الماتىدا 400-گە جۋىق اۆتوبۋس جۇرگىزۋشىسىنە جاڭا ۇلگىدەگى فورما بەرىلدى. قوعامدىق كولىك تىزگىنشىلەرىنە تاراتىلعان جاڭا كوك ءتۇستى ەكيپيروۆكا جىلدىڭ ءتورت مەزگىلىنە ساي تىگىلگەن. ياعني، جۇرگىزۋشىلەر قىستا قالىڭ ءارى جىلى كۇرتەشە كيسە، جازدا جەڭىل فۋتبولكامەن جۇرەدى.

باستاپقىدا ديزاينەرلەر قوعامدىق كولىك جۇرگىزۋشىلەرىنە مىناداي اشىق، كوگىلدىر ءتۇستى فورما ۇسىنعان ەكەن. الايدا، اۆتوبۋس جۇرگىزۋشىلەرىنىڭ دەنى ەگدە جاستا بولعاندىقتان، بۇل تۇستىك گاممانى ۇناتپاي باس تارتقان. سوندىقتان ديزاينەرلەر اۆتوبۋس جۇرگىزۋشىلەرىنىڭ كيىمىن كلاسسيكالىق ۇلگىدە تاڭداپ، ءتۇسىن قويۋ كوك ءتۇستى ەتىپ جاساعان.

بۇدان بىلاي الماتىنىڭ بارشا قوعامدىق كولىك جۇرگىزۋشىلەرى كوك ءتۇستى فورما كيىپ، جولاۋشىلارعا قىزمەت كورسەتەدى. جازدا ولارعا فۋتبولكا مەن كەپكا جاراسىمدى بولسا، كوكتەم-كۇزدە جىلى جيلەت ىڭعايلى بولماق. ال قىس مەزگىلىنە ارنالىپ ماقتادان توقىلعان جەمپىر مەن شالبار تىگىلگەن. سونداي-اق، جەلدەن قورعاپ، سۋ وتكىزبەيتىن كۇرتە بەرىلىپتى.

«كيىمدەر جيناعىنىڭ ىشىندە قىستىق كۇرتە قاراستىرىلعان. ءۇش قاباتتى سينتەپوننان تىگىلگەن بۇل كيىم قاقاعان ايازدا وتە جىلى جانە قوزعالىس كەزىندە جۇرگىزۋشىگە كەدەرگى كەلتىرمەيدى. ىشىنەن ماقتادان تىگىلگەن جەمپىر كيەدى»، – دەيدى تىگىن فابريكاسىنىڭ ديرەكتورى ارمان جىلقىبايەۆ.

جاڭا فورمانى ازىرلەۋ قازاقستاندىق تىگىن فابريكاسىنا تاپسىرىلعان. تىگىنشىلەر ءقازىر كۇن-تۇن دەمەي، اۆتوبۋس جۇرگىزۋشىلەرىنىڭ كيىمدەرىن دايىنداپ جاتىر. ولار العاش بولىپ تاپسىرىس بەرگەن اۆتوپاركتەرگە 400 جۇرگىزۋشىنىڭ فورماسىن بىرەر كۇندە وتكىزۋى ءتيىس. كومپلەكتتەگى ءار كيىمدە الماتى قالاسىنىڭ لوگوتيپى بەينەلەنگەن. ال مىجىلمايتىن ءتوزىمدى ماتاسى شەتەلدەن جەتكىزىلىپتى. جاڭا فورمانى ءقازىردىڭ وزىندە قالاداعى ءبىرقاتار اۆتوبۋس جۇرگىزۋشىلەرى كيىپ ۇلگەرگەن. 35 جىلدان بەرى قوعامدىق كولىك تىزگىندەپ كەلە جاتقان نۇرداۋلەت تۇندەباۆ بۇرىن-سوڭدى مۇنداي ىڭعايلى فورما كيمەگەنىن ايتادى.

«مۇنداي كيىم بۇرىن-سوڭدى كيگەن جوقپىز. قىسقى كيىمىمىز وتە ىڭعايلى، جىلى. جازدا جازدىق كيىمدەرىن بەرەدى. رولدە وتىرعاندا دا ىڭعايلى كيىمىمىز. ءبىرتۇستى كيىممەن جۇرگەن ءبىزدىڭ وزىمىزگە دە ىڭعايلى، ادەمى كورىنەدى»، – دەيدى قوعامدىق كولىك جۇرگىزۋشىسى نۇرداۋلەت تۇندەبايەۆ.

جۇرگىزۋشىلەر جاڭا ەكيپيروۆكانىڭ ىڭعايلى ءارى ساپالى ەكەنىنە ءدان ريزا. ەڭ باستىسى، قوزعالىسقا كەدەرگى كەلتىرمەيتىنىن العا تارتۋدا. ايتا كەتسەك، ولارعا ءبىرىڭعاي ۇلگىدە كيىم بەرۋ تۋرالى شەشىم ارنايى جۇرگىزىلگەن ساۋالناما ناتيجەسىندە قابىلدانعان. ساۋالنامادا تىزگىنشىلەردىڭ دەنى وزدەرىنىڭ قازىرگى كيىمدەرى ىڭعايسىز ەكەنىن ايتىپ، سينتەتيكا ەمەس، ماقتادان تىگىلگەن كيىم سۇراعان.

«ءقازىر 400 جۇرگىزۋشىگە ارناپ كيىم تىكتىك. الماتى قالاسىندا جالپى سانى 2900 قوعامدىق كولىك جۇرگىزۋشىسى قىزمەت ەتەدى. ولاردىڭ بارلىعىن الداعى 2 ايدا جاڭا فورمامەن قامتاماسىز ەتەمىز»، – دەدى الماتى قالاسى تاسىمالداۋشىلار قاۋىمداستىعىنىڭ ءتوراعاسى دانا احاتوۆا.

ءبىر جۇرگىزۋشىنىڭ كيىمدەر جيناعى 37 مىڭ تەڭگە تۇرادى. فورما جۇرگىزۋشىلەرگە تەگىن بەرىلەدى، اقىسىن ءار اۆتوپارك ءوز موينىنا الادى.