الماتىدا تاۋەلسىزدىك جىلدارى مەملەكەت باسشىسىنىڭ قولداۋى ارقاسىندا 117 وقۋ ورىندارى سالىندى. تەك سوڭعى بەس جىل ىشىندە عانا مەگاپوليستە ءبىلىم سالاسىن قارجىلاندىرۋ 37%-عا ءوستى نەمەسە 27 ملرد. تەڭگەگە جەتتى. بۇل تۋرالى الماتى اكىمى باۋىرجان بايبەك قالانىڭ پەداگوگتار قاۋىمداستىعىمەن كەزدەسۋ كەزىندە ايتتى. ونىڭ ۇستىنە بۇگىنگى كۇنى ءبىلىم سالاسىنىڭ ينفراقۇرىلىمىن دامىتۋعا ەرەكشە نازار اۋدارىلۋدا. تەك بيىلعى جىلدىڭ وزىندە عانا قۇرىلىس پەن كۇردەلى جوندەۋ جۇمىستارىنا 17 ملرد. تەڭگەدەن استام قارجى ءبولىندى.

قالانىڭ ۇزدىك پەداگوگتارىن سالتاناتتى تۇردە ۇلىقتاۋ بارىسىندا باۋىرجان بايبەك مەملەكەت باسشىسى جولداۋىن جۇزەگە اسىرۋ اياسىندا ءبىلىم جانە عىلىم مينيسترلىگىنىڭ «پەداگوگتىڭ مارتەبەسى تۋرالى» جانە «وقۋشى مەن ءمۇعالىمنىڭ جۇكتەمەسىن ازايتۋ بويىنشا ءبىرقاتار زاڭ اكتىلەرىنە وزگەرىستەر مەن قوسىمشالار ەنگىزۋ تۋرالى» زاڭداردىڭ جوبالارىن دايىنداعانىن اتاپ ءوتتى.

كەزدەسۋدى پايدالانعان قالا باسشىسى ءبىلىم سالاسى ۇيىمدارىنىڭ بارلىق پەداگوگتارىن جانە قالانىڭ اتا-انالار قاۋىمداستىعىن اتالعان زاڭ جوبالارىن تالقىلاۋعا بەلسەندى تۇردە قاتىسۋعا شاقىردى.

«ەڭ ماڭىزدىسى، جوبادان قازاقستاندىق پەداگوگتار ءوز جۇمىستارىنىڭ جوعارى باعاعا يە ەكەنىن، ءبىلىم سالاسىندا تۋىنداعان بارلىق ماسەلەلەرگە، وقۋشىلار مەن مۇعالىمدەرگە جەتە نازار اۋدارىلاتىنىن كوردى. سىزدەردىڭ قالانىڭ ءبىلىم سالاسىن دامىتۋعا قوسقان ۇلەستەرىڭىز وتە جوعارى، جاۋاپتى ءارى قيىندىعى مول ۇستازدىق قىزمەتتەرىڭىزگە العىس ايتامىن. وقۋشىلاردىڭ ءتۇرلى ءبىلىم سايىستارىندا بيىك جەڭىستەرگە جەتۋى ءارى جەكە كاسىبي بىلىكتىلىك جۇمىستارىڭىزدىڭ ساپاسىن ايقىنداي تۇسەدى»، - دەپ اتاپ ءوتتى باۋىرجان بايبەك.

ايتا كەتەرلىگى، جىل باسىنان بەرى قاراي جاڭاشا ءبىلىم بەرۋگە كىرىسكەن الماتى مۇعالىمدەرىنىڭ 70%-نىڭ جالاقىسى 30 پايىزعا ءوستى. ءوز كەزەگىندە 1 قىركۇيەكتەن باستاپ ۇلتتىق كاسىبي تەستىلەۋدەن وتكەن 1293 ءمۇعالىم العاش رەت وزدەرىنىڭ قىزمەتتىك ەڭبەكاقىسىنا 30 دان 50%-عا دەيىن قوسىمشا اقى الاتىن بولادى.

بۇلاردان وزگە، مەملەكەت اعىلشىن ءتىلىن وقىتاتىن مۇعالىمدەرگە قولداۋ كورسەتۋدە. مىنە، بيىل ەكىنشى جىل فيزيكا، حيميا، بيولوگيا مەن ينفورماتيكا پاندەرىن اعىلشىن تىلىندە وقىتاتىن مۇعالىمدەرگە قىزمەتتىك جالاقىلارىنا قوسا 200%-دىق كولەمدە قوسىمشا اقى تولەنەدى.