الماتىدا بيلىك باسىنداعىلار مەن كاسىپكەرلەر قالاداعى كوشەلەردى مودەرنيزاسيالاۋدىڭ شاعىن جانە ورتا بيزنەسكە تيگىزگەن اسەرىن تالقىعا سالدى.

قازىرگى تاڭدا «جۇرگىنشىلەرگە ارنالعان قالا» جوباسى اياسىندا 500 كوشە جانە 1400-گە جۋىق ەسكى اۋلا جوندەۋدەن وتكەن. جاڭارتىلعان قالا كوشەلەرىندەگى كاسىپكەرلىك بەلسەندىلىگى مەن تاۋار اينالىمى 15-تەن 40 پايىزعا دەيىن ارتقانىن جۇرگىزىلگەن زەرتتەۋ دالەلدەپ وتىر. جىل باسىنان بەرى بيزنەستىڭ 50-دەن استام جاڭا نىسانى اشىلعان. قالا اكىمىنىڭ ورىنباسارى الماس مادييەۆتىڭ سوزىنشە، كاسىپكەرلەر تاراپىنان ايتىلاتىن پىكىرلەر ەسكەرۋسىز قالمايدى.  

«ءبىز ءبىر ورىندا قالىپ، قالانى جاڭارتۋدان باس تارتا المايمىز. ەگەر كىمدە-كىم ءتيىستى كەلۋشىلەردەن ايىرىلىپ، ساتۋ دەڭگەيى تومەندەسە، قالا تاراپىنان كومەكتەسۋگە، نارىقتا دامۋعا، نەسيە راسىمدەۋگە قاشاندا دايىنبىز. رەفورمالار قالادا جايلى جاعداي جاساپ، تۇرعىنداردىڭ ءومىر ءسۇرۋ ساپاسىن ارتتىرۋعا باعىتتالعان. سونداي-اق، شاعىن جانە ورتا بيزنەستى، ەكونوميكانى تۇراقتى دامىتۋدى دا قاتار الىپ جۇرەمىز. قازىرگى تاڭدا ەكونوميكاداعى ساۋدا كولەمى 33 پايىزدى قۇرايدى. تاۋار اينالىم كورسەتكىشىن ازايتپاۋ كەرەك. جاڭارتىلعان كوشەلەردە حالىققا دا، ۆەلوسيپەد مىنگەندەرگە دە جاعداي جاسالعان»، – دەدى الماتى قالاسى اكىمىنىڭ ورىنباسارى الماس مادييەۆ.

ءوز كەزەگىندە، شاعىن جانە ورتا كاسىپكەرلىك وداعىنىڭ باسشىسى تيمۋر جاركەنوۆ قالا ساياساتىنىڭ قوعامدىق كەڭىستىكتى وزگەرتۋگە دەگەن نيەتىنە قولداۋ ءبىلدىردى. تەك جەرگىلىكتى بيلىكتەن كەيبىر ناقتى ماسەلەلەرە جەكەلەي نازار اۋدارۋىن سۇرادى.

«تاعى دا قايتالايمىن، تاماشا جۇمىس اتقارىلىپ جاتىر. دەگەنمەن، كىشىگىرىم ماسەلەلەر بار. كەي تۇستا كاسىپكەرلەردىڭ دە پىكىرى ەسكەرىلسە ەكەن. ايتقاندارىمىز تاجىريبەدە ىسكە اسسا دەيمىز. ءبىز ۆەلوجولاققا، جۇرگىنشىلەر جولىنا زيان كەلتىرمەستەن، كەيبىر ماسەلەلەردى رەتتەۋگە ۇسىنىس جاساۋعا مۇمكىندىك الساق ەكەن»، – دەدى شاعىن جانە ورتا كاسىپكەرلىك وداعىنىڭ باسشىسى تيمۋر جاركەنوۆ.