بۇگىن قازاقستان رەسپۋبليكاسىنىڭ باس پروكۋرورى قايرات قوجامجاروۆتىڭ قىرعىزستاننىڭ باس پروكۋرورى وتكۋربەك دجامشيتوۆپەن ەكى جاقتى كەزدەسۋى بولىپ ءوتتى دەپ جازادى Qamshy.kz اقپارات اگەنتتىگى. 

ارىپتەستەر ۆەدومستۆوارالىق ىنتىماقتاستىقتى نىعايتۋدىڭ جانە شارتتىق-قۇقىقتىق بازانى كەڭەيتۋدىڭ اسپەكتىلەرىن تالقىلادى.

ترانسۇلتتىق قىلمىسقا، ەكسترەميزمگە جانە تەرروريزمگە قارسى ءىس-قيمىل ماسەلەلەرىنە قاتىستى ىرگەلى قارىم-قاتىناستار، سونداي-اق ۇرلانعان اكتيۆتەردى كەرى قايتارۋ بويىنشا بىرلەسە كۇش-جىگەر جۇمساۋ وڭ باعاعا يە بولدى.

«ءوزارا كەلىسىمگە نەگىزدەلگەن كەلىسىلگەن ارەكەتتەر قىلمىستىق ىستەر بويىنشا قۇقىقتىق كومەك كورسەتۋ تۋرالى كيشينيەۆ كونۆەنسياسىن ىسكە اسىرۋ ماسەلەلەرىن جەدەل ءارى اۋرە-سارساڭعا سالماي شەشۋگە مۇمكىندىك بەرەدى»،- دەپ اتاپ كورسەتتى  قايرات قوجامجاروۆ.

ءوز تاراپىنان وتكۋربەك دجامشيتوۆ مىرزا سوتتالعان ادامداردى بەرۋ سالاسىندا قول جەتكەن ءوزارا ءىس-قيمىلدى اتاپ ءوتتى.

سوڭعى ەكى جىل ىشىندە ىزدەۋ سالىنعان 11 ادام قىرعىزستاننان قازاقستانعا ەكستراديسيالاندى، قىرعىزدار تاراپىنان 17 ازامات بەرىلدى. وسى كەزەڭ ىشىندە قازاقستان قىرعىزستانعا ولاردىڭ سوتتالعان 19 ازاماتىن، ال ءبىزدىڭ ەلىمىزگە 3 قازاقستاندىق بەرىلدى.

تەرروريستىك ۇيىمدارمەن جانە ولاردى قارجىلاندىرۋمەن كۇرەس سالاسىنداعى ىنتىماقتاستىق اسپەكتىلەرى جەكە تالقىلاندى.

قازاقستاننىڭ باس پروكۋرورى شەتەلدىك ارىپتەسىن ەكى جاقتى قارىم-قاتىناستى ودان ءارى نىعايتۋعا ءازىر ەكەندىگىن ايتتى.

ەستەرىڭىزگە سالا كەتەيىك، استانا قالاسىندا وتكەن «ايماقارالىق ىنتىماقتاستىقتى نىعايتۋ جانە ۇيىمداسقان قىلمىسقا قارسى كۇرەستە كۇش-جىگەردى ۇيلەستىرۋ» اتتى حالىقارالىق كونفەرەنسيادا شەت ەلدەردىڭ قاداعالاۋ ۆەدومستۆولارى وكىلدەرىنىڭ قاتىسۋى اياسىندا قازاقستاننىڭ باس پروكۋرورى ق. قوجامجاروۆ ءبىرقاتار ەكىجاقتى كەزدەسۋلەر وتكىزدى.

ق ر باس پروكۋراتۋراسىنىڭ باسپا ءسوز قىزمەتى