الماتىدا قازاقستاننىڭ ەڭبەك ەرى اياگۇل ميرازوۆا اتىنداعى شىعارماشىلىق زەرتحانا اشىلدى. وندا مەكتەپ ديرەكتورلارى مەن مۇعالىمدەردىڭ بىلىكتىلىگىن ارتتىرۋ بويىنشا جۇمىستار جاسالادى.
زەرتحانا ءبىلىم بەرۋ ءىسىنىڭ قۇرمەتتى قىزمەتكەرى اياگۇل تورە قىزىنىڭ 70 جاس مەرەيتويى قارساڭىندا اشىلعان. ۇلاعاتتى ۇستاز قالاداعى ىبىراي التىنسارين اتىنداعى ءبىلىم ورداسىن شيرەك عاسىر بويى باسقارعان. وسى جىلدار ىشىندە اتالعان وقۋ ورنى ەلىمىزدەگى ەڭ مىقتى ءبىلىم وشاعىنىڭ بىرىنە اينالدى.
«زەرتحانادا جاس ديرەكتورلاردىڭ مەنەدجەرلىك مەكتەبى جۇمىس جاسايدى. سونىمەن بىرگە، الماتى قالالىق ديرەكتورلار كەڭەسى دە جۇمىس ىستەپ تۇر. سونىڭ اياسىندا الماتى قالالىق ءبىلىم بەرۋ جۇيەسىنىڭ دامۋ تۇجىرىمداماسى، دامۋ باعدارلاماسى، ولاردى جۇزەگە اسىرۋدىڭ جوسپارلارى دايىندالىپ وتىرادى»، – دەدى الماتى قالاسى ءبىلىم بەرۋدەگى جاڭا تەحنولوگيالار عىلىمي-ادىستەمەلىك ورتالىعىنىڭ ءبولىم باسشىسى اكىمجان سايلىبايەۆ.
