الماتى اكىمى باۋىرجان بايبەك «نۇر وتان» پارتياسىنىڭ جاڭارعان قوعامدىق قابىلداۋىندا ازاماتتاردى قابىلدادى. مەگاپوليس اكىمىنىڭ تۇرعىندارمەن كەزدەسۋى كەزىندە قوعامدىق كولىكتى مودەرنيزاسيالاۋ، جاڭا مەكتەپتەر مەن جولدار سالۋ، قالا بازارلارىن رەكونسترۋكسيالاۋ ماسەلەلەرى قارالدى.
مىسالى، ءۇش بالانىڭ اناسى ءاليا جالعاسبايەۆا قالا باسشىسىنا «دارحان» ىقشام اۋدانىندا مەكتەپ سالۋ قاجەتتىگىن ايتتى. قازىرگى كەزدە الاتاۋ اۋدانىندا وقۋشى ورنىنىڭ جەتىسپەۋشىلىگى ايقىن بايقالادى. ويتكەنى، تەك سوڭعى ءۇش جىل ىشىندە عانا مۇندا وقۋشى سانى مىڭنان اسىپ كەتكەن. بۇل ماسەلەنى شەشۋ ءۇشىن باۋىرجان بايبەك مىڭ ورىندى مەكتەپ سالۋعا قاتىستى جەر تەلىمىن ىزدەستىرۋدى جانە قاجەتتى جسق جاساۋدى تاپسىردى.
«قازىرگى كەزدە سالىنىپ جاتقان تۇرعىن ۇيلەردىڭ 70%-ى جاڭا قوسىلعان اۋداندارعا تيەسىلى. قاجەتتى ينفراقۇرىلىم جاسالۋدا، يندۋستريالدى ايماق دامىپ، جاڭا جۇمىس ورىندارى اشىلۋدا. كەلەر جىلى جول جوندەۋگە قارجى بولىنەدى، جارىق كوزدەرى ورناتىلادى. «دارحان» ىقشام اۋدانى تۋرالى ايتار بولساق، مەن بۇل پروبلەمانى بىلەمىن. قالادا بوس جاتقان جەر تەلىمدەرى جوقتىڭ قاسى، سونىڭ سالدارىنان جاڭا الەۋمەتتىك قۇرىلىس سالۋ قيىنداۋدا. مەن مەكتەپ سالاتىن جەر ۋچاسكەسىن ىزدەستىرۋدى، سوعان قاتىستى جسق دايىنداۋدى تاپسىردىم. جالپى، كەلەر جىلى ءبىز 8 جاڭا مەكتەپ سالاتىن بولامىز»، - دەدى قالا باسشىسى.
ءوز كەزەگىندە زاعيپتاردىڭ «كومەكتەس» قوعامدىق قورىنىڭ باسشىسى الەكساندر ساپەلكين قالا باسشىسىنا قوعامدىق كولىكتەرگە باعىتتىڭ ءنومىرى تۋرالى داۋىستاپ حابارلايتىن قوندىرعى ورناتۋ تۋرالى ۇسىنىس ايتتى. ول سونىمەن قاتار الماتىنىڭ بوستاندىق اۋدانىنىڭ «الاتاۋ» ەلدى مەكەنىنە جاڭا اۆتوبۋس باعىتىن اشۋدى سۇاردى.
«جىل بويىنا مىنانى جاسايمىز، اۆتوبۋستاردىڭ 100%-ىنا داۋىستاپ حابارلاۋ قوندىرعىسى ورناتىلادى، جاقىن ارادا «الاتاۋ» ىقشام اۋدانىنا قاتىنايتىن جاڭا باعىت اشىلاتىن بولادى. جالپى، قوعامدىق كولىك سالاسىندا پروبلەمالار وتە كوپ. سوندىقتان ءبىز ۇلكەن كولىك رەفورماسىن جۇرگىزىپ وتىرمىز. مەن ءوزىم گاگارين-وتەپوۆ كوشەلەرىنىڭ بويىندا تۇردىم. كۇندە تاڭەرتەڭگىسىن وقۋعا، ودان سوڭ جاتتىعۋعا باراتىنمىن، ۇيگە ءجيى كەش ورالاتىنمىن. كەيدە جاياۋ جۇرەتىنمىن، ويتكەنى، كەشكە قاراي اۆتوبۋستار جۇرمەيتىن. ابىلاي حاننىڭ، ودان سوڭ ابايدىڭ، جەلتوقسان مەن تيميريازيەۆتىڭ بويىمەن وتەپوۆ كوشەسىنە دەيىن جاياۋ جۇرەتىن ەدىم. مەن ەسكى اۆتوبۋستاردى جاقسى بىلەمىن، ءىشى لىق تولى بولاتىن، بەكەتتەرگە توقتامايتىن، داۋىستاپ حابارلاۋ دەگەن تۇسكە ەنەتىن. ەكى جىل ىشىندە ءبىز تاسىمالداۋشىلاردىڭ بارلىق كولەڭكەلى ەكونوميكاسىن سىترقا شىعاردىق، ءتيىستى ينفراقۇرىلىمدى جاسادىق. 600-دەن استام جاڭا اۆتوبۋستار الدىق. مامىرعا دەيىن تاعى 716 جاڭا اۆتوبۋس ساتىپ الۋ جوسپارلانعان. ءبىز ءقازىر ادامداردىڭ اۆتوبۋس بەكەتتەرىندە ۇزاق تۇرىپ قالماۋلارى، قوعامدىق كولىكتىڭ دەر كەزىندە كەلۋى ءارى تۇنگە دەيىن ءجۇرۋى، جۇرگىزۋشىلەردىڭ بايسالدى بولۋى ءۇشىن ناقتىلى جۇمىستاردى اتقارۋدامىز. بۇگىنگى كۇنى جاياۋ جۇرگىنشىلەرگە دە جايلى جاعدايلار جاسالۋدا، بالا ارباسىن جەتەكتەگەن انالار، اتا-انالار، مۇگەدەكتەر مەن ۆەلوسيپەدشىلەر ەش كەدەرگىسىز جۇرۋدە»، - دەدى ول.
قالا تۇرعىندارىمەن كەزدەسۋ كەزىندە باۋىرجان بايبەك «ارىستان» بازارىن مودەرنيزاسيالاۋعا جانە «كوك قاينار» ىقشام اۋدانىندا جاڭا جول سالۋعا ۋادە ەتتى. بۇدان وزگە، پارتيانىڭ قوعامدىق قابىلداۋىنا «Skybar» تۇنگى كلۋبىنىڭ قوعامدىق ءتارتىپتى ءجيى بۇزاتىندىعى تۋرالى كوپتەگەن شاعىم ءتۇسۋى سالدارىنان اتالعان تۇنگى كلۋبقا كەشەندى تەكسەرۋ جۇرگىزىلەتىن بولادى.
