الماتىدا كورنەكتى مەملەكەت جانە قوعام قايراتكەرى، ساياسي قۋعىن-سۇرگىن قۇربانى جانايدار ءسادۋاقاسوۆتىڭ قۇرمەتىنە ەسكەرتكىش تاقتا ورناتىلدى.

قايراتكەردىڭ ءاتى-جونى مەن سۋرەتى بەينەلەنگەن تاقتايشا قالاداعى نازاربايەۆ داڭعىلى جانە بوگەنباي باتىر كوشەسىنىڭ قيىلىسىنداعى ءوزى تۇرعان ءۇيدىڭ قابىرعاسىنا ءىلىندى.

جانايدار ءسادۋاقاسوۆ ءبىرقاتار جاۋاپتى مەملەكەتتىك قىزمەتتەر اتقارعان. جازىقسىز اتىلىپ كەتكەن ارىستار ىشىندە جانايدار ءسادۋاقاسوۆتىڭ ورنى بولەك دەيدى تاريحشىلار. جاستايىنان بىلىمگە قۇشتار بولعان ۇلت جاناشىرى نەبارى جيىرما جاسىندا جاسىرىن ۇيىم قۇرىپ، كولچاكتىڭ بۇعاۋىنداعى تۇتقىنداردى اۋىر ازاپتان قۇتقارۋعا ۇلەس قوسقان.

«جانايداردىڭ جانە ءبىر ەرەكشە ايتاتىن ەڭبەگى – قازاق تىلىنە مەملەكەتتىك مارتەبە بەرۋ جولىنداعى قايراتكەرلىگى. 1920 جىلى جانايدار كازسيك-تىڭ ورتالىق كوميتەتىنىڭ دەكرەتىن قابىلداتىپ، سول بويىنشا ءىس-قاعازدارى قازاقشا وتەتىن بولدى. جانە ول ءىستى جانايدار شارۋا ءتىلماشتارعا، اۋدارماشىلارعا تاپسىرا سالماي، ءوزى جۇرگىزىپ وتىرعان. ول شارۋاعا بۇكىل قوعام، بۇكىل زيالى قاۋىم قولۇشىن بەرۋ، سول ءۇشىن ەڭبەك ەتۋى كەرەك بولدى. مىنە، سول ارقىلى ماسەلەنىڭ وزەكتىلىگىن جەتكىزگەن بولاتىن»، – دەيدى تاريح عىلىمدارىنىڭ دوكتورى حانگەلدى ءابجانوۆ.