كەز كەلگەن حالىقتىڭ وشپەس قۇندىلىعى – مادەني مۇراسى. مادەنيەتتى جاڭعىرتۋ، ونى قايتا تۇلەتۋ – ۇلتتىڭ رۋحاني تۇرعىدان باي بولۋىنا ىقپال ەتەدى. وسى جولدا مول مۇراعاتىمىزدى حالىققا جەتكىزۋدى جەڭىلدەتە ءتۇسۋ قاجەت. بۇل ورايدا قىزمەت كورسەتۋ سالاسىندا ەلەكتروندىق فورمات قولدانىستا. مۇنداي جۇيە ەل-جۇرتىمىز ءۇشىن جايلىلىق پەن قولجەتىمدىلىك  سىيلايتىنى ءسوزسىز.

تىڭ جۇيە ماڭعىستاۋ وبلىسىنىڭ مادەني مەكەمەلەرىندە كەڭىنەن قولدانىلىپ جاتىر. ياعني، جەرگىلىكتى جۇرتشىلىق مادەني قويىلىم بيلەتتەرىن ونلاين-رەجيمدە الۋ مۇمكىندىگىنە يە بولدى. وسى شارالاردىڭ ءبارى بۇگىندە ءوز ناتيجەسىن كورسەتە باستاعان «سيفرلىق قازاقستان» مەملەكەتتىك باعدارلاماسىنىڭ توڭىرەگىندە ىسكە اسىرىلۋدا.

باعدارلاماعا سايكەس، وبلىستىڭ مادەنيەت باسقارماسىنا قاراستى بارلىق ۇيىمدار مەن مەكەمەلەردىڭ ەلەكتروندىق پورتالى ازىرلەنىپ، قىزمەتتەرىن قالىڭ كوپشىلىككە كورسەتۋدە. بۇعان مىسال رەتىندە، ن. ءجانتورين اتىنداعى مۋزىكالىق-دراما تەاترىنداعى، قۋىرشاق تەاترىنداعى، تاريحي-ولكەتانۋ مۋزەيىندەگى، سونداي-اق م.وسكىنباي ۇلى اتىنداعى وبلىستىق فيلارمونيا مەن «يۋنوست» كينوتەاترىنداعى ءبىرىڭعاي  ەلەكتروندىق جۇيەلەرىن ايتساق بولادى (كىرۋ بيلەتتەرىنە قاتىستى).

ماڭعىستاۋدا مادەني سالانى سيفرلاندىرۋ ماقساتىندا كىتاپحانالىق قورلار دا ەلەكتروندىق جۇيەگە كوشىرىلىپ جاتىر. ستاتيستيكالىق مالىمەتتەرگە سۇيەنسەك، وبلىس كىتاپحانالارىنداعى 1 454 451 كىتاپحانالىق قوردىڭ 442 695ء-ى ەلەكتروندى كاتالوگقا ەنىپتى. بۇدان وزگە، وبلىستىق كىتاپحانا قورىنداعى ولكەتانۋ تاقىرىبىنداعى 304 ادەبيەت سيفرلىق فورماتقا اۋىستىرىلدى. ول ءوز كەزەگىندە قازۇەك پورتالىنا ورنالاستىرىلىپ ۇلگەردى. سونداي-اق، اۋىل كىتاپحانالارىنىڭ بازاسىندا ونلاين ورتالىقتار بوي كوتەرىپ، تۇرعىندارعا ءوز قىزمەتتەرىن كورسەتۋدە. بۇل اۋىلداردىڭ قاتارىنا: اقشۇقىر، جەتىباي، جىڭعىلدى، بورانقۇل، ماڭعىستاۋ، تەڭگە اۋىلدارى كىرەدى. مۇنداي ورتالىقتار حالىقتىڭ زاڭگەرلىك كومەك پەن مەدياسياعا قولجەتىمدىلىگىن ارتتىرادى.

مەملەكەتتىك باعدارلاما اياسىندا ءوڭىردىڭ مۋزىكالىق مادەنيەتى دە قايتا تۇلەمەك. وسىعان وراي، «ماقامى ءماشھۇر ماڭعىستاۋ» اتتى ءداستۇرلى مۋزىكالىق مادەنيەتىنىڭ ەلەكتروندىق پورتالى جاساقتالىپ جاتىر. ونىڭ ىشىنە ۇمىت بولعان 200-گە جۋىق مۋزىكالىق تۋىندىلار ەنبەك. بۇل پورتالدى جاساۋ شامامەن 2 جىلعا سوزىلادى دەپ جوسپارلانۋدا. ناتيجەسىندە، ەلەكتروندىق پورتال ارقىلى كۇللى قازاق ەلى مۋزىكالىق مۇرامىزدان ءنار الاتىن بولادى. وسى رەتتە، قايتالانباس بارلىق تۋىندىلاردىڭ تاريحى مەن اۆتورلارى تايعا تاڭبا باسقانداي جازىلىپ، جىل وتكەن سايىن تولىقتىرىلا تۇسپەك. يگىلىكتى ءىستى جەتىلدىرۋ ماقساتىندا بۇگىندە «سaspianMediaServise» جشس-پەن كەلىسىم-شارتقا وتىردى.

 الەم ەلدەرىنە كوز سالار بولساق، مادەنيەتى مەن تۋريزمىنە كوڭىل ءبولىپ جاتقان ەلدەر وتە كوپ. ولاردىڭ دەنى بۇل سالانى سيفرلاندىرۋ ارقىلى ساقتاپ قالارىنا سەنىمدى. سونىڭ ەڭ ۇزدىكتەرى – سينگاپۋر مەن شانحاي. وسى تۇرعىدا ولار ءبىرقاتار سيفرلىق باعدارلامالار مەن جوبالاردى دايارلاپ، بۇگىندە ناتيجەسىن كورۋدە.