الماتىدا «ۇلى دالانىڭ جەتى قىرى» اتتى بىرەگەي كورمە اشىلدى. كونە جادىگەرلەر ەكسپوزيسياسى قويىلعان كورمەگە كەلۋشىلەر ەلىمىزدە كوپشىلىك نازارىنا العاش رەت ۇسىنىلعان عۇنداردىڭ بىرەگەي ءالفاۆيتىن تاماشالادى. كورمەدەگى ەڭ قۇندى ەكسپونات تا وسى. 136 ارىپتەن تۇراتىن ءالفاۆيتتى جۇڭگو عالىمدارى ءارتۇرلى ەلدە تابىلعان  ارحەولوگيالىق ولجالار نەگىزىندە قايتا قۇراستىرعان.

بۇدان بولەك، كورەرمەندەر ساندىك-قولدانبالى ونەر ەسكەرتكىشتەرىنىڭ كوشىرمەلەرىمەن، ءتۇرلى كەزەڭدەگى ارحەولوگيالىق بايلىقتارمەن جانە كونە تۇرىك جازبالارىمەن  تانىستى. اتاپ ايتقاندا،  كۇلتەگىننىڭ بەينەلەرى، ەجەلگى تونىكوك جازبالارى جانە ارالتوبەنىڭ سارمات داۋىرىندەگى «التىن ادام» بەينەسى كوپتى قۋانتتى.  

ەكسپوناتتار قاتارىنان قازاق جەرىنەن تابىلعان 3 التىن ادامنىڭ ءبىرىن كورۋگە بولادى. سونداي-اق، شىلىكتى جانە جالاۋلى ەسكەرتكىشتەرى ماڭىنان شىققان ساق كەزەڭىندەگى التىن ستيلدىك بەينەلەرى بار كوپتەگەن ەكسپوناتتار دا كوز قۋانتتى. 

«ءوزىنىڭ پاتشالارىن التىنعا وراپ قويۋ – تەك ساقتارعا عانا ءتان ءداستۇر. ساقتارعا دەيىن دە، ساقتاردان كەيىن دە مۇنداي ءداستۇر بولعان جوق. ساقتاردىڭ زامانىندا ءتۇستى مەتاللۋرگيا كەرەمەت دامىعان. ءتۇستى مەتاللۋرگيانىڭ تەحنولوگياسى، ونىڭ قۇيۋ تەحنولوگياسى دامىعانى سونشالىق، اشەكەي بۇيىمدار كەرەمەت كوپ بولعان. ۇلى دالانىڭ 7 قىرىنىڭ ءبىرى – ۇلى دالا اپايتوسىندە ورنالاسقان قازاق جەرىنەن تابىلعان وسى التىن ادامدار»، – دەدى ءال-فارابي اتىنداعى ءقازۇۋ-دىڭ تاريح، ارحەولوگيا جانە ەتنولوگيا فاكۋلتەتىنىڭ پروفەسسورى ابدەش تولەۋبايەۆ.

جالپى، تاريحي-كوركەم ەكسپوزيسيا ءۇش بولىكتەن تۇرادى. «ۇلى دالانىڭ جەتى قىرى» كورمە زالىندا ەجەلگى زاماننىڭ تاريحى كورسەتىلسە، «الاش مۇراتى» اتتى كەلەسى زالدا حح عاسىر باسىنداعى قازاق تاريحى پاش ەتىلەدى. وندا تاۋەلسىزدىك ءۇشىن قۇربان بولعان ارىستاردىڭ ەسكەرتكىشتەرى مەن ولاردىڭ قۇندى ەڭبەكتەرى ۇسىنىلعان. ال «ماڭگىلىك ەل» اتتى زالدا تاۋەلسىزدىككە  قول جەتكىزۋ جولىنداعى زاماناۋي شىندىقتار كەلتىرىلگەن.

اتالمىش كورمە ءال-فارابي اتىنداعى قازاق ۇلتتىق ۋنيۆەرسيتەتىنىڭ كىتاپحاناسىندا جۇمىس ىستەپ تۇر. قۇندى جادىگەرلەردى تاماشالاعىسى كەلەتىندەر ءۇشىن ەسىك اشىق.