بۇگىنگى نارىقتىق قاتىناستار دامىعان قوعامدا ەڭ الدىمەن ادامنىڭ ءومىر ءسۇرۋى ونىڭ جالاقىسىنا بايلانىستى ەكەنى ءسوزسىز. سوندىقتان ۇكىمەت پرەزيدەنت تاپسىرماسىنا ساي  بيۋدجەتتىك مەكەمەلەردىڭ جالاقىسىن اۋىق-اۋىق كوتەرىپ كەلەدى. وسىعان بايلانىستى ۇستىمىزدەگى جىلدىڭ 5 قازان كۇنى حالىققا ارناعان جولداۋىندا ەلباسى   ۇكىمەتكە تاپسىرما بەرگەنى بەلگىلى.

–2019 جىلدىڭ 1 قاڭتارىنان باستاپ ەڭ تومەنگى جالاقىنى 1،5 ەسە، ياعني 28 مىڭنان 42 مىڭعا دەيىن ءوسىرۋدى تاپسىرامىن. بۇل بارلىق سالا بويىنشا ءتۇرلى مەنشىك نىساندارىنداعى كاسىپورىنداردا جۇمىس ىستەيتىن 1 ميلليون 300 مىڭ ادامنىڭ ەڭبەكاقىسىن تىكەلەي قامتيدى. بيۋدجەتتىك مەكەمەلەردە جۇمىس ىستەيتىن 275 مىڭ قىزمەتكەردىڭ ەڭبەكاقىسى كوبەيىپ، ورتا ەسەپپەن 35 پايىزعا وسەدى.  وسى ماقساتتارعا 2019-2021 جىلداردا  رەسپۋبليكالىق بيۋدجەتتەن جىل سايىن 96 ميلليارد تەڭگە ءبولۋ كەرەك. وسىعان وراي، ەندى، ەڭ تومەنگى جالاقى  ەڭ تومەنگى كۇنكورىس شەگىنە بايلانىستى بولمايدى. ەڭ تومەنگى جالاقىنىڭ جاڭا مولشەرى بۇكىل ەكونوميكا اۋقىمىنداعى ەڭبەكاقى ءوسىمىنىڭ كاتاليزاتورىنا اينالادى،–دەدى پرەزيدەنت حالىققان ارناعان جولداۋىندا.

ارينە، ەلباسىنىڭ ەلدىڭ قامىن ويلاپ، ەڭ تومەنگى جالاقىنى كوتەرۋ تۋرالى تاپسىرماسى ەڭ الدىمەن ورىندالۋىمەن قۇندى بولاتىنى ءسوزسىز. بۇل ورايدا ەڭبەكاقىسى ارتاتىن ازاماتتاردىڭ ىشىندە دەنساۋلىق ساقتاۋ سالاسىنىڭ قىزمەتكەرلەرى بارشىلىق. ناقتى ايتار بولساق، بۇل سالادا قانشا ادامنىڭ ايلىعى كوتەرىلەدى؟ ءبىز بۇل ساۋالدى  دەنساۋلىق ساقتاۋ مينيسترلىگىنىڭ باسپا ءسوز قىزمەتىنە جولدادىق. بىزگە ءمالىم بولعان جاۋاپقا نازار اۋدارار بولساق، دەنساۋلىق ساقتاۋ سالاسىنىڭ ۇيىمداستىرۋشىلىق-قۇقىقتىق نىسانىنا قاراماستان  ەڭبەكاقىسى از 191 مىڭ جۇمىسشىلاردىڭ جالاقىسى 2019 جىلعى 1 قاڭتاردان باستاپ كوتەرىلەدى ەكەن. پرەزيدەنت پارمەنى دەگەن وسى.

ارينە، ەڭ الدىمەن باسقالارمەن قاتار، ادام جانىنىڭ اراشاسى بولىپ جۇرگەن ابىرويى اسقاق اق حالاتتى جانداردىڭ ايلىق جالاقىسىنىڭ كوتەرىلگەنى  دۇرىس.  دەنساۋلىق ساقتاۋ ءمينيسترى ەلجان ءبىرتانوۆ سونىمەن قاتار،  2019 جىلدان باستاپ، العاشقى مەديسينالىق-سانيتارلىق كومەك كورسەتەتىن دارىگەرلەردىڭ جالاقىسىن 20 پايىزعا كوتەرۋ قاراستىرىلىپ وتىرعانىن ايتتى.

ەركىن قالدان