بيىل الماتىنىڭ الاتاۋ اۋدانىنا 10 جىل. 250 مىڭنان اسا تۇرعىنى بار اۋدان جىل سايىن قارىشتاپ دامىپ كەلەدى. العاشىندا اۋدان اۋماعى 8 200 گەكتار بولسا، وسى كۇنى ونىڭ كولەمى 10 مىڭ گەكتاردان اسىپ جىعىلادى. مۇندا 10 جىلدىڭ ىشىندە سالىق ءتۇسىمى 4 ەسە ءوستى. ينۆەستيسيا 9، تاۋار اينالىمى 1 مىڭ ەسە وسكەن.
گۇلجان بەكەنوۆا 2001 جىلدان بەرى «شاڭىراق» ىقشاماۋدانىندا تۇرىپ كەلەدى. ايتۋىنشا، الاتاۋ اۋدانى كوز الدىندا دامۋدا. ءوزى ديرەكتور بولىپ قىزمەت ەتىپ وتىرعان وسى مەكتەپتىڭ دە قۇرىلىسىن ءوز كوزىمىزبەن كوردىك دەيدى. ءقازىر مۇندا 2 800-گە تارتا وقۋشى ءبىلىم الىپ جاتىر. گۇلجان مىرزالى قىزى كەلەسى جىلى وسى ءبىلىم وشاعىنداعى بارلىق ءمۇعالىمنىڭ جالاقىلارى وسەتىنىن ايتتى.
«قاي كەزدە دە ءبىلىم سالاسىنا كوڭىل ءبولىنىپ جاتىر. ەلباسى وتە جاناشىرلىقپەن قاراپ، بيىلعى 10 جىلدىققا قاتار، ءوزىنىڭ جولداۋىن حالىققا جاريالاپ وتىر. بىزدە قازىرگى تاڭدا 196 ءمۇعالىم قىزمەت اتقارىپ جاتىر. جالپى، بارلىق ۇستازدىڭ ايلىعى كوبەيەدى دەپ ۇلكەن سەنىم ارتىپ وتىرمىز. ول ماسەلە جولداۋدا دا قاراستىرىلعان بولاتىن»، – دەدى الماتى قالاسى №169 مەكتەپ-ليسەيىنىڭ ديرەكتورى گۇلجان بەكەنوۆا
اۋداندا 12 مەكتەپ، 98 بالاباقشا، 12 دەنساۋلىق ساقتاۋ مەكەمەسى اشىلعان. 2،7 ملن شارشى مەتردى قۇرايتىن كوپقاباتتى ۇيلەر سالىندى. سونداي-اق، بيىلعى جىلى 600 ورىندىق مەكتەپ پەن 880 ورىنعا 4 بالاباقشا پايدالانۋعا بەرىلمەك. سونداي-اق، الداعى جىلدارى 350 ورىندىق اۋرۋحانا، ءارقايسىسى كۇنىنە 200 ادام قابىلداي الاتىن 2 ەمحانا جانە ءبىرقاتار شاعىن اۋدانداردا بالاباقشالار سالۋ كوزدەلگەن.
ەلباسىنىڭ يندۋستريالاندىرۋ باعدارلاماسى شەڭبەرىندە اۋداندا 490 گەكتار اۋماقتا يندۋستريالدى ايماق قالىپتاستى. بۇگىنگى كۇنى 4 كاسىپورىن ىسكە قوسىلىپ، تاعى 10 كاسىپورىننىڭ قۇرىلىسى جۇرگىزىلۋدە. مۇندا جوعارى تەحنولوگيالى كابەل ونىمدەرىن شىعاراتىن زاۋىت، گابيون تورىن جاسايتىن جاپوندىق كاسىپورىن جانە يتالياندىق تەحنولوگيامەن قوقىس سۇرىپتاۋ كەشەنى جۇمىس ىستەپ تۇر. سونداي-اق، الداعى ۋاقىتتا حيميا، جيھاز، كولىك، دارى-دارمەك، تاعام جانە تاعى باسقا كاسىپورىندار قۇرىلىسىن سالۋ جوسپارلانعان. اۋداندا كاسىبىن دوڭگەلەتىپ وتىرعان ازاماتتار جاعدايدىڭ بارىنشا جاسالعانىن ايتادى.
«ەڭ باستىسى، اۋدان باسشىلارى ءبىزدىڭ جۇمىس ىستەۋىمىزگە كەدەرگى كەلتىرمەيدى. الدىمەن ورىنسىز تەكسەرۋلەر ازايدى. العاشىندا الاتاۋ اۋدانىندا كاسىپورىندار از بولدى. ءقازىر ولاردىڭ سانى جىل سايىن كوبەيىپ كەلەدى. كاسىپكەرلەر دە جاعداي جاسالعان جەرگە قاراي ىعىسادى عوي. سوندىقتان ەش قيىندىقسىز مۇندا جۇمىسىڭدى جۇرگىزۋگە بولادى»، – دەيدى ەتتى قايتا وڭدەۋ سەحىنىڭ ديرەكتورى سەرگەي اليمپييەۆ.
اۋدان قۇرىلعالى بەرى مۇندا بىرنەشە مادەني جانە سپورت نىساندارى بوي كوتەردى. اتاپ ايتقاندا، «الاتاۋ» ءداستۇرلى ونەر تەاترى، مۋلتيمەديالىق ءداستۇرلى مۋزىكا ورتالىعى جانە قولونەر شەبەرلەرى ورتالىعى. سونىمەن قاتار، اۋداندا ۋنيۆەرسيادا وتكەن «الماتى ارەنا» سپورت كەشەنى ورنالاسقان. وسى كۇنى بۇل عيمارات حالىق يگىلىگىنە بەرىلگەن. ءقازىر جەرگىلىكتى تۇرعىندار وسىندا كەلىپ، سپورتپەن شۇعىلدانۋدا.
الاتاۋ اۋدانىندا 10 جىلدىڭ ىشىندە 223 شاقىرىم ەلەكتر جەلىسى، 276 شاقىرىم ماگيسترالدى گاز، 406 شاقىرىم اۋىز سۋ جانە 198 شاقىرىم كارىز قۇبىرلارى تارتىلعان. سونداي-اق، 93 شاقىرىم جول، 3 جولايرىعى جانە 15 اسپالى جۇرگىنشىلەر كوپىرى سالىندى. الداعى ۋاقىتتا ىقشاماۋداندارداعى جولدى جاڭارتۋ باستى ماقسات بولىپ وتىر ەكەن.
«بىزدە كوپتەگەن كارىز جۇيەسى مەن سۋ جەلىلەرى سالىندى. بۇگىنگى كۇنى 500-گە جۋىق شاقىرىم كارىز جۇيەسى مەن سۋ جەلىلەرى سالىنعان. بيىلعى ەڭ ءبىرىنشى جوسپارىمىز – سول كوشەلەر مەن ىقشاماۋدانعا جول سالۋ»، – دەدى الماتى قالاسى الاتاۋ اۋدانىنىڭ اكىمى شاحمەردەن رىسپايەۆ.
وسى كۇنى الاتاۋ اۋدانىندا 255 مىڭنان اسا تۇرعىن ءومىر ءسۇرىپ جاتىر. بيۋدجەت ەسەبىنەن اۋدانعا 430 ميلليارد تەڭگەدەن استام قارجى ءبولىنىپ، 20 مىڭنان كوپ جۇمىس ورنى اشىلعان. ءقازىر تۇرعىنداردىڭ ورتاشا جالاقىسى 60 مىڭ مەن 160 مىڭ تەڭگە ارالىعىندا.
