الماتىداعى بالۋان شولاق اتىنداعى سپورت سارايىندا قازاق كۇرەسىنەن «الەم بارىسى» — تۇيە بالۋاندار اراسىنداعى الەم چەمپيوناتى ءوتتى. تۇڭعىش پرەزيدەنت كۇنىنە وراي جانە «رۋحاني جاڭعىرۋ» باعدارلاماسى اياسىندا الماتى قالاسى اكىمدىگىنىڭ قولداۋىمەن ۇيىمداستىرىلعان بەدەلدى باسەكەگە 29 ەلدىڭ بالۋانى قاتىستى. شەتەلدىك سپورتشىلارعا قازاقستاننىڭ بەس بالۋانى توتەپ بەردى. ەرەجە بويىنشا قاتىسۋشىلاردىڭ سالماعى 90 كەلىدەن جوعارى بولۋى كەرەك.
تارتىستى بەلدەسۋلەردىڭ ناتيجەسىندە ايبەك نۇعىماروۆ ەكىنشى جىل قاتارىنان «الەم بارىسى» اتاعىنا يە بولدى. فينالدا بىلەكتى بالۋان جاس سپورتشى ەرسۇلتان مۇزاپپاروۆتى جەڭدى. ءۇشىنشى ورىندا رەسەيلىك رومان بوبيكوۆ. بيىلعى ءبىرىنشىلىكتىڭ جالپى جۇلدە قورى 20 ميلليون تەڭگەنى قۇرادى. ونىڭ ىشىندە 10 ميلليونى جەڭىمپازعا تيەسىلى. 6 ميلليون ەكىنشى، 3 ميلليون تەڭگە ءۇشىنشى ورىن يەگەرىنە تابىستالادى. ءداستۇر بويىنشا التىن، كۇمىس جانە قولا بەلبەۋلەر دە تابىستالدى. بيىل العاش رەت «جەڭىسكە دەگەن تالپىنىسى ءۇشىن» نوميناسياسى بويىنشا 1 ميلليون تەڭگە سىياقى تاعايىندالدى. اتالعان جۇلدەگە جانكۇيەرلەردىڭ ىستىق ىقىلاسىنا بولەنگەن تاجىكستاندىق دوداحون كۋرونالييەۆ لايىق دەپ تانىلدى. جانكۇيەرلەر دە جۇلدەسىز قالمادى. كورەرمەندەر اراسىندا Renault Logan اۆتوكولىگى ويناتىلدى.
«الەم بارىسىندا» قازاقستان نامىسىن بەس بالۋان قورعادى: ءتورت دۇركىن الەم چەمپيونى جانە قازاقستان بارىسى جەڭىمپازى ايبەك نۇعىماروۆ، جاس تا بولسا بولاشاعىنان زور ءۇمىت كۇتتىرەتىن ايبات سەيتەن جانە ەرسۇلتان مۇزاپپاروۆ، بيىلعى قازاقستان چەمپيوندارى رۋسلان ءابءدىرازاقوۆ جانە نۇرداۋلەت جارىلعاپوۆ. ءابدىرازاقوۆ پەن جارىلعاپوۆ العاشقى اينالىمدا جەڭىلسە، سەيتەن ەكىنشى بەلدەسۋىندە جەڭىلىس قۇشتى.
