بۇل تۋرالى بۇگىن، ورتالىق كوممۋنيكاسيالار قىزمەتىندە بولعان بريفينگ بارىسىندا شقو اكىمى دانيال احمەتوۆ، جۋرناليستەردىڭ ونوماستيكا ماسەلەسىنە قاتىستى قويعان ساۋالدارىنا جاۋاپ بەرۋ بارىسىندا ايتتى.

- ءبىز، ارينە، تاريحي ادىلەتتىلىككە جول بەرۋىمىز كەرەك! كەشەگى كەڭەستىك-كوممۋنيستىك يدەولوگيانىڭ كولەڭكەلى تۇستارىنان دا حالىق حاباردار بولعانى ابزال. مىسالى، گولوششەكين نەمەسە كيروۆتىڭ كىم ەكەنىن ءبارىمىز جاقسى بىلەمىز جانە تۇسىنەمىز. سوندىقتان، تۇرعىنداردىڭ ۇسىنىس-تىلەكتەرىن ەسكەرىپ، ونداي كوشەلەرگە جاڭا اتاۋلار بەرىلۋ كەرەك، - دەدى د.احمەتوۆ بريفينگتە.

اكىم سونىمەن قاتار د. مەندەلەيەۆ نەمەسە س. كوروليەۆ سياقتى كوشەلەردىڭ اتاۋلارى وزگەرتۋدى قاجەت ەتپەيتىندىگىن، سول قالپىندا قالدىرۋ كەرەكتىگىن ايتىپ ءوتتى. سەبەبى اتالعان تۇلعالاردىڭ ەسىمدەرى بۇكىل الەم جاقسى بىلەدى. سول سياقتى س.نۇرماعانبەتوۆ نەمەسە قۇرمانعازى سياقتى ۇلى ادامداردىڭ اتتارىندا دا كوشە بولۋى كەرەك. كوشە اتاۋلارىن اۋىستىرۋ جۇمىستارى ەڭ الدىمەن زاڭ تۇرعىسىندا جانە جەرگىلىكتى تۇرعىنداردىڭ كەلىسىمى ارقىلى جاسالۋى كەرەك.

مىسالعا الاتىن بولساق وسكەمەندەگى كارل ماركس كوشەسى – قازىبەك بي، سەمەيدەگى لەنين كوشەسى – ماڭگىلىك ەل اتاۋىنا يە بولدى - دەدى شقو اكىمى.

ايتا كەتەيىك، ءبىر عانا، شىعىس قازاقستان وبلىسىندا سەگىز مىڭداي كوشە، مىڭنان ارتىق اكىمشىلىك-اۋماقتىق بىرلىك بار. ولاردىڭ باسىم كوپشىلىگى قازاقستاندىق بىرەگەيلىك، تاۋەلسىزدىك يدەالدارى، تاريحي ماڭىزدىلىعى تۇرعىسىنان سايكەستەندىرىلگەن. سوڭعى ەكى جىلدىڭ وزىندە 314 كوشە اۋىستى. ونىڭ 41 وبلىس ورتالىعى – وسكەمەن قالاسىندا. بيىلعى جىلى وبلىستىق ونوماستيكالىق كوميسسيا ءۇش جۇزدەي كوشەنى قايتا اتاۋ بويىنشا رەسپۋبليكاعا ءوز ۇسىنىستارىن جولداعان.