كەلەر جىلى الماتىدا 8 مەكتەپتىڭ قۇرىلىسى باستالادى. بۇل تۋرالى الماتى قالاسىنىڭ اكىمى باۋىرجان بايبەك مالىمدەدى.

«ينتەنسيۆتى ميگراسياعا جانە قالاعا قوسىلعان ەلدى مەكەندەرگە بايلانىستى بالا سانى كۇن ساناپ ارتا تۇسۋدە. سوڭعى ءۇش جىل ىشىندە وقۋشىلاردىڭ سانى 40 مىڭعا ءوستى. بۇل ارينە، ورىن سانىنىڭ جەتىسپەۋىنە اكەلەدى. تەك بيىلدىڭ وزىندە بىزدە 15 مىڭ وقۋشى ورنى جەتىسپەيدى. بيۋدجەتتىك قارجى ەسەبىنەن سوڭعى جىلدارى قالادا 7 مىڭ ورىندى مەكتەپ سالىندى. جىل اياعىنا دەيىن الاتاۋ اۋدانىندا 600 ورىندى مەكتەپ قۇرىلىسى بىتەدى. جەكە ينۆەستورلار ەسەبىنەن مەكتەپتەر سالىنۋدا، ولاردىڭ قاتارىندا «ءسابي» قورى، گەتەۋەي كومپانياسى، رويال كونستراكت بۆ بار»، - دەدى قالا اكىمى.

قازىرگى ۋاقىتتا 3 مىڭ ورىندى حالىقارالىق «سابيس» مەكتەبىنىنىڭ جوبالىق-سمەتالىق قۇجاتتارى جاسالۋدا.

سونىمەن قاتار، الماتىدا بوس جەر تەلىمدەرىنىڭ بولماۋى جاڭا مەكتەپتەر سالۋعا كەرى اسەر ەتەتىندىگىن دە اتاپ ءوتتى.

«3 جاستان 6 جاسقا دەيىنگى 20 مىڭنان استام بالدىرعاندار بالاباقشاعا كەزەكتە تۇر. بۇل ماسەلەنى شەشۋ ءۇشىن سوڭعى ءتورت جىلدا 3 مىڭ ورىندى 23 مەملەكەتتىك، 17 مىڭ ورىندى كوتتەدجدەردە ورنالاسقان 500 جەكە بالا باقشالار اشىلدى. جەكە بالا باقشالاردى ىنتالاندىرۋ بارىسىندا مەملەكەت 26 ميلليارد تەڭگە بيۋدجەتتىك قارجىنى ۇنەمدەدى. وسىناۋ اۋقىمدى ۇنەمدەۋ ءبىزدىڭ دۇرىس جولدا ەكەنىمىزدى كورسەتەدى. سونىمەن قاتار، جاقىن ارادا تاعى دا 3 مىڭ ورىندى 13 مەملەكەتتىك بالا باقشا ىسكە قوسىلاتىن بولادى»،- دەپ بالاباقشا تاپشىلىعى ماسەلەسىنە دە توقتالىپ ءوتتى.

مەملەكەتتىك-جەكە ارىپتەستىك مەحانيزمىن ءتيىمدى پايدالانا وتىرىپ، بۇل ىسكە بيزنەستى دە كەڭىنەن تارتۋدا. سوڭعى ءۇش جىل ىشىندە قالا قۇرىلىسى كەڭەسىندە ينۆەستورلار ەسەبىنەن 9 مىڭ ورىندى 70-تەن استام بالا باقشا سالۋ جونىندە شەشىم قابىلدانعان. سونداي-اق، «بازيس-ا» كومپانياسى جەكە قارجىسى ەسەبىنەن بالالار تىعىز ورنالاسقان ءۇش مەكتەپكە قوسىمشا وقۋ كورپۋستارىن سالىپ بەرمەك.