2018 جىلدىڭ 5 جەلتوقسان كۇنى قازاقستان رەسپۋبليكاسى مادەنيەت جانە سپورت مينيسترلىگىنىڭ ۇيىمداستىرۋىمەن استانا قالاسىندا «قازاقستان» ورتالىق كونسەرت زالىندا ءداستۇرلى رەسپۋبليكالىق پاتريوتتار فورۋمى ءوتتى.

سالتاناتتى شاراعا قازاقستاننىڭ بارلىق وڭىرىنەن 200 دەلەگات قاتىستى. ولاردىڭ ىشىندە ءوز كاسىبىنىڭ ۇزدىك وكىلدەرى، ەل ءۇشىن قالتقىسىز قىزمەت ەتىپ جۇرگەن: ورتالىق مەملەكەتتىك ورگانداردىڭ وكىلدەرى، ۇيىم باسشىلارى، ەتنو-مادەني ورتالىقتاردىڭ جەتەكشىلەرى، ۇكىمەتتىك ەمەس جانە جاستار ۇيىمدارىنىڭ جەتەكشىلەرى، ەڭبەك ارداگەرلەرى مەن زيالى قاۋىم جانە بۇقارالىق اقپارات قۇرالدارىنىڭ وكىلدەرى بار.

فورۋم بارىسىندا قازاقستان رەسپۋبليكاسى مادەنيەت جانە سپورت ءمينيسترى ارىستانبەك مۇحامەدي ۇلى مەرەيلى مەرەكەلەردىڭ توعىسىندا وتكەن «پاتريوتتار فورۋمى - 2018» قاتىسۋشىلارىن قۇتتىقتاپ، 20 جەڭىمپازدى ارنايى «جىل پاتريوتى-2018» نوميناسياسىمەن ماراپاتتادى.

ماراپاتقا يە بولعانداردىڭ قاتارىندا ورال قالالىق №5 اۆتوبۋس پاركىنىڭ كوندۋكتورى شۋداباي سەرىكقالي ماماي ۇلى بار. سەرىكقالي دوستىق اۋىلى، چۋۆاشكا ەلدى مەكەنىنىڭ كووپەراتيۆنايا كوشەسىندە جەكە تۇرعىن ءۇي ورتەنىپ جاتقان جەرىنەن ءبىر ادامدى امان ساقتاپ قالعان.

ەرلىگى كوپكە ۇلگى بولاتىن تاعى ءبىر «جىل پاتريوتى» نوميناسياسىنىڭ يەگەرى ىزماعانبەتوۆ بەرىك. ول وتىرىپ ويناۋ ۆولەيبولىنان قازاقستان قۇراماسىنىڭ كاپيتانى. لايىقتى ماراپاتقا يە بولعان سپورتشى «پاتريوت دەگەن قازاقستان ەلىنە، ونىڭ ىشىندە تۋعان جەرىنە قىزمەت جاساۋ، قانداي جاعدايدا بولماسىن بەلسەندى بولۋ، ءوز جىگەرىن، كۇشىن ەلىنە، حالقىنا ارناۋ، وزدەرىنەن كەيىنگى جاستارعا ۇلگى كورسەتۋ، كومەكتەسۋ. سونداي جاستاردىڭ ءبىرى دەپ مەنى تاڭداعان ەكەن، وسىنداي نوميناسيا الىپ جاتقانىما وتە قۋانىشتىمىن» - دەدى.

فورۋم سوڭىندا كەش قوناقتارىنا كونسەرتتىك باعدارلاما ۇسىنىلىپ، ەسترادانىڭ جارىق جۇلدىزدارى رۋحتى اندەرىن ورىندادى.