الماتىدا كورنەكتى مەملەكەت جانە قوعام قايراتكەرى نۇرتاس وڭداسىنوۆتىڭ قۇرمەتىنە ەسكەرتكىش تاقتا قويىلدى.
مەموريالدى تاقتايشا قالاداعى گوگول كوشەسى مەن سەيفۋللين داڭعىلىنىڭ قيىلىسىنداعى قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ قابىرعاسىنا ورناتىلدى. نۇرتاس ءداندىباي ۇلى – ءدال وسى جوعارى وقۋ ورنىن اشۋعا ۇلكەن كۇش سالعان تۇلعانىڭ ءبىرى. ەلىمىزدەگى ساۋاتسىزدىقتى جويۋ ىسىمەن اينالىسىپ، ءبىلىم-عىلىمنىڭ دامۋىندا ەرەكشە ءىز قالدىرعان ازاماتتىڭ ايتۋلى ىستەرى ۇمىتىلمايدى دەيدى زيالى قاۋىم.
«نۇرتاس وڭداسىنوۆ – كەڭەس ۇكىمەتى ءورشىپ تۇرعان كەزدە قازاققا ۇلتتىق كادر دايىنداۋ جانە ءوزىنىڭ مەكتەبىن قالىپتاستىرعان عالىم. ءقازىر مىنەكەي، وسى جوعارعى وقۋ ورىندارى ۇلكەن ءبىلىم مەن عىلىمنىڭ قاراشاڭىراعىنا اينالىپ وتىر. وتكەنىن ۇمىتقان وشكەندىكتىڭ بەلگىسى، ەرتەڭىن ەسىنە سالعان وسكەندىكتىڭ بەلگىسى دەيدى. بۇگىنگى بولىپ جاتقان ءىس-شارا وسىنىڭ دالەلى»، – دەدى قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ رەكتورى گاۋحار الدامبەرگەنوۆا.
سونىمەن قاتار، جينالعان قاۋىم مەن وقۋ ورداسىنىڭ ستۋدەنتتەرى نۇرتاس وڭداسىنوۆتىڭ ءومىرى مەن قىزمەتىنە ارنالعان «بيلىكتەن بيىك تۇلعا» اتتى دەرەكتى ءفيلمدى تاماشالادى. ايتا كەتسەك، ءفيلمدى قازاقستان رەسپۋبليكاسى پرەزيدەنتىنىڭ تەلەراديوكەشەنى تۇسىرگەن.
