قازاقستان جەر كولەمى جونىنەن الەم ەلدەرىنىڭ ىشىندە 9-شى ورىن الاتىنى بارلىعىمىزعا بەلگىلى. كليماتى دا كوپ قىرلى. ياعني، ەل اۋماعىنداعى ءتۇرلى ايماقتاردىڭ اۋا رايى ءارتۇرلى. البەتتە مۇنىڭ ءبارى گەواقپاراتتىق جۇيەنىڭ بولۋىن تالاپ ەتەدى. ويتكەنى، ءدال وسى گەوپورتالدار ارقىلى گەوگرافيالىق جاعدايدى، ايماقتاردىڭ سيپاتتاماسىن، قۇرىلىمىن بىلۋگە بولادى. قازىرگىدەي قۇبىلمالى ۋاقىتتا، وزگەرمەلى تابيعي جاعدايدا گەوگرافيالىق اقپاراتتىق كەڭىستىك ەل تۇرعىندارىنا باعىت-باعدار كورسەتۋگە مۇمكىندىك بەرەدى.

گەوپورتالدى ەنگىزۋدەگى نەگىزگى ماقسات – سپۋتنيكتىك بەينەلەر مەن ۆەكتورلىق گەودەرەكتەردى تالداۋ جانە وڭدەۋ. سونداي-اق، ولاردى اۆتوماتتاندىرىلعان جۇيەدە الۋ مۇمكىندىگى. وسىنداي زاماناۋي تەحنولوگيا گەوگرافيالىق دەرەكتەردىڭ كوپتەگەن تۇرلەرىن بىلۋگە مۇمكىندىك بەرەدى. جۇيەدە سپۋتنيكتىك سۋرەتتەر، كارتالار، ۆەكتورلىق قاباتتار سىندى اقپاراتتار قامتىلعان.

گەواقپاراتتىق پورتالدار بۇگىندە ەلىمىزدىڭ ءبىرقاتار وڭىرىندە قىزمەت ەتۋدە. سول وڭىرلەردىڭ قاتارىنا ماڭعىستاۋ وبلىسى دا كىرەدى. جەرگىلىكتى اكىمدىك «قازاقستان عارىش ساپارى» ۇلتتىق كومپانياسى» اق-مەن بىرلەسە وتىرىپ، ءبىرىڭعاي گەواقپاراتتىق جۇيەنى كەزەڭ-كەزەڭىمەن جاساقتاۋ تۋرالى كەلىسىمگە كەلدى. اتالعان شارالار 2018 جىلدىڭ ساۋىرىنەن بەرى جۇزەگە اسىرىلۋدا. بۇل اكىمدىك قۇرىلىمدىق بولىمشەلەرىنىڭ شارۋاشىلىق قىزمەتىنىڭ نەگىزگى باعىتتارىن باقىلاۋعا جانە مونيتورينگ جاساۋعا ارنالعان. اتالعان پيلوتتىق جوبانى ەنگىزۋ ءۇشىن اكىمدىك تاراپىنان 17 ملن. تەڭگە كولەمىندە قاراجات بولىنگەن.             قازىرگى تاڭدا وسى جۇمىستاردى ورىنداۋ ءۇشىن ءبىرقاتار ءىس-شارالار جۇزەگە اسىرىلۋدا. اتاپ ايتقاندا، «mangystau.gharysh.kz» اقپاراتتىق اگەنتتىگى قۇرىلدى. سونداي-اق، مونيتورينگ جۇيەسىنىڭ ارحيتەكتۋراسى ازىرلەنىپ، باستاپقى دەرەكتەرگە قويىلاتىن تالاپتار ازىرلەندى. جوعارى جانە ورتاشا سپۋتنيكتىك بەينەلەر وڭدەلىپ، قاجەتتى دەرەكتەر سيفرلاندىرىلدى. ال ناتيجەلەرى گەوپورتالدا جاريالاندى.            مangystau.gharysh.kz سايتىنا بۇگىندە مىناداي قىزمەتتەر قوسىلىپ ۇلگەردى: ماڭعىستاۋ وبلىسىنىڭ عارىش كورىنىستەرى موزايكا تۇرىندە كورسەتىلگەن. ونىڭ ىشىندە اقتاۋ قالاسى، جاڭاوزەن جانە فورت-شيەۆچەنكونىڭ عارىشتان كورسەتىلگەن بەينەسى بار؛ جىلجىمايتىن مۇلىك وبەكتىلەرىنىڭ بارلىق اتريبۋتتارى سيفرلاندىرىلدى. ينجەنەرلىك جەلىلەر، كوشە-جول جەلىسى، جاسىل كەڭىستىكتەر مەن سۋ وبەكتىلەرىنىڭ ءبارىنىڭ بەينەسى سيفرلىق فورماتقا كوشتى. اتالعان پورتالعا تەمىرجول سۋرەتتەرى، ماگيسترالدى جولدار، مۇناي-گاز وبەكتىلەرى، تاريحي ورىندار مەن بارلىق نىساندار ەندى. بۇدان بولەك، وبلىستىڭ بارلىق اۋداندارى مەن اۋىلدارىنىڭ گەوگرافيالىق ورنى  مەن سيپاتتامالارى ەنگىزىلدى.              ءبىر قىزىعى – جەرگىلىكتى جۇرتشىلىق وسى پورتال ارقىلى قوعامدىق كولىكتەردىڭ قوزعالىسىن بىلە الادى. ياعني، ترانسپورت جۇيەسى دە كورسەتىلىپ وتىرادى. اكىمشىلىك مەكەمەلەر، الەۋمەتتىك ورىنداردىڭ بارلىعى سايتتا كورسەتىلگەن.