«الەم بارىسى» وسىمەن ءۇشىنشى رەت ءوتتى. 2014 جىلى العاشقى تۋرنيرگە 35 ەلدىڭ ءاپايتوس بالۋانى قاتىستى. ولاردىڭ اراسىندا دزيۋدودان الەم جانە وليمپيادا چەمپيونى چەx لۋكاش كرپالەك، سامبودان الەم چەمپيونى ارمەنيالىق گاريبيان ارۋتيۋن، دزيۋدودان الەم چەمپيوناتىنىڭ جۇلدەگەرى نەمىس رايمۋند گيردس، كۋراشتان الەم چەمپيونى يزرايلدىق گريگوريي رۋدەلسون، الىشتان ازيا چەمپيونى پارسى مۋحامماد تەيموۋري ساراح، وليمپيادا جانە الەم چەمپيوناتىنىڭ جۇلدەگەرى كۋبالىق وسكار رەنە ۆيدال برايسون جانە تاعى باسقا اتاقتى بالۋاندار بوز كىلەمگە شىققان ەدى. تارتىستى باسەكە ناتيجەسىندە التىن بەلبەۋ مەن ءجۇز مىڭ اقش دوللاردى كۋبالىق برايسون يەلەندى. ەكىنشى ورىندا ايبەك نۇعىماروۆ، ءۇشىنشى ساتىدا رەسەيلىك ماكسيم شيريايەۆ. 2014 جىلى xالىقارالىق تۋرنير رەتىندە تۇساۋى كەسىلگەن «الەم بارىسى» بۇگىندە قازاق كۇرەسىنەن ءابسوليۋتتى الەم چەمپيوناتى دەڭگەيىنە ءوستى. بىلتىر استاناداعى «بارىس ارەنادا» ايبەك نۇعىماروۆ «الەم بارىسى» اتانسا، قازاق بالۋانىنا اقتىق بەلدەسۋدە لايىقتى قارسىلاس بولا العان گرۋزين سپورتشىسى گۋرام تۋشيشۆيلي ەدى. ال ءۇشىنشى ورىنعا ەرجان شىنكەيەۆ جايعاستى.
جارىستىڭ ەرەجەسىنە ەنگىزىلگەن كەيبىر وزگەرىستەر دە بولدى. بۇعان دەيىن كىلەمدە ءۇش تورەشى: ورتاداعى جانە قاپتالداعى قوس تورەشى بولسا، ەندى بوز كىلەمدە جالعىز مامان تورەلىك ەتتى. سونىمەن قاتار، جاتتىقتىرۋشى بۇرىنعىداي تورەشى شەشىمىنە قارسىلىق ءبىلدىرىپ، قامشى لاقتىرمادى، بەلدەسۋ بارىسىندا كۇماندى شەشىم تۋىنداعان جاعدايدا عانا ۆيدەو قايتالاۋ ەكرانعا شىعارىلدى. بارلىق بەلدەسۋلەردى تولىقتاي باس تورەشى شالقار جولامانوۆ باقىلادى.
الەمنىڭ تۇكپىر-تۇكپىرىنەن قاتىسۋشىلار الماتىعا جارىسقا بىرنەشە كۇن قالعاندا جينالدى. ولاردىڭ اراسىندا دزيۋدودان بيىلعى الەم چەمپيونى گۋرام تۋشيشۆيلي (گرۋزيا)، قازاق كۇرەسىنەن الەم چەمپيونى مۋحسين حيسوميددينوۆ (وزبەكستان)، موڭعول ۇلتتىق كۇرەسىنىڭ مەملەكەتتىك «لاشىن» اتاعىنىڭ يەگەرى سەرىك بەردىمۇرات جانە تاعى باسقا ناتيجەلى سپورتشىلار بولدى. ايتا كەتەتىن ءجايت، بيىلعى چەمپيوناتقا قاتىسقان ەلدەردىڭ بارلىعى بۇعان دەيىن قازاق كۇرەسىنىڭ سايىستارىنا قاتىسىپ ءجۇر، تەك نورۆەگيا ەلى العاش رەت ۇلتتىق كۇرەسىمىزدە باعىن سىنادى.
جارىس شارتى بويىنشا بارلىق قاتىسۋشىلارعا قازاق كۇرەسىنە ارنالعان سپورتتىق كۇرتەشە مەن اياق كيىم بەرىلدى. بالۋاندارعا فوتوسسەسسيا ۇيىمداستىرىلىپ، شەتەلدىك تورەشىلەرگە قازاق كۇرەسىنىڭ ەرەجەلەرى بويىنشا سەمينار وتكىزىلدى. 1 جەلتوقسان كۇنى ساعات «Alem Barysy» قاتىسۋشىلارىنىڭ سالماق ولشەۋ ءراسىمى جانە ب ا ق وكىلدەرىمەن كەزدەسۋ وتكىزىلدى.
ءابسوليۋتتى الەم چەمپيوناتىن تىكەلەي ەفيردە «Qazaqstan»، «Qazsport»، تۇرىكتىڭ «TRT Avaz»، رەسەيدىڭ «ماچ! پلانەتا» جانە «بوكس تۆ» تەلەارنالارى كورسەتتى.
