ۇكىمەتتىك ەمەس ۇيىمداردى قولداۋعا بەرىلەتىن گرانتتار جاڭا ەرەجە بويىنشا بەرىلەدى.
بۇعان دەيىن الەۋمەتتىك جوبالاردى قارجىلاندىرۋعا قاراجاتتى تەك قوعامدىق دامۋ مينيسترلىگى عانا بەرەتىن. ەندى ونى جەرگىلىكتى اتقارۋشى ورگان دا بەرۋگە قۇقىلى بولماق. بۇل تۋرالى الماتىدا وتكەن ءحى ازاماتتىق فورۋمدا «ازاماتتىق باستامالاردى قولداۋ ورتالىعى» كوممەرسيالىق ەمەس اكسيونەرلىك قوعامىنىڭ ءتوراعاسى نۇرلان وتەشوۆ ايتتى.
فورۋم بارىسىندا استانادا ەلباسىنىڭ قاتىسۋىمەن بولاتىن VIII رەسپۋبليكالىق ازاماتتىق فورۋمعا قالا اتىنان قاتىساتىن 30 دەلەگات ىرىكتەلدى.
«كەلەسى جىلدان باستاپ تەك رەسپۋبليكالىق دەڭگەيدە عانا ەمەس، سونىمەن قاتار، قالالىق بولسىن، اۋداندىق بولسىن، ايماقتىق دەڭگەيدە دە مەملەكەتتىك گرانتتاردى ىسكە اسىرۋدى قولعا الماقپىز. ونى ءبىز زاڭناما تۇرىندە دايىندىقتى وتكىزگەن بولاتىنبىز. ەندى جۇمىستى ارى قاراي اتقارۋ ءۇشىن ۇكىمەتتىك ەمەس ۇيىمداردىڭ بەلسەندىلەرىنە جىلدىڭ اياعىنا دەيىن جوسپارعا ءمان بەرۋى كەرەك ەكەنىن ايتپاقپىز»، – دەدى «ازاماتتىق باستامالاردى قولداۋ ورتالىعى» كوممەرسيالىق ەمەس اكسيونەرلىك قوعامى ءتوراعاسى نۇرلان وتەشوۆ.
«شىندىعىن ايتقاندا، كوپتەگەن ۇيىمداردىڭ اتى بار دا، زاتى جوق. كوپتەگەن ۇيىمدار ناقتى ءبىر جوبالارعا قاتىستى تىركەلەدى. قاراجاتى بولسا جۇمىس ىستەيدى، قالعان ۋاقىتتا جۇمىس ىستەمەيدى دەگەندەي. سول ۇيىمداردىڭ ماسەلەسىن رەتتەۋ كەرەك. شىن مانىندە، 20-30 جىل بويى تۇراقتى جۇمىس ىستەپ، جىلدان-جىلعا جۇمىسىن ۇدەتىپ جاتقان ۇيىمدار دا جوق ەمەس. قالعانى دا سونداي دەڭگەيگە جەتۋى ءتيىس. بۇل تەك بيۋدجەتتىڭ ماسەلەسىنە تىرەلمەۋى كەرەك. مۇددەنىڭ ماسەلەسى بولۋى كەرەك»، – دەيدى ساياساتتانۋشى ايدوس سارىم.
بۇگىنگى تاڭدا ەلىمىزدە 20 مىڭعا جۋىق ۇكىمەتتىك ەمەس ۇيىم بولسا، ونىڭ 20 پايىزى الماتىدا ورنالاسقان. ازاماتتىق فورۋمدا قوعامدىق كەڭەستىڭ مارتەبەسىن كوتەرۋ جايى ءسوز بولدى.
«بۇل العاشقى قوعامدىق كەڭەس. ول ارى قاراي ونىڭ جۇمىسى قانداي بولادى، ولار قالاي ىرىكتەلەدى، قالاي تاڭدالىپ الىنادى، ولاردىڭ كولەمى، ادام سانى قانشا بولادى دەگەن سياقتى ماسەلەلەردىڭ بارلىعى وزەكتى بولىپ وتىر. سوندىقتان وسى ماسەلەلەر دە تالقىلاندى»، – دەدى الماتى قالاسى قوعامدىق كەڭەسىنىڭ مۇشەسى داۋرەن بابامۇراتوۆ.
