المازبەك اتامبايەۆ: مەن سول كەزدە نازاربايەۆتى اشىق سىناعانىم ءۇشىن وكىنبەيمىن

قىرعىزستاننىڭ بۇرىنعى پرەزيدەنتى  المازبەك اتامبايەۆ Kaktus.media اقپارات اگەنتتىگىنە بەرگەن سۇحباتىندا كەزىندە قازاقستانعا قاراتا جاعىمسىز پىكىر ايتقانىن مويىندادى جانە  سول كوزقاراسىنان ءالى دە قايتپايتىنىن ءمالىم ەتتى.

–مەن ءبىر تىرناعىن ىشىنە بۇككەن ادام ەمەسپىن. اللاتاعالا مەنى سولاي ەتىپ جاراتتى. اقتى -اق، قارانى – قارا دەپ ايتاتىن اداممىن. سوندىقتان ەشقاشان ءۇنسىز جۇرە المايمىن.

ال قازاقستان تۋرالى ايتار بولساق، ول كەزدە قىرعىزستاندا پرەزيدەنتتىك سايلاۋعا دايىندىق ءجۇرىپ جاتتى. ءدال سول تۇستا ەلدە ساياسي جاعداي شيەلەنىسىپ تۇرعان ءسات ەدى. نازاربايەۆ پرەزيدەنتتىك سايلاۋعا ءتۇسىپ جاتقان ءبىزدىڭ ءبىر ۇمىتكەردى ءوزىنىڭ اقورداسىنا شاقىرىپ سويلەستى. ونى اشىق تۇردە قولدايتىنىن ءبىلدىردى.

ال الەمدەگى جاعدايعا نازار اۋدارار بولساق، اقش پەن ەۋروپادا «ءوز كانديداتىن»  سىرتتان قولداۋ  اشىق بايقالىپ وتىر. ءتىپتى كەيبىرەۋلەرىن رەسەيلىك ازاماتتار قولداعانى ءۇشىن ۇستاپ، قاماپ جاتىر.

ال وتكەن سايلاۋدا قازاق پرەزيدەنتى نازاربايەۆ قىرعىز حالقىنىڭ الدىندا ءوزى قابىلداعان كانديداتتى اشىق قولدايتىنىن ءمالىم ەتتى. مۇنداي جاعدايدا نەگە ءۇنسىز قالۋىمىز كەرەك؟!  قىرعىزستان – تاۋەلسىز ەل.  ءبىز قازاقستان سياقتى ءىرى، باي مەملەكەت ەمەسپىز. ەگەر  ءدال ءقازىر پىكىرىمىزدى اشىق ايتىپ، ءوزىمىزدى قۇرمەت تۇتپاساق، ءبىزدى كىم قۇرمەتتەيدى؟ سول كەزدە بۇل پىكىر نازاربايەۆپەن قارىم-قاتىناسىمىزدى بۇزاتىنىن ءبىلدىم. ءبىراق حالىقتىڭ مۇددەسى ءۇشىن، قىرعىزستاننىڭ بولاشاعى ءۇشىن وسىنداي ارەكەتكە باردىم. ەندى پرەزيدەنتتىك نەمەسە پارلامەنتتىك سايلاۋ بولسىن، ءبىزدىڭ ىشكى ىسىمىزگە ەشكىم سىرتتان ارالاسا المايدى.

مەن سول كەزدە نازاربايەۆتى اشىق سىناعانىم ءۇشىن وكىنبەيمىن.

ءسوزىمدى قايتىپ المايمىن. ادام ءوزىنىڭ ابىروي بيىگىندە قالۋى كەرەك...