەنت بۇل ماسەلەنى قايتا قاراپ شەشۋگە، مونوپولياعا قارسى ۆەدومستۆونىڭ جۇمىسىن رەفورمالاۋعا ءۇش اي بەردى.
جولداۋدا ايتىلعان بارلىق شارانى جۇزەگە اسىرۋدا زاڭنامالىق قولداۋ كورسەتۋ ماقساتىندا پارتيا مۇشەلەرى «تۇرعىن ءۇي كوممۋنالدىق شارۋاشىلىققا بايلانىستى قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تالقىلادى. قازاقستاندىقتار ءۇشىن بۇل ماسەلە بىرنەشە جىلدان بەرى وزەكتىلىگىن جويماي تۇر.
«نۇر وتان» پارتياسىنا قاراستى ستراتەگيالىق زەرتتەۋلەر ينستيتۋتىنىڭ مالىمەتىنە سۇيەنسەك، ازاماتتاردىڭ 36 پايىزى سەرۆيستىك كومپانيالاردىڭ قىزمەتىندە اشىقتىق بولماۋى مەن كىرىس شىعىندارىنداعى باقىلاۋدىڭ جوقتىعىن ايتىپ، نارازىلىقتارىن بىلدىرگەن.
«نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ وتىرىستى اشا وتىرىپ تۇرعىن ءۇي سەكتورىنداعى تۇرعىن ءۇي قۇرىلىسى اياسىنداعى ءبىرقاتار شەشىلمەگەن ماسەلەنى، سونىڭ ىشىندە كوممۋنالدىق قىزمەتتەرىنىڭ نەگىزى ماسەلەلەرىن كوتەردى.
«نۇر وتان» پارتياسى ەلباسى جولداۋىنداعى تاپسىرمالار مەن مىندەتتەردى ءتيىمدى ورىنداي وتىرىپ، تۇرعىن ۇي-كوممۋنالدىق شارۋاشىلىق سالاسىنداعى ءتارتىپتى رەتكە كەلتىرۋگە، سونىمەن قاتار تابيعي مونوپوليستەردىڭ تاريفتەرىن رەتتەۋگە كۇش سالامىز، ءارى بۇل ءبىزدىڭ بۇگىنگى تاڭداعى مىندەتىمىز بولىپ سانالماق. بۇل پارتيامىزدىڭ الدىندا تۇرعان ۇلكەن جۇمىسقا سەرپىن بەرەدى»، - دەدى ماۋلەن اشىمبايەۆ.
«نۇر وتان» پارتياسى ءتوراعاسىنىڭ ءبىرىنشى ورىنباسارى تۇرعىن ۇي-كوممۋنالدىق شارۋاشىلىق تۋرالى قولدانىستاعى زاڭناماعا وزگەرىستەر مەن تولىقتىرۋلار ەنگىزۋ تۋرالى زاڭ جوباسى پارلامەنتتىڭ قاراۋىندا ەكەنىن دە ەسكەرتتى. پارتيا مەن مۇددەلى تاراپتاردىڭ ماقساتى – تالداۋ، اياقتاۋ جانە حالىقتىڭ كۇتۋىنە ساي كەلەتىنى-كەلمەيتىنىن ءتۇسىنۋ.
«ءبىز وسى سالادا ءتيىمدى مونيتورينگ ۇيىمداستىرامىز. مونوپوليستەر قالاي جۇمىس ىستەيدى، كوممۋنالدىق كومپانيا قىزمەتكەرلەرى قالاي جۇمىس ىستەيدى. ءبىز بۇل قىزمەتتە ءتيىمدى مونيتورينگ جۇيەسىن قۇرۋ ءۇشىن قوعامدىق ۇيىمدارمەن، ۇكىمەتتىك ەمەس ۇيىمدارمەن، مۇددەلى ادامدارمەن ىنتىماقتاسۋعا دايىنبىز»، - دەدى ماۋلەن اشىمبايەۆ.
ۇسىنىلعان تۇزەتۋلەر كوندومينيۋم نىساندارىن باسقارۋ مەن جۇرگىزۋ جانە ولاردى ورىنداۋ ءتارتىبىن رەتتەۋگە باعىتتالعان. جاڭارتىلعان زاڭ جوباسى تۇرعىن ءۇي كوممۋنالدىق شارۋاشىلىقتىڭ ءبىرىڭعاي مەملەكەتتىك اقپاراتتىق جۇيەسىن قۇرۋ مۇمكىندىگىن دە قاراستىرادى. ازىرلەنگەن قۇقىقتىق نورمالىق اكت ازاماتتاردىڭ تۇرعىن ءۇي-قۇرىلىس كووپەراتيۆىنە كىرۋى ارقىلى تۇرعىن ءۇيدى ساتىپ الۋ مۇمكىندىگىن ارتتىرۋ مەن قولدانىستاعى زاڭنامالىق كەمشىلىكتەر مەن قاقتىعىستاردى جويۋعا باعىتتالعان.
جالپى العاندا تۇزەتۋلەر تۇرعىن ۇي-كوممۋنالدىق شارۋاشىلىق قىزمەتىن رەفورمالاۋداعى بىرنەشە مىندەتتى بىردەن شەشۋگە ارنالعان، ونىڭ ىشىندە: باسقارما كومپانيالارىنىڭ قىزمەت ساپاسىن قامتاماسىز ەتۋ؛ كوممۋنالدىق قىزمەت پەن تولەمدەردى ەسەپكە الۋدى جەتىلدىرۋ، ونىڭ ىشىندە باسقارۋشى كومپانيالاردىڭ قىزمەتتەرىنە اقى تولەۋ، تاريفتەردىڭ اشىقتىعى مەن باقىلاۋدى قامتاماسىز ەتۋ؛ تۇرعىن ۇي-كوممۋنالدىق شارۋاشىلىق سالاسىنا جوعارى تەحنولوگيالاردى ەنگىزۋ، ماسەلەن، باسقارۋدى اۆتوماتتاندىرۋ جانە سيفرلاندىرۋ؛ جالپى مۇلىكتى ەسەپكە الۋ راسىمدەرىن جەتىلدىرۋ؛ جالپى مۇلىكتى جوندەۋدى تۇراقتى نەگىزدە قامتاماسىز ەتۋ.
كەزدەسۋگە قازاقستان رەسپۋبليكاسى پارلامەنتىنىڭ دەپۋتاتتارى، «نۇر وتان» حالىقتىق-دەموكراتيالىق پارتياسىنىڭ زاڭ كەڭەسى مۇشەلەرى، مەملەكەتتىك ورگاندار مەن ۇكىمەتتىك ەمەس ۇيىمداردىڭ وكىلدەرى، سونىمەن ءار ءتۇرلى وڭىردەن وكىلدەر قاتىستى.
