جولاۋشىلار كولىگى جانە اۆتوموبيل جولدارى باسقارماسى مەگاپوليستەگى تروللەيبۋس جولىنىڭ بايلانىس-كابەلدىك جەلىلەرىن قايتا جوندەۋدەن وتكىزىپ، اۋقىمدى جوبانى قولعا الماق. بۇل – تروللەيبۋستاردىڭ قىزمەت كورسەتۋ ساپاسىنا دا وڭ اسەرىن تيگىزەدى.

الماتىدا تروللەيبۋستار 1944 جىلى پايدا بولىپتى. سودان بەرى جىلجىمالى قۇرام بىرتىندەپ جاڭارتىلىپ، جاڭا جەلىلەر اشىلىپ كەلدى. ەكولوگيالىق جاعىنان تازا ءارى ءتيىمدى سانالاتىن بۇل قوعامدىق كولىككە دەگەن سۇرانىس ۇلكەن. الايدا، توزىعى جەتكەن بايلانىس-كابەلدىك جەلىلەر تروللەيبۋستاردىڭ ءمىنسىز قىزمەت ەتۋىنە كەدەرگى كەلتىرىپ وتىر. كۇن سايىن تروللەيبۋس جۇرگىزۋشىسىنىڭ كولىكتەن شىعىپ، سىمىن قولىمەن جەلىگە سالىپ جۇرگەنىن كورىپ ءجۇرمىز. بۇل جولاۋشىنىڭ ۋاقىتىن الۋمەن قاتار، جۇرگىزۋشىنىڭ ومىرىنە دە ءقاۋىپ توندىرەتىنى انىق.

– تروللەيبۋستاردىڭ دۇرىس قاتىناماۋى توزىعى جەتكەن جەلىلەردىڭ سەبەبىنەن بولىپ وتىر. ويتكەنى، قولدانىستاعى بايلانىس-كابەل جەلىسىنىڭ ستاندارتتى كەرنەۋى جىلجىمالى قۇرامنىڭ جەلىگە شىعۋ سانىن شەكتەيدى. جەلىلەر جاڭارتىلسا، مارشرۋتتىڭ تۇراقتى قاتىناۋى كەمىندە ەكى ەسەگە جاقسارادى، – دەيدى جولاۋشىلار كولىگى جانە اۆتوموبيل جولدارى باسقارماسىنىڭ باسشىسى تالعات حوسچانوۆ.

جاڭارتۋ جۇمىستارى بارىسىندا 172،62 شاقىرىم بايلانىس جەلىسى جوندەلىپ، 529 بايلانىس جەلىسىنىڭ تىرەكتەر مەن وقشاۋلانعان اسپالى جۇيەلەر، بويلىق كوتەرگىش ارقانى مەن تروللەيبۋستىڭ بايلانىستىرعىش سىمدارى اۋىستىرىلادى. 39،81 شاقىرىم قاشىقتىققا جەتەتىن اسب كابەلدەرى تارتىلادى. اۋقىمدى جۇمىس بارىسىندا تروللەيبۋس جەلىلەرى عانا جاڭعىرمايدى، سونىمەن قاتار كوشەلەر مەن جاياۋ جۇرگىنشىلەر جولى اباتتاندىرىلىپ، تروللەيبۋس جولدارى بارىنشا جارىق شامدارىمەن قامتاماسىز ەتىلەدى. اۋقىمدى جۇمىس 2019 جىلى باستالادى.