اقتوبەدە مۇمكىندىگى شەكتەۋلى جاندار كۇنىنە ارنالعان «پاراساتتى ءومىر» وڭىرلىك فورۋمى ءوتتى.

وعان وبلىستاعى مۇگەدەكتەردىڭ قوعامدىق بىرلەستىكتەرىنىڭ وكىلدەرى، سونىمەن قاتار اۋدان اكەىمدەرىنىڭ وسى سالاعا جاۋاپتى كەڭەسشىلەرى قاتىستى. بۇل مۇمكىندىگى شەكتەۋلى جانداردىڭ ماسەلەلەرىمەن اينالىساتىن ۇيىمداردىڭ جۇمىستارىن قورىتىندىلايتىن جىل سايىنعى شارا. قوعامدىق ۇيىمدار وڭىردە اتالمىش باعىتتا اتقارىلىپ جاتقان اۋقىمدى قىزمەتتەر جايىندا ايتىپ بەردى.

- مەن ءار ادامنىڭ بىلىمدىلىگى مەن تاربيەسى ونىڭ تۇرمىسى ناشار تۇرعىندارعا، كوپبالالى وتباسىلارعا جانە اسىرەسە مۇمكىندىگى شەكتەۋلى جاندارعا قانشالىقتى كومەك پەن قولداۋ كورسەتۋگە دايىن ەكەندىگىمىەن باعالانادى دەپ ويلايمىن. بۇعان جالپى ەلباسى ساياساتى دا باعىتتالعان. پرەزيدەنتتىڭ اعىمداعى جولداۋى دا الەۋمەتتىك سيپاتتا. جولداۋ ەڭ الدىمەن ءاربىر قازاقستاندىق ءۇشىن قولايلى جاعداي جاساۋ ءۇشىن باعىتتالعان، - دەدى وبلىس اكىمى بەردىبەك ساپاربايەۆ ءوزىنىڭ قاتىسۋشىلارعا ارناعان سوزىندە.

ءوڭىر باسشىسى مەملەكەت پەن قوعامنىڭ بار كۇشى مۇمكىندىگى شەكتەۋلى جاندارعا بارلىق جاعداي جاساۋ ءۇشىن باعىتتالۋى كەرەك ەكەنىن اتاپ ءوتتى. سوندىقتان، مەملەكەتتىك ورگاندار مەن قوعامدىق ۇيىمداردىڭ جۇمىسىندا مۇگەدەكتەرگە قانداي دا ءبىر ماماندىق الۋعا مۇمكىندىك بەرەتىن جوبالار مەن باعىتتارعا باسىمدىق بەرىلەدى. ماسەلەن، اكىمنىڭ سوزىنشە قازىرگى تاڭدا مۇگەدەكتەردى ماسساج جاساۋشى ماماندىعىنان باسقا ءتىس دارىگەرى ماماندىعىنا دا وقىتىپ جاتىر.

ول سونداي-اق، كاسىپورىندار مەن ءتۇرلى كومپانيا باسشىلارىمەن ولار مۇگەدەكتەرگە بوس جۇمىس ورىندارىن ءبولۋ تۋرالى زاڭ تالابىنا قارسى كەلمەۋلەرى ءۇشىن جۇمىستار جۇرگىزىلىپ جاتقاندىعىن اتاپ ءوتتى. الەۋمەتتىك جاۋاپكەرشىلىك تانىتىپ، حالىقتىڭ وسى ساناتىنا جۇمىس ورىندارىن اشقانداردى مىسالعا الدى. اكىمنىڭ مالىمەتىنشە، بيىل مۇمكىندىگى شەكتەۋلى 800 ادام جۇمىسقا ورنالاسقان.

بۇل رەتتە دەنساۋلىعىندا كىناراتى بار اقتوبەلىكتەر، سونىڭ ىشىندە جاستاردىڭ وزدەرى جاقسىلىققا ۇمتىلىپ، ماقسات قويىپ، سوعان جەتۋلەرى كەرەك،

ءوز كەزەگىندە سال ازاماتتاردى قورعاۋ قوعامىنىڭ ءتورايىمى قۇرالاي بايمەنوۆا مۇگەدەكتەردىڭ قۇقىعىن قورعاۋ سالاسىندا جۇرگىزىلىپ جاتقان جۇمىستار مەن كورسەتىلگەن قولداۋ ءۇشىن العىسىن ءبىلدىردى. ول سونداي-اق، مۇمكىندىگى شەكتەۋلى جانداردى بەلسەندى بولىپ، تۇيىقتالىپ قالماۋعا شاقىردى.

- ءبىزدىڭ فورۋمدار ءوز فورماتىن، تاقىرىبىن جىل سايىن وزگەرتىپ وتىرادى. زيان كەلتىرمە، كۇندەلىكتى كەم دەگەندە ءبىر ادام قامقورلىقتى، ماحاببات پەن جىلۋلىقتى سەزىنۋ ءۇشىن ءىس جاسا»، - دەدى ول.

فورۋم كەزىندە مۇگەدەكتىگى بار ازاماتتاردى قورعاۋعا باعىتتالعان قوزعالىسقا ۇلكەن ۇلەس قوسىپ، مۇگەدەكتەردى الەۋمەتتىك قورعاۋ سالاسىنداعى كوپجىلدىق ەڭبەگى مەن بەلسەندى ومىرلىك ۇستانىمى ءۇشىن ۇكىمەتتىك ەمەس بەس ۇيىمنىڭ باسشىلارى وبلىس اكىمى اتىنان ماراپاتتالدى. سونداي-اق، مۇمكىندىگى شەكتەۋلى ەڭ بەلسەندى ون اقتوبەلىك العىس حاتتار الدى.

«ينۆاتاكسي» كولىك قىزمەتىن دامىتۋ ماقساتىندا «حالىق» قايىرىمدىلىق قورى قازاقستاننىڭ حالىق بانكىمەن بىرلەسە قۇرالاي بايمەنوۆاعا شاعىن اۆتوبۋستىڭ كىلتىن تابىس ەتتى. «گاز 32212» ماركالى ءاۆتوموبيلى ارباعا تاڭىلعان مۇگەدەك جانداردى تاسىمالداۋعا ارنالعان جانە اقتوبە قالاسىنا قىزمەت كورسەتەدى، سونىمەن قاتار، قارعالى، اقجار، جاڭاقونىس جانە قۇراشاساي اۋىلدارىنا قاتىنايتىن بولادى.

وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ مالىمەتىنشە بۇگىندە وڭىردە 25 مىڭنان اسا مۇگەدەك تۇرادى، ولاردىڭ 3 مىڭنان استامى بالالار. حالىقتىڭ وسى ساناتىنىڭ ءتۇرلى قاجەتتىلىكتەرى ءۇشىن، سونىڭ ىشىندە تەحنيكالىق قوسالقى قۇرالداردى ساتىپ الۋعا، شيپاجايدا ەمدەلۋگە جانە تاعى دا باسقالار ءۇشىن 2018 جىلى بيۋدجەتتەن 1،8 ميلليارد تەڭگە بولىنگەن. ءتۇرلى ۇكىمەتتىك ەمەس ۇيىمدار مۇگەدەكتەردى وڭالتۋعا جانە تۇرمىسىن جاقسارتۋ ءۇشىن نەشە ءتۇرلى قىزمەتتەردى بەلسەندى كورسەتۋدە.