الماتىدا جاس اقىن جاقسىلىق قازىمۇرات ۇلىنىڭ «اپكە» جىر جيناعىنىڭ تۇساۋكەسەرى ءوتتى
«جامبىل» اتىنداعى كىتاپحانادا وتكەن شاراعا اقىن-جازۋشىلار مەن جىر سۇيەر قاۋىم جيىلدى. اتالعان جىر جيناق ەكى بولىمنەن تۇرادى. العاشقى بولىمىندە اقىننىڭ ەلگە، جەرگە دەگەن سۇيىسپەنشىلىگىنەن تۋعان ولەڭدەر بولسا، كەيىنگىسىندە ماحاببات تاقىرىبىنداعى ليريكالىق جىرلار توپتاستىرىلعان. «اپكە» كىتابىنىڭ تۇساۋىن اقىننىڭ ۇستازى كاكەن قامزين مەن ءامىرحان مەڭدەكە كەستى.
«اراعا ءبىراز ۋاقىت سالىپ وسى جيناقتى ۇسىندىق. اپكەنى جاقسى كورۋ ارقىلى ۇمىتىلىپ بارا جاتقان قاسيەتتى قايتادان ءبىر وياتسام، ادامدار وزدەرىنىڭ اپكەلەرى تۋرالى، كەز-كەلگەن ادام ءوزىنىڭ ءبىر جانىنا جاقىن اپكەسى تۋرالى ويلانسا ەكەن، ەسكە السا ەكەن، قۇرمەت بىلدىرسە ەكەن، ءىلتيپات بىلدىرسە ەكەن دەگەن تىلەگىم بار»، – دەدى اقىن جاقسىلىق قازىمۇرات ۇلى.
ادەبي كەشتە جاقسىلىق قازىمۇرات ۇلىنىڭ جاڭا ولەڭدەرى وقىلدى. شايىردىڭ بۇعان دەيىن دە «قارالا سىرماق»، «جاپىراق جاۋعان كۇز» جىر جيناقتارى جارىق كورگەن. جانە ول پاتريوتتىق ولەڭدەرى ارقىلى وقىرماننىڭ ىستىق ىقىلاسىنا بولەنگەن. اعا بۋىن وكىلدەرى جاس اقىننىڭ تۋىندىلارىنا وزدەرىنىڭ وڭ باعاسىن بەرىپ، شىعارماشىلىق تابىس تىلەدى.
«مىنا جاقسىلىقتىڭ بويىندا كاسىبي تالانت تا بار، اقىندىق تالانت تا بار، رەداكتورلىق تالانت تا بار، مەنەدجەرلىك تە تالانت بار. مىنە، بارلىعىنىڭ باسىن قوسقاندا كەلىپ مۋلتيمەديالىق جۋرناليستيكا شىعادى. شاكىرتتەرىمىزدىڭ وسىلاي وسكەنىنە، ىلگەرى باسقانىنا ءبىز ءارۋاقىتتا قۋانامىز»، – دەدى جازۋشى، فيلولوگيا عىلىمدارىنىڭ دوكتورى كاكەن قامزين.
پىكىر قالدىرۋ