ءىس-شاراعا «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ پەن ۇكىمەت باسشىسىنىڭ ورىنباسارى اسقار جۇماعالييەۆ قاتىستى.

مارتەبەلى مەيماندار الدىمەن «سيفرلىق شىعىستىڭ جەتىستىكتەر» كورمەسىمەن تانىستى. وعان «سامعاۋ حولدينگ»، «سۋرس»، «سيت دامۋ»، «السەكو»، «سيلۋمين ۆوستوك» سىندى سەرىكتەستىكتەردىڭ سيفرلاندىرۋ سالاسىنداعى جوبالارى قويىلدى.

جيىندا ماۋلەن اشىمبايەۆ وڭىردە سيفرلاندىرۋ باعىتىندا اتقارىلىپ جاتقان جۇمىستارعا وڭ باعاسىن بەردى.

– «نۇر وتان» پارتياسى بيىل كوكتەمدە ەلىمىز بويىنشا 1000 ءىت-سىنىپ اشۋدى ماقسات تۇتقان-دى. ءقازىر رەسپۋبليكادا 780 سىنىپ جۇمىس ىستەپ تۇر. سونىڭ 277ء-سى شىعىس قازاقستاندا. وسى رەتتە وبلىس باسشىلىعىنىڭ جانە وبلىستاعى پارتيا فيليالىنىڭ ەرەن ەڭبەگىن اتاپ وتكىم كەلەدى. تەز ارادا وسىنشاما سىنىپتى اشۋ – وڭاي شارۋا ەمەس. ەندى كەلەر جىلى وبلىستىڭ بارلىق 662 مەكتەبىندە ءىت-سىنىپتارى قۇرىلماق، – دەدى ول.

اسقار جۇماعالييەۆ ەلىمىزدەگى ەلەكتروندى ۇكىمەت جوباسى ەڭ العاش دانيال احمەتوۆتىڭ جەتەكشىلىگىمەن قۇرىلعانىن ەسكە سالىپ، ايماق باسشىسىنا اتقارىپ وتىرعان جۇمىسى ءۇشىن ريزالىعىن ءبىلدىردى.

–ەلباسىنىڭ مۇرىندىق بولۋىمەن قولعا الىنعان «سيفرلىق قازاقستان» باعدارلاماسىن ىسكە اسىرۋ ءۇشىن ينتەرنەت كەرەك. وكىنىشكە قاراي، بارلىق ەلدىمەكەندەردە ول بار دەپ ايتا المايمىز. سول سەبەپتى ۇكىمەت الداعى 2 جارىم جىلدا بارلىق ەلدىمەكەندەردى ينتەرنەت جەلىسىمەن قامتىپ شىعۋدى جوسپارلاپ وتىر. عالامتور جىلدامدىعى جوعارى بولادى، – دەدى ۆيسە-پرەمەر.

جيىن سوڭىندا فورۋم اياسىندا ۇيىمداستىرىلعان ۇزدىك ىت-شەشىمدەردىڭ رەسپۋبليكالىق بايقاۋى قورىتىندىلاندى. كەلىپ تۇسكەن 79 جوبانىڭ ىشىنەن قازىلار 6-ىن تاڭداپ الىپتى. ولار گرانتتارمەن قارجىلاندىرىلماق.

– بۇل العاشقى فورۋم، ونى كەلەسى جىلى دا ۇيىمداستىرامىز، ءداستۇرلى تۇردە ءوتىپ وتىراتىن بولادى. جىلدان-جىلعا اۋقىمى كەڭەيىپ، جوبالار سانى ارتا بەرمەك. بيىلعى بايقاۋعا قاتىسقان 10 وقۋشىنىڭ دا جوباسىن قولداپ، گرانتتار بولدىك. جاستاردىڭ باستاماسىنا جان-جاقتى قولداۋ كورسەتۋگە شاقىرامىن، – دەدى ءوز سوزىندە ايماق باسشىسى دانيال احمەتوۆ.