بيىلعى جىلى ەلىمىزدەگى ەڭ كيەلى مەكەندەردىڭ ءبىرى – ماڭعىستاۋدا سيفرلاندىرۋ جۇمىستارى ءساتتى جۇرگىزىلدى. ءىس-شارالار لەگىندەگى ەرەكشە اتاپ وتەتىن جايت – وڭىردەگى قاسيەتتى جەرلەردىڭ كارتاعا ءتۇسىرىلىپ، ارتىنشا پورتالدا جاريالانۋى. بۇل مەكەن كوپتەگەن اۋليەلەردىڭ قونعان جەرى. تاريحي تۋىندىلار مەن اڭىز بوپ قالعان مۇرالارعا دا وتە باي. ال ايماقتاعى ساۋلەت ونەرىن سۋرەتتەۋگە ءتىل جەتپەيدى. قۇددى ءبىر ورتا عاسىرعا ءتۇسىپ كەتكەندەي كۇي كەشەسىز (اسىرەسە مەشىتتەرىنىڭ سالىنۋ قۇرىلىمى). ارينە بۇل جادىگەرلەردىڭ جاريالانعانى، كوپشىلىككە كورسەتىلگەنى وتە ورىندى. وسىعان بايلانىستى، وبلىس اكىمدىگى بۇل جۇمىستى قولعا الىپ، «ماڭعىستاۋدىڭ كيەلى ورىندارى» اتتى ينتەراكتيۆتى كارتاسىن جاساقتاپ، ەندىگى تاڭدا اقپاراتتىق رەسۋرسقا ەنگىزىپ ۇلگەردى.
Mangystau.inmap.kz دەپ اتالاتىن بۇل جوبا 2018 جىلدىڭ 30 قازانىندا ىسكە قوسىلدى. وندا كوپتەگەن كەسەنەلەر، ءدىني ەسكەرتكىشتەر، تاريحي قورىمدار مەن كونە مەشىتتەردىڭ سۇلباسى سالىنعان. مازمۇنى دا جازىلعان. ءار نىساننىڭ وزىنە ساي ەرەكشەلىگى مەن قاسيەتى باياندالعان. ارنايى فوتوگالەرەياسى مەن 3D-پانورامالارى بار. ال كارتاسى ارقىلى كەز كەلگەن تۇرعىن نەمەسە قوناقتار قالاعان تاريحي ورنىنا بارا الادى. نەمەسە قۇندى ورىندى تولىقتاي بەينەجازبا ارقىلى كورە الادى (پورتال ارقىلى).
جالپى ايتقاندا، بۇل جوبا ماڭعىستاۋدىڭ كيەلى، تاريحي ءارى مادەني نىساندارىن حالىققا تاراتۋدى كوزدەيدى. «سيفرلىق قازاقستان» جانە «رۋحاني جاڭعىرۋ» اتتى مەملەكەتتىك باعدارلامالاردىڭ نەگىزىندە جۇزەگە اسىپ وتىر. اقپاراتتىق پورتالدىڭ ءار تارماعى بايىپپەن ورىندالعان. نەگە دەسەڭىز، نىساندار تۋرالى ءتىپتى انىز-اڭگىمەلەر باياندالعان. بۇل جايت جاس ۇرپاقتىڭ رۋحاني ءارى مادەني جاڭعىرۋىنا سەرپىن بەرەتىنى ءسوزسىز. ءارى تاريحي مۇرالارعا دەگەن قىزىعۋشىلىعىن دا وياتارى بەلگىلى. ونى ءاربىر ادام اتالمىش سايتقا كىرىپ، وقي الادى. شەتەلدىك قوناقتاردىڭ دا قاراۋىنا بارلىق جاعداي جاسالعان. سەبەبى، ول 3 تىلدە (قازاق، ورىس، اعىلشىن) جازىلىپ وتىر. بيۋدجەتتەن وسى ءۇشىن 10 ملن. تەڭگە قارجى ءبولىندى. مۇنى تەك ماڭعىستاۋ تۇرعىندارى عانا ەمەس، بۇكىل قازاقستان حالقى كورە الادى. ويتكەنى، اقپاراتتىق پورتال بارىنە قولجەتىمدى.
وسىعان ۇقساس تاعى ءبىر جوبانىڭ ءبىرى – QR-كود موبيلدىك قوسىمشاسى.
ارنايى قوسىمشا QR-كودتار ارقىلى جەرگىلىكتى مادەني نىسىندار تۋرالى تانىمدىق اقپاراتپەن تانىستىرادى. ياعني، ءسىز QR-كودتى باسساڭىز نىسان تۋرالى بارلىق مالىمەتتەن حاباردار بولاسىز. وسى ءۇشىن 2،8 ملن. تەڭگە كولەمىندە بيۋدجەتتەن قاراجات ءبولىندى. نەگىزىنەن مۇنداي ءتاسىل تاريحي-مادەني مۇرانى ناسيحاتتاۋدىڭ زاماناۋي ءتاسىلى. ولاي دەيتىنىمىز، كەز كەلگەن تۋريست ارنايى ەكسكۋرسوۆود قىزمەتىنسىز نىسان تۋرالى اقپاراتتى بىلە الادى. مۇنىڭ ءبارىن ءسىز قولىڭىزداعى سمارتفون نەمەسە پلانشەت ارقىلى بىلە الاسىز. وسى جۇمىستاردى ارى قاراي دا جەتىلدىرە ءتۇسۋ ءۇشىن جەرگىلىكتى اكىمدىك پەن "Mediana Services Limited" ج ش س اراسىندا كەلىسىم-شارت جاسالعان. قازىرگى تاڭدا QR-كود موبيلدىك قوسىمشاسى جۇمىس ىستەپ جاتىر، وندا ازىرگە 20 ەسكەرتكىش تۋرالى اقپارات ورنالاستىرىلىپتى. وسىلايشا، ەل تۇرعىندارى ايتۋلى قوسىمشانى پايدالانا وتىرىپ، دىتتەگەن جەرىنە جەتە الاتىن بولدى. سونداي-اق، قۇندى اقپاراتتار مەن مالىمەتتەردى وقي الاتىن دەڭگەيگە جەتتى. ەڭ باستىسى – بارلىق ادام ءۇشىن جايلىلىق جاسالعان.
