مۇمكىندىگى شەكتەۋلى جاندار ۇنەمى نازاردا! 3 جەلتوقسان – حالىقارالىق مۇگەدەكتەر كۇنىنە ارنالعان «قايىرىمدىلىق ءىس» اتتى ايلىق ءىس-شارا جالعاسىن تابۋدا.

بۇگىن الماتى قالاسىنداعى بۇقارالىق اقپارات قۇرالدارى وكىلدەرى مەن تانىمال تۇلعالار قوعامنىڭ ءالسىز توبىنىڭ كەيپىنە ەنىپ كوردى. قابانباي باتىر كوشەسىنىڭ بويىمەن 800 مەتردەي جولدى مۇگەدەكتەر ارباسىمەن ءجۇرىپ وتكەن ولار وسى ۋاقىت ارالىعىندا قاراپايىم حالىقتىڭ مۇمكىندىگى شەكتەۋلى جاندارعا دەگەن كوزقاراسىن ءبىلدى. سونىمەن قاتار، كوزدەرىن جاۋىپ اس ءىشىپ، زاعيپ جانداردىڭ ءومىرىن سەزىندى.  

«ءبىز بۇگىن ازداعان ۋاقىت مۇمكىندىگى شەكتەۋلى جانداردىڭ قول ارباسىمەن ءجۇرىپ كوردىك. بار بولعانى 20-30 مينۋت كەتسە دە، وتە قيىن بولدى. ءوزىڭدى كەرەكسىز ادامداي، ءۇمىتى جوق جانداي سەزىنەسىڭ. قىدىرۋعا ىڭعايلى، وتباسىلىق دەمالىسقا ارنالعان ورتالىقتاعى پانفيلوۆ كوشەسىنىڭ ءوزى مۇمكىندىگى شەكتەۋلى جاندارعا ارنالماعان ەكەن. مۇگەدەكتەر ءۇشىن جاياۋ جۇرگىنشى جولاعىنان ءوتۋ ءتىپتى قيىن. سونداي-اق، جاڭا المالى مەتروسىنا بارىپ، تۇسۋگە تىرىستىق. شاقىراتىن قوڭىراۋ جوق. ال بالمۇزداق جەيىن دەسەك، دۇكەندەرگە قول اربامەن بارۋعا مۇمكىندىك قاراستىرىلماعان. كوشەنىڭ جوسپارىن جاساعان دا وسىنداي ماسەلەلەرگە ءمان بەرسە دەيمىن»، – دەدى قوعام بەلسەندىسى باۋىرجان سەرىك